Mũheani wa Gĩkeno
Paũlũ nĩeerahĩte kũrĩ Makedonia atĩ Akaia nĩ ĩhaarĩirie, nĩ ũndũ ũcio agĩtũma andũ mambe gũthiĩ. Endaga kĩheo kĩheanwo na kwenda, no ti na kũringĩrĩrio, tondũ Ithe witũ nĩendete mũheani ũrĩa ũheanaga akenete, na tondũ mbeeca icio igatuĩka ngaatho thĩinĩ wa andũ arĩa Akorinitho matakoona.
9 1Ha ũhoro wa gũtungatĩra andũ a Mwathani, ndirĩ na bata wa kũmwandĩkĩra, 2amu nĩnjũĩ kwĩyendera kwanyu, na nĩndĩĩrahagĩra inyuĩ kũrĩ andũ a Makedonia, atĩ andũ a Akaia nĩmehaarĩirie kuuma mwaka ũrĩa mũthiru, naguo kĩyo kĩanyu nĩgĩtahũrĩte aingĩ ao. 3Nĩ ũndũ ũcio nĩndatũma ariũ a Ithe witũ, nĩ geetha ũrahi ũrĩa tũmwĩrahagĩra ndũkaage kĩene ũhoroinĩ ũyũ—atĩ mũkorwo mwĩhaarĩirie, o ta ũrĩa ndoigire. 4Nĩgũkorwo angĩkorwo andũ a Makedonia nĩmoka hamwe na niĩ, na mamũkore mũtehaarĩirie, ithuĩ—tũtekuuga inyuĩ—nĩtũngĩconoka nĩ ũndũ wa kwĩĩhoka kũu. 5Nĩ ũndũ ũcio nĩndoonire kwagĩrĩire kũringĩrĩria ariũ a Ithe witũ mathiĩ mbere yakwa kũrĩ inyuĩ, nĩguo mambĩrĩirie kũhaarĩria kĩheo kĩu kĩnene mweeranĩire, nĩ geetha kĩhaarĩrio ta kĩheo kĩa kwĩyendera, no ti ta kĩndũ kĩheanĩtwo na kwaga kwenda.
6Ririkanai ũũ: ũrĩa wothe ũhaandaga o ũnini nĩakagetha o ũnini, nake ũrĩa ũhaandaga na ũtaana nĩakagetha na ũtaana. 7O mũndũ nĩaheane o ta ũrĩa atuĩte ngoroinĩ yake, no ti na kĩeha kana na kũringĩrĩrio, amu Ithe witũ nĩendete mũheani ũrĩa ũheanaga akenete. 8Ithe witũ nĩahota gũtũma wega wake wothe ũmũingĩhĩre, nĩ geetha, mũgĩkoragwo na kĩrĩa gĩothe mũbataire maũndũinĩ mothe hĩndĩ ciothe, mũingĩhwo nĩ wĩra o wothe mwega. 9O ta ũrĩa kwandĩkĩtwo atĩrĩ: “Nĩahurunjĩire athĩĩni iheo ciake; naguo ũthingu wake ũtũũraga nginya tene na tene.”
10Ũrĩa ũheaga mũhaandi mbeũ na mũgate wa kũrĩa nĩakamũhe mbeũ na amĩingĩhie, na aingĩhie magetha ma ũthingu wanyu. 11Nĩmũgatoonywo maũndũinĩ mothe, nĩguo mũtaanage na njĩra ciothe, naguo ũtaana ũcio nĩũtũmaga Ithe witũ acookerio ngaatho na ũndũ witũ. 12Amu ũtungata ũyũ mũreeka ndũiyũragia o mabata ma andũ a Mwathani, no nĩũingĩhaga na ciĩko nyingĩ cia gũcookeria Ithe witũ ngaatho. 13Nĩ ũndũ wa ũtungata ũyũ ũrĩa ũimanĩtie, andũ nĩmakaagooca Ithe witũ nĩ ũndũ wa wathĩki wanyu rĩrĩa mũumbũraga Ũhoro-ũrĩa-Mwega wa Kristũ, na nĩ ũndũ wa ũtaana wanyu wa kũgayana nao na andũ arĩa angĩ othe. 14Namo mahooyoinĩ mao mamũhooyagĩra, nĩmakamwĩrirĩria mũno, nĩ ũndũ wa wega mũnene makĩria ũrĩa Ithe witũ amũheete. 15Ithe witũ arocookerio ngaatho nĩ ũndũ wa kĩheo gĩake kĩrĩa gĩtangĩtaarĩrio!