Ang Malipayong Maghahatag
Nanghambog na si Pablo sa Macedonia nga andam na ang Acaya, busa nagpadala siya og mga tawo nga mag-una. Gusto niya nga ang gasa ihatag nga kinabubut-on, dili gayod pugsanon pinaagi sa pagpit-os, kay ang atong Amahan nahigugma sa malipayon nga maghahatag, ug kay ang kuwarta mahimong pagpasalamat taliwala sa mga tawo nga dili gayod mahimamat sa mga taga-Corinto.
9 1Mahitungod sa pag-alagad sa katawhan sa Ginoo, dili na kinahanglan nga magsulat pa ako kaninyo, 2kay nasayod ako sa inyong kadasig, ug nagpasigarbo ako kaninyo ngadto sa mga taga-Macedonia, nga ang Acaya andam na sukad pa sa miaging tuig, ug ang inyong kasibot nakapukaw sa kadaghanan kanila. 3Busa gipadala ko ang mga igsoon, aron ang among pagpasigarbo mahitungod kaninyo dili mahimong walay pulos niini nga butang—nga kamo andam na, sumala sa akong giingon. 4Kay kon dili, kon mouban kanako ang mga taga-Macedonia ug makita kamo nga wala maandam, kami—ug labaw pa gani kamo—maulawan tungod niini nga pagsalig. 5Busa gihunahuna ko nga kinahanglan awhagon ang mga igsoon nga mag-una kaninyo ug andamon nang daan ang mahinatagong gasa nga inyong gisaad, aron kini andam na ingon nga kinabubut-ong gasa, dili ingon nga butang nga gihatag nga mabasol-basolon.
6Hinumdomi kini: si bisan kinsa nga magpugas ug diyutay magaani usab ug diyutay, ug si bisan kinsa nga magpugas ug madagayaon magaani usab ug madagayaon. 7Ang matag usa maghatag sumala sa iyang gipakahukom diha sa iyang kasingkasing, dili nga mapugsanon o pinugos, kay ang atong Amahan nahigugma sa malipayong maghahatag. 8Ang atong Amahan makahimo sa tanang grasya nga magadagaya nganha kaninyo, aron nga sa kanunay kamo adunay tanang gikinahanglan sa tanang butang, ug magadagaya kamo sa matag maayong buhat. 9Sumala sa nahisulat: “Giapod-apod niya ang iyang mga gasa ngadto sa mga kabos; ang iyang pagkamatarong magalungtad hangtod sa kahangtoran.”
10Siya nga nagahatag ug binhi ngadto sa magpupugas ug tinapay nga makaon magahatag ug magapadaghan sa inyong binhi, ug magapadugang sa ani sa inyong pagkamatarong. 11Pagadatoon kamo sa tanang butang, alang sa tanang pagkamahinatagon, nga magapatunghag pagpasalamat ngadto sa atong Amahan pinaagi kanamo. 12Kini nga pag-alagad nga inyong ginabuhat dili lamang nagatubag sa mga panginahanglan sa katawhan sa Ginoo, kondili nagadagaya usab sa daghang buhat sa pagpasalamat ngadto sa atong Amahan. 13Napamatud-an pinaagi niini nga pag-alagad, ang uban magadayeg sa atong Amahan tungod sa inyong pagpasakop sa pagsugid sa ebanghelyo ni Cristo, ug tungod sa inyong mahinatagong pagpaambit ngadto kanila ug sa tanang uban pa. 14Sa ilang mga pag-ampo alang kaninyo, mangandoy sila kaninyo, tungod sa labaw gayong grasya nga gihatag kaninyo sa atong Amahan. 15Salamat sa atong Amahan tungod sa iyang dili ikasaysay nga gasa!
