2 Wakorintho 9

9 ¹Kuhusu kuwahudumia watu wa Bwana, sina haja ya kuwaandikia, ²kwa maana ninajua shauku yenu, nami ninajivuna kwa ajili yenu mbele ya Wamakedonia, kwamba Akaya imekuwa tayari tangu mwaka jana, na bidii yenu imewachochea wengi wao. ³Kwa hiyo ninawatuma ndugu, ili kujivuna kwetu kwa habari zenu kusiwe bure katika jambo hili—ili mpate kuwa tayari, kama nilivyosema. ⁴La sivyo, kama Wamakedonia watakuja pamoja nami na kuwakuta hamjajiandaa, sisi—bila kuwataja ninyi—tutaona aibu kwa ujasiri huo. ⁵Kwa hiyo niliona ni muhimu kuwasihi ndugu waende kwenu kabla yangu na kupanga mapema kuhusu ile zawadi ya ukarimu mliyoahidi, ili iwe tayari kama zawadi ya hiari, wala si kama kitu kilichotolewa kwa kinyongo.

⁶Kumbukeni jambo hili: apandaye kwa uchache atavuna pia kwa uchache, na apandaye kwa ukarimu atavuna pia kwa ukarimu. ⁷Kila mtu na atoe kama alivyokusudia moyoni mwake, si kwa uzito wa moyo wala kwa kulazimishwa, kwa maana Baba yetu humpenda mtoaji mchangamfu. ⁸Baba yetu aweza kuwafanyia neema yote izidi kwenu, ili mkiwa sikuzote na kila mnachohitaji katika kila jambo, mzidi katika kila tendo jema. ⁹Kama ilivyoandikwa: "Ametawanya, amewapa maskini; haki yake yadumu milele."

¹⁰Yeye ampaye mpanzi mbegu na chakula cha kula atawapa na kuzidisha mbegu yenu, na kuongeza mavuno ya haki yenu. ¹¹Mtatajirishwa katika kila jambo kwa ukarimu wa kila namna, ambao huleta shukrani kwa Baba yetu kupitia kwetu. ¹²Kwa maana huduma hii mnayoifanya haitoshelezi tu mahitaji ya watu wa Bwana, bali huzidi kwa vitendo vingi vya shukrani kwa Baba yetu. ¹³Kwa kuthibitishwa na huduma hii, wengine watamtukuza Baba yetu kwa ajili ya utii wenu katika kuiungama Injili ya Kristo, na kwa ajili ya ukarimu wenu wa kushiriki nao na kila mtu mwingine. ¹⁴Katika maombi yao kwa ajili yenu, watawaonea shauku, kwa sababu ya neema ipitayo kiasi ambayo Baba yetu amewapa. ¹⁵Ashukuriwe Baba yetu kwa ajili ya zawadi yake isiyoelezeka!