哥林多後書 9

9 ¹講到服侍主嘅子民,我唔使寫信俾你哋, ²因為我知道你哋嘅熱心,我仲向馬其頓人誇獎你哋,話亞該亞由舊年就已經預備好,你哋嘅熱誠更加激勵咗佢哋大部分人。 ³所以我打發啲弟兄去,免得我哋喺呢件事上對你哋嘅誇獎變成空話,好等你哋好似我所講咁預備好。 ⁴唔係嘅話,如果有馬其頓人同我一齊嚟,見到你哋未預備好,我哋——唔使講你哋啦——就會為住呢份信心而覺得羞愧。 ⁵所以我認為有必要勸啲弟兄先去你哋嗰度,預先安排好你哋所應許嗰份慷慨嘅禮物,咁樣佢就會預備好,成為一份甘心樂意嘅禮物,而唔係勉勉強強俾出嚟嘅。

⁶要記住呢件事:少少咁撒種嘅人,都會少少咁收割;慷慨咁撒種嘅人,都會慷慨咁收割。 ⁷各人要照佢心裏所決定嘅去俾,唔好心不甘情不願,亦唔好勉勉強強,因為我哋嘅父鍾意樂意奉獻嘅人。 ⁸我哋嘅父能夠叫各樣嘅恩典充充足足咁臨到你哋,好等你哋喺凡事上常常樣樣夠用,喺各樣善工上綽綽有餘。 ⁹正如經上所記:「佢廣行分施,賙濟窮人;佢嘅義存到永遠。」

¹⁰嗰位供給撒種嘅人種子、又供給人食嘅糧食嘅,亦會供給並且加多你哋嘅種子,叫你哋嘅義結出更多嘅果實。 ¹¹你哋喺凡事上都會富足,可以事事慷慨;呢份慷慨藉住我哋,叫人向我哋嘅父獻上感恩。 ¹²你哋所辦嘅呢件善事,唔單止補足咗主嘅子民嘅缺乏,更加叫好多人向我哋嘅父滿溢咁獻上感謝。 ¹³佢哋因住你哋辦嘅呢件善事得到憑據,就會為住你哋順服基督嘅福音、認信呢福音,又為住你哋慷慨咁同佢哋以及眾人分享,而讚美我哋嘅父。 ¹⁴佢哋為你哋祈禱嘅時候,會切切咁思念你哋,因為我哋嘅父賜俾你哋嘅恩典實在浩大。 ¹⁵願感謝歸俾我哋嘅父,因為佢賜咗個難以形容嘅恩賜!