2 Corinthnao 9

9 ¹Prohowui katharabingli otram ngatha̱wui pong, ina nathumli kapisang khavai darkar maleimana, ²kaja nathumwui sāngairareo ina thei, kala Achaiali kumkhawui eina thuida ngarānda leihaira da Macedoniawui mibingli nathumwui vang lāngso; kala nathumwui lungsanna athum kachungkhali ning ngatha̱ ngasaka. ³Chiwui vang eina, ithumna nathumwui vang langsokapai chi hi pongli arema masā khavai, kala ina hāngkahai thada nathum ngarānda leikhavai, ina ivānaobingli kachihona. ⁴Chi maningakha, Macedoniawui mibing ili ngasoda rālaga nathum ngarānda maleila samphangakha, nathum kahāng maningla, ithumla hikathā ning khanganung chiwui vang khayakhaora. ⁵Chiwui vang eina, ivānaobingli nathumwui pāngli rida vālaga, nathumna ngashit kahai mingairareo eina khami lemmet chi rida ngarānsang khavai kasatsang khami chi darkar kasā da ina phaninga. Chithāda chi ngakaikashi eina khami thada maningla, sāngairareo eina khami lemmet thada ngarānda leiranu.

⁶Hi phaningunglu: kateowa yaokasang a china kateowa hātkhuira, kala mingairareo eina yaokasang a china mingairareo eina hātkhuira. ⁷Mi kachiva̱na ngakaikashi eina maningla, lah tandi eina maningla, awui ningli ngazek kahai thada khamiranu; kaja ithumwui Avāna ringphāda khame chi leishiya. ⁸Ithumwui Avāna lukhamashan saikora nathumtungli pemtha̱-pemtai ngasak sāshapa. Chieina atam kachida ot saikorali nathumwui darkar kasā saikora khaleida, kaphā ot saikorali nathum pemtha̱-pemtai leira. ⁹Hithada kapihaida lei: "Ana khalem eina yaowa, kachāmabingli mihaira; awui khamashung khangarong katang mavaila leichinga."

¹⁰Khayaoali athā kala zākhavai kashakazā ngarumsanga china, nathumwui athā ngarumsangda mataisang ngasakra, kala nathumwui khamashung khangarongwui mahā mataisang ngasakra. ¹¹Mingairareo saikorawui vang nathumli ot saikorali shāngsang ngasakra. Chi ithumwui eina ithumwui Avāli ningkashi shoka. ¹²Nathumna sāki otram ngatha̱ hi Prohowui katharabingwui darkar kasā khuisang khami mimāng maningla, kha ithumwui Avāli ningkashiwui ot kachungkha eina pemtha̱-pemtai ngasaka. ¹³Hi otram ngatha̱da chāng yanglaga, nathumna Khristawui paokaphā hāngphatta kasaikha pamda kaji chiwui vang, kala athumli kala kateibing saikorali mingairareo eina ngayar khami chiwui vang, kateibingna ithumwui Avāli sochikatra. ¹⁴Ithumwui Avāna nathumli mikahai juikhameia lukhamashan chiwui vang, athumna nathumwui vang seihā sālakha nathumli samphangngailak eina leira. ¹⁵Awui hāng makhavai lemmet chiwui vang ithumwui Avāli ningshisa!