2 Mga Corinto 9

9 ¹Tungkol sa paglilingkod sa mga taong hinirang ng Panginoon, hindi ko na kailangang sumulat pa sa inyo, ²sapagkat alam ko ang inyong kasabikan, at ipinagmamalaki ko kayo sa mga taga-Macedonia, na ang Acaya ay handa na mula pa noong nakaraang taon, at ang inyong sigasig ay nagpasigla sa marami sa kanila. ³Kaya isinusugo ko ang mga kapatid, upang ang pagmamalaki namin tungkol sa inyo ay hindi mapatunayang walang kabuluhan sa bagay na ito—upang kayo ay maging handa, gaya ng sinabi ko. ⁴Kung hindi, kung sakaling may mga taga-Macedonia na sumama sa akin at masumpungan kayong hindi nakahanda, kami—lalo na kayo—ay mapapahiya dahil sa gayong pagtitiwala. ⁵Kaya inisip kong kailangang hikayatin ang mga kapatid na mauna sa inyo at ihanda nang maaga ang bukas-palad na kaloob na inyong ipinangako, upang ito ay maging handa bilang isang kusang-loob na kaloob, hindi bilang isang bagay na ibinigay nang may pag-aatubili.

⁶Tandaan ninyo ito: ang naghahasik nang kakaunti ay aani rin nang kakaunti, at ang naghahasik nang sagana ay aani rin nang sagana. ⁷Magbigay ang bawat isa ayon sa ipinasya niya sa kanyang puso, hindi nang may pag-aatubili o dahil sa pamimilit, sapagkat iniibig ng ating Ama ang masayang nagbibigay. ⁸Kayang gawin ng ating Ama na umapaw sa inyo ang lahat ng biyaya, upang sa pagkakaroon ninyo ng lahat ng inyong pangangailangan sa lahat ng bagay sa tuwina, kayo ay umapaw sa bawat mabuting gawa. ⁹Gaya ng nasusulat: “Ipinamahagi niya nang malawakan ang kanyang mga kaloob sa mga dukha; ang kanyang katuwiran ay nananatili magpakailanman.”

¹⁰Siya na nagbibigay ng binhi sa naghahasik at tinapay na kakainin ay magbibigay at magpaparami ng inyong binhi, at magpapasagana sa ani ng inyong katuwiran. ¹¹Kayo ay pagyayamanin sa lahat ng bagay, para sa lahat ng kabutihang-loob, na nagbubunga ng pasasalamat sa ating Ama sa pamamagitan namin. ¹²Ang paglilingkod na ito na inyong ginagawa ay hindi lamang tumutugon sa mga pangangailangan ng mga taong hinirang ng Panginoon, kundi umaapaw din sa maraming pagpapasalamat sa ating Ama. ¹³Sa pagkakapatunay sa pamamagitan ng paglilingkod na ito, luluwalhatiin ng iba ang ating Ama dahil sa inyong pagpapasakop sa pagpapahayag ng ebanghelyo ni Cristo, at dahil sa inyong bukas-palad na pakikibahagi sa kanila at sa lahat ng iba pa. ¹⁴Sa kanilang mga panalangin para sa inyo, kayo ay pananabikan nila, dahil sa nakahihigit na biyayang ipinagkaloob sa inyo ng ating Ama. ¹⁵Salamat sa ating Ama dahil sa kanyang kaloob na hindi kayang ilarawan!