Olùfúnni Onínúdídùn
Paulu ti fọ́nnu fún Makedonia tẹ́lẹ̀ pé Akaia ti múra, nítorí náà ó rán àwọn ènìyàn ṣáájú. Ó fẹ́ kí wọ́n fi ẹ̀bùn náà fúnni tinútinú, kì í ṣe tipátipá, nítorí pé Baba wa fẹ́ràn ọlọ́yàyà olùfúnni, àti nítorí pé owó náà yóò di ìdúpẹ́ láàrin àwọn ènìyàn tí àwọn ará Kọ́rìntì kò ní fojú rí láé.
9 1Ní ti ṣíṣe ìránṣẹ́ fún àwọn ènìyàn Olúwa, kò pọn dandan kí n kọ̀wé sí yín, 2nítorí mo mọ ìháragàgà yín, mo sì ń fọhùn ìyìn yín fún àwọn ará Makedonia pé Akaia ti múra tán láti ọdún tí ó kọjá, ìtara yín sì ti ru ọ̀pọ̀ nínú wọn sókè. 3Nítorí náà, mo ń rán àwọn arákùnrin wọ̀nyí, kí ìfọhùn ìyìn wa nípa yín má baà já sí asán ní ọ̀ràn yìí—kí ẹ lè múra tán, gẹ́gẹ́ bí mo ti wí. 4Bí bẹ́ẹ̀ kọ́, bí àwọn ará Makedonia bá bá mi wá tí wọ́n sì rí i pé ẹ kò múra sílẹ̀, ojú yóò ti àwa—kí a má tilẹ̀ wí ti ẹ̀yin—nítorí ìgbọ́kànlé bẹ́ẹ̀. 5Nítorí náà, mo rò pé ó yẹ kí n rọ àwọn arákùnrin náà kí wọ́n lọ ṣáájú sí ọ̀dọ̀ yín, kí wọ́n sì tètè pèsè ẹ̀bùn ọ̀làwọ́ tí ẹ ti ṣe ìlérí, kí ó lè ṣe tán gẹ́gẹ́ bí ẹ̀bùn àtinúwá, kì í ṣe gẹ́gẹ́ bí ohun tí a fi ìkùnsínú fúnni.
6Ẹ rántí èyí: ẹnikẹ́ni tí ó bá fúnrúgbìn díẹ̀ yóò sì kórè díẹ̀, ẹnikẹ́ni tí ó bá sì fúnrúgbìn lọ́pọ̀lọ́pọ̀ yóò sì kórè lọ́pọ̀lọ́pọ̀. 7Kí olúkúlùkù fúnni gẹ́gẹ́ bí ó ti pinnu nínú ọkàn rẹ̀, kì í ṣe pẹ̀lú ìkùnsínú tàbí nípa tipátipá, nítorí Baba wa fẹ́ràn olùfúnni onínúdídùn. 8Baba wa lè mú kí gbogbo oore-ọ̀fẹ́ máa kún àkúnwọ́sílẹ̀ fún yín, kí ẹ lè máa ní gbogbo ohun tí ẹ nílò nínú ohun gbogbo nígbà gbogbo, kí ẹ sì máa pọ̀ yanturu nínú gbogbo iṣẹ́ rere. 9Gẹ́gẹ́ bí a ti kọ ọ́ pé: “Ó ti fọ́n ẹ̀bùn rẹ̀ ká fún àwọn tálákà; òdodo rẹ̀ dúró láéláé.”
10Ẹni tí ó ń pèsè irúgbìn fún afúnrúgbìn àti oúnjẹ láti jẹ, yóò pèsè yóò sì sọ irúgbìn yín di púpọ̀, yóò sì mú ìkórè òdodo yín pọ̀ sí i. 11A ó sọ yín di ọlọ́rọ̀ nínú ohun gbogbo fún ọ̀làwọ́ gbogbo, tí ń mú ọpẹ́ wá fún Baba wa láti ipasẹ̀ wa. 12Iṣẹ́ ìsìn yìí tí ẹ ń ṣe kì í ṣe kìkì pé ó pèsè àìní àwọn ènìyàn Olúwa nìkan, ṣùgbọ́n ó tún kún àkúnwọ́sílẹ̀ nínú ọ̀pọ̀lọpọ̀ ìṣe ọpẹ́ sí Baba wa. 13Nípa ìdánwò iṣẹ́ ìsìn yìí, àwọn ẹlòmíràn yóò yin Baba wa nítorí ìtẹríba yín nínú jíjẹ́wọ́ ìhìnrere Kristi, àti nítorí ọ̀làwọ́ pípín tí ẹ ń pín fún wọn àti fún gbogbo ènìyàn mìíràn. 14Nínú àdúrà wọn fún yín, wọn yóò máa fẹ́ yín gidigidi, nítorí oore-ọ̀fẹ́ àrékọjá tí Baba wa ti fi fún yín. 15Ọpẹ́ ni fún Baba wa nítorí ẹ̀bùn rẹ̀ tí a kò lè ṣàpèjúwe!
