شادلیقلا ورن آدام
پولوس آرتیق مقدونئیّه‌یه فخر اتمئشدی کی، اَخایئه حاضیردیر، اونا گؤره قاباقجادان آداملار گؤندَ‌رئر. او ائسته‌یئر کی، بخشئش اؤز گؤیلو ائله ورئلسئن، هچ واخت مجبورئیّتله سیخیلیب چیخاریلماسین، چونکی آتامیز شادلیقلا ورن آدامی سوئر و چونکی او پول، کورئنتلی‌لرئن هچ واخت گؤرمه‌یه‌جکلری آداملار آراسیندا تشکّوره چِورئلئر.
9 1موقدّسلره اولان خئدمت حاقّیندا سئزه یازماغا احتئیاج یوخدور، 2چونکی سئزئن ائشتئیاقینیزی بئلئرم و مقدونئیه‌لی‌لرئن یانیندا سئزئنله فخر ادئرم کی، اَخایئه کچن ائلدن بری حاضیردیر، و سئزئن قیرتئنئز اونلارین چوخونو حرکته گتئرئب. 3اونا گؤره قارداشلاری گؤندَ‌رئرم کی، سئزئن حاقّینیزدا اتدئیئمئز فخر بو باره‌ده بوشا چیخماسین؛ یعنی ددئیئم کئمی حاضیر اولاسینیز. 4یوخسا، اگر مقدونئیه‌لی‌لر منئمله گلئب سئزی حاضیر اولمادیغینیزی گؤرسه‌لر، بو یقئنلئیه گؤره بئز—سئزی دمئرم—اوتانارییق. 5اونا گؤره لازیم بئلدئم کی، قارداشلاری تشوئق اِدئم تا سئزدن قاباق یانینیزا گدئب، وعده وردئیئنئز سخاوتلی بخشئشی قاباقجادان حاضیرلاسینلار، بله‌جه او، ائستکلی بئر بخشئش کئمی حاضیر اولسون، کؤنولسوز ورئلن بئر شی کئمی یوخ.
6بونو یادینیزا سالین: کئم آز سَپسه، آز دا بئچَر، و کئم بوللوق‌لا سَپسه، بوللوق‌لا دا بئچَر. 7هر کس اوره‌یئنده قرار وردئیی کئمی ورسئن، ائستکسئزلئکله یا مجبورئیّتله یوخ، چونکی آتامیز شادلیقلا ورن آدامی سوئر. 8آتامیز هر فیضی سئزه بوللوق‌لا ورمه‌یه قادئردئر کی، بله‌جه همئشه هر شیده لازیم اولان هر شیه مالئک اولوب، هر یاخشی ائشده بوللوق ائچئنده اولاسینیز. 9یازیلدیغی کئمی: «کاسیبلارا بخشئشلرئنی سَپه‌له‌دی؛ اونون عدالتی ابدی قالار.»
10اَکَنه توخوم و یمه‌لی چؤرک وِرَن، سئزئن توخومونوزو ده ورئب چوخالداجاق و عدالتئنئزئن محصولونو آرتیراجاق. 11هر شیده وارلانارسینیز کی، هر جور سخاوتلی اولاسینیز، و بو دا بئزئم واسئطَمئزله آتامیزا شوکور گتئرر. 12یرئنه یتئردئیئنئز بو خئدمت آنجاق موقدّسلرئن احتئیاجلارینی رفع اتمئر، بلکه آتامیزا چوخلو شوکورلرله بوللوق ائچئنده داشیر. 13بو خئدمت واسئطه‌سئله ثابئت اولدوغونوز اوچون، باشقالاری مسئحئن ائنجئلئنی ائقرار اتمکده‌کی ائطاعتئنئزه گؤره و اونلارلا و هر کسله سخاوتلی پایلاشمانیزا گؤره آتامیزا حمد اده‌جکلر. 14سئزئن اوچون دوعا اده‌رکن، آتامیزین سئزه وردئیی اوستون فیضه گؤره سئزئن حسرتئنئزی چکه‌جکلر. 15اونون وصفه‌گلمز بخشئشئنه گؤره آتامیزا شوکور اولسون!
