Nyakupereka Wakutsandzaya

Paulo adadzumbira kale Amasedoniya kuti Akaya akhali akukonzeka, natenepa iye atuma amuna patsogolo. Iye asafuna kuti mtsukwa uperekwe na kufuna, nee kucotswa mwakukakamizwa, thangwi Baba wathu asafuna munthu wakupereka mwakukondwa, na thangwi kobiri yeneyi isasanduka kutenda pakati pa anthu omwe Akorinto nkhabe kudzaaona.

Kapitulu 9.

Thangwi ya kutumikira anthu a Mbuya, nkhabe kufunika kuti ndikulemberani, thangwi ndisadziwa cifuno canu, pontho ndisadzikuza thangwi ya imwe kuna Amasedhonya, kuti Akaya ali wakukhunganyika kubulukira caka cidamala, na khaphukira yanu yalimbisa azinji a iwo. Na tenepo ndisatuma abale, toera kudzikuza kwathu thangwi ya imwe kukhonde kukhala kwapezi pa nkhani iyi—toera imwe mukhale wakukhunganyika, ninga pidalonga ine. Mbwenye Amasedhonya angabwera na ine mbakugumanani mwakukhonda khunganyika, ife—ndokumbukambo imwe—tinakhala na manyadzo thangwi ya cinyindiro ceneci. Na tenepo ndaona kuti pisafunika kuwangisa abale toera aende patsogolo kuna imwe, mbakhunganya pakutoma muoni ukulu udapikira imwe, toera ukhale wakukhunganyika ninga muoni wakupereka na ntima onsene, tayu ninga cinthu cakupereka mwakukhonda funa.

Kumbukani pyenepi: ule anabzwala pang'ono anabvuna pang'onombo, na ule anabzwala pizinji anabvuna pizinjimbo. Munthu m'bodzi na m'bodzi apereke ninga mwadasankhula iye muntima mwace, tayu mwakutsukwala peno mwakukakamizwa, thangwi Baba wathu asafuna nyakupereka wakutsandzaya. Baba wathu asakwanisa kucitisa kukoma ntima konsene kukudzalireni mwakupiringana, toera pa ndzidzi onsene mukhale na pyonsene pinafuna imwe pa pinthu pyonsene, mbamupiringana pa basa yadidi yonsene. Ninga mudalemberwa: “Iye wagawira mioni yace kuna anyakutcerenga; kulungama kwace kusakhala mpaka kwenda na kwenda.”

Ule anapasa mbeu kuna nyakubzwala na nkate toera kudya, anakupasani mbeu yanu mbaithimiza, mbaathimizira kubvuna kwa kulungama kwanu. Imwe munadzakhala akupfuma pa pinthu pyonsene, toera mukwanise kupereka mwa ntima onsene, kunabweresa kupereka takhuta kuna Baba wathu kubulukira mwa ife. Basa iyi yakutumikira inacita imwe nkhabe kungakwanirisa basi pinafuna anthu a Mbuya, mbwenye isapfundzika mu kupereka takhuta kuzinji kuna Baba wathu. Mukupangizwa na basa iyi, anango anadzasimba Baba wathu thangwi ya kubvera kwanu mu kubvuma Mphangwa Zadidi za Kirixtu, na thangwi ya kugawana kwanu mwa ntima onsene na iwo pabodzi na anthu onsene anango. Mu maphembero awo thangwi ya imwe, iwo anadzakufunani kakamwe, thangwi ya kukoma ntima kukulu kudapereka Baba wathu kuna imwe. Takhuta kuna Baba wathu thangwi ya muoni wace wakukhonda longeka!