2 ቆሮንቶስ 9

9 ¹ለቅዱሳን ስለሚደረገው አገልግሎት ልጽፍላችሁ አያስፈልገኝም፤ ²ዝግጁነታችሁን ዐውቃለሁና፤ አካይያ ካለፈው ዓመት ጀምሮ ተዘጋጅታለች እያልሁ ስለ እናንተ ለመቄዶንያ ሰዎች እመካለሁ፤ ቅንዓታችሁም ከእነርሱ አብዛኞቹን አነሣሥቷል። ³ስለዚህ እንደ ተናገርሁት ተዘጋጅታችሁ እንድትገኙ፣ በዚህ ነገር ስለ እናንተ የተመካንበት ከንቱ እንዳይሆን ወንድሞችን እልካለሁ። ⁴ያለዚያ የመቄዶንያ ሰዎች ከእኔ ጋራ መጥተው ሳትዘጋጁ ቢያገኙአችሁ፣ በእንዲህ ያለ መተማመን እኛ—እናንተንስ ሳንጠቅስ—እናፍር ነበር። ⁵ስለዚህ ወንድሞቹ ቀድመው ወደ እናንተ እንዲሄዱና ተስፋ የገባችሁትን ለጋስ ስጦታ አስቀድመው እንዲያዘጋጁ ልማልዳቸው አስፈላጊ ሆኖ አገኘሁት፤ ይኸውም በግዴታ እንደ ተሰጠ ሳይሆን በፈቃደኝነት እንደ ተሰጠ ስጦታ ዝግጁ ይሆን ዘንድ ነው።

⁶ይህን ዐስቡ፤ በጥቂቱ የሚዘራ በጥቂቱ ደግሞ ያጭዳል፤ በልግስና የሚዘራም በልግስና ያጭዳል። ⁷እያንዳንዱ በልቡ እንደ ቈረጠ ይስጥ እንጂ በኀዘን ወይም በግድ አይስጥ፤ አባታችን በደስታ የሚሰጠውን ይወድዳልና። ⁸አባታችን በሁሉ ነገር ሁልጊዜ የሚያስፈልጋችሁ ሁሉ ኖሯችሁ ለበጎ ሥራ ሁሉ እንድትበዙ፣ ጸጋውን ሁሉ አትረፍርፎ ሊሰጣችሁ ይችላል። ⁹ተብሎ እንደ ተጻፈ፦ “ለድኾች ሰጥቶ በትኗል፤ ጽድቁም ለዘላለም ይኖራል።”

¹⁰ለዘሪ ዘርን ለመብልም እንጀራን የሚሰጥ እርሱ ዘራችሁን ይሰጣል፤ ያበዛላችሁማል፤ የጽድቃችሁንም መከር ያሳድጋል። ¹¹ለልግስና ሁሉ በሁሉ ነገር ትበለጽጋላችሁ፤ ይህም በእኛ በኩል ለአባታችን ምስጋናን ያስገኛል። ¹²የምታከናውኑት ይህ አገልግሎት የቅዱሳንን ጕድለት ይሞላል ብቻ ሳይሆን፣ ለአባታችን በሚቀርብ በብዙ ምስጋናም ይበዛል። ¹³በዚህ አገልግሎት ተፈትናችሁ በመገኘታችሁ፣ የክርስቶስን ወንጌል በመመስከር ለምታሳዩት መታዘዝ፣ ከእነርሱና ከሌሎች ሁሉ ጋራ ስለ ልግስናችሁ ሰዎች አባታችንን ያከብራሉ። ¹⁴አባታችን ስለ ሰጣችሁ ከሁሉ የላቀ ጸጋ የተነሣ፣ ስለ እናንተ በሚያደርጉት ጸሎት ይናፍቁአችኋል። ¹⁵ስለማይነገር ስጦታው አባታችን ይመስገን!