Bulus Ya Kāre Ikon da Ubanmu Ya Ba Shi

Masu sūkarsa suna cewa wasiƙunsa suna da ƙarfi, amma idan yana nan ba shi da kwarjini, maganarsa kuma ba ta da wani amfani. Bulus ya amsa cewa makamansa ba na mutum ba ne, ya ƙi shiga wasan abokan hamayyarsa na auna kansu da kansu, ya kuma tsaya cikin iyakar da Ubanmu ya ba shi.

Babi na 10.

Ni Bulus, da kaina ina roƙonku saboda tawali'u da sanyin halin Almasihu—ni wanda nake da tawali'u sa'ad da nake tare da ku ido da ido, amma mai ƙarfin hali gare ku sa'ad da nake nesa. Ina roƙo, sa'ad da na zo wurinku kada in bukaci in nuna ƙarfin hali—da gabagaɗin nan da nake shirin yi wa waɗanda suke tsammani muna rayuwa bisa ga ma'aunin mutane. Gama ko da yake muna rayuwa cikin jiki, ba ma yaƙi bisa ga ma'aunin mutane ba. Gama makaman yaƙinmu ba na mutane kaɗai ba ne, amma masu iko ne ta wurin Ubanmu don rushe kagaru. Muna rushe muhawara da kowane abin fahariya da aka tayar gāba da sanin Ubanmu, muna kuma kama kowane tunani kamammu domin yă yi biyayya ga Almasihu. Muna kuma a shirye mu hukunta kowane aikin rashin biyayya, da zarar biyayyarku ta cika.

Kuna duban abubuwa bisa ga kamanni. Idan wani ya tabbata shi na Almasihu ne, sai yă sāke yin la'akari da wannan: kamar yadda shi na Almasihu ne, haka mu ma. Gama ko da na ɗan yi fahariya fiye da kima game da ikon da Ubangiji ya ba mu—domin ginawarku, ba domin rushe ku ba—ba zan ji kunya ba. Ba na so in yi kamar ina ƙoƙarin tsorata ku da wasiƙuna ne. Gama suna cewa, “Wasiƙunsa masu nauyi ne da kuma ƙarfi, amma a zahiri shi gajiyayye ne, maganarsa kuma ba ta da amfani.” Ya kamata irin wannan mutum yă gane: abin da muke faɗa ta wasiƙa sa'ad da ba mu nan, shi ne za mu yi sa'ad da muka zo.

Ba mu da ƙarfin halin mu lissafta kanmu ko mu kwatanta kanmu da waɗansu waɗanda suke yabon kansu. Da suke awon kansu da kansu, suna kwatanta kansu da kansu, ba su nuna fahimta ba. Amma ba za mu yi fahariya fiye da iyaka ba, sai dai cikin ma'aunin yankin da Ubanmu ya ƙayyade mana—ma'auni da ya kai har gare ku. Ba ma wuce iyakarmu ba, kamar dai ba mu kai gare ku ba, gama mu ne farkon waɗanda suka kai har gare ku da bisharar Almasihu. Ba ma fahariya fiye da iyaka cikin aikin waɗansu ba, amma muna bege cewa yayinda bangaskiyarku take girma, yankinmu a cikinku zai faɗaɗa ƙwarai, domin mu iya yin wa'azin bishara a yankunan da suka wuce ku, ba tare da yin fahariya cikin aikin da aka riga aka yi a yankin wani ba. Amma “bari mai yin fahariya, yă yi fahariya cikin Ubanmu.” ^a Gama ba mai yabon kansa ba ne wanda aka yarda da shi, sai dai wanda Ubanmu yake yabo.