Khushi Pora Diya Manuh
Paul pora Macedonia ke Achaia taiyar ase koi kene age pora phutani korise, etu nimite tai manuh khan ke age te pathai. Tai itcha kore dan tu mon khushi pora dibo, kitia bhi dabab pora nikali lowa nohoi, kilemane amar Pitri khushi pora diya manuh ke morom kore, aru kilemane etu poisa Corinth manuh khan kitia bhi namila manuh khan majot te dhanyabad hoi jai.
9 1Prabhu laga manuh khan ke sewa kora laga kotha te, moi tumikhan ke likhibole dorkar nai, 2kilemane moi tumikhan laga mon laga itcha jane, aru moi Macedonia manuh khan ke tumikhan laga bisop te phutani kore, Achaia tu poila bosor pora taiyar ahhise, aru tumikhan laga mon-jolon pora tarkhan laga bisi jon ke uksai dise. 3Etu karne moi bhai khan ke pathai ase, titia amikhan tumikhan laga bisop te kora phutani eitu kaam te khali nahobo—moi kowa nisina, tumikhan taiyar thakibo. 4Nahole, jodi Macedonia manuh khan moi logot ahhi kene tumikhan ke taiyar nathaka paile, eneka biswas nimite amikhan—tumikhan laga kotha nakoile bhi—sorom pabo. 5Etu karne moi bhai khan ke tumikhan usorte age jabole aru tumikhan pora kosom diya dangor daan tu age pora taiyar koribole mati bhal hobo bhabi loise, titia eitu mon khushi pora diya daan nisina taiyar thakibo, mon dukh pora diya jinis nisina nohoi.
6Eitu mon te rakhibi: kun pora olop kheti laga bijon phelai, tai olop he katibo, aru kun pora bisi phelai, tai bisi he katibo. 7Sob jon nijor mon te thik kora nisina dibo lage, mon dukh pora nohoi aru joborjosti pora nohoi, kilemane amar Pitri khushi pora diya manuh ke morom kore. 8Amar Pitri pora tumikhan logot sob anugrah bisi kori dibo pare, titia sob jinis te hodai tumikhan laga sob dorkar thaki kene, tumikhan sob bhal kaam te bhorta hobo. 9Likha thaka nisina: “Tai gorib khan ke tai laga daan khan chiri dise; tai laga dharmikota hodai nimite thakibo.”
10Kun pora kheti kora manuh ke bijon aru khabole roti diye, Tai tumikhan laga bijon dibo aru bisi kori dibo, aru tumikhan laga dharmikota laga kheti tu bisi kori dibo. 11Tumikhan sob jinis te dhuni hobo, sob daan diya laga karne, eitu pora amikhan dwara amar Pitri ke dhanyavad ulai ase. 12Tumikhan pora kora eitu sewa tu Prabhu laga manuh khan laga dorkar he pura nakore, kintu amar Pitri ke bisi dhanyavad kora kaam khan te bhorta hoi ase. 13Eitu sewa pora porikhya hoi kene, Khrista laga susamachar ke shikar kora te tumikhan laga mani luwa nimite, aru tarkhan logot aru sob manuh logot tumikhan laga daan pora bhag kora nimite, dusra khan amar Pitri ke mohima koribo. 14Tumikhan nimite tarkhan laga prathana te, amar Pitri pora tumikhan ke diya bisi dangor anugrah nimite, tarkhan tumikhan ke dikhibole bisi mon koribo. 15Tai laga kobole napara daan nimite amar Pitri ke dhanyavad hobi!