Paul pora Pitri pora pua tar adhikar ke bachai di ase

Tar bironde koi thaka khan koi, tar chithi khan takot ase kintu samne te tai eku dangor nadikhe aru tar kotha laga eku mol nai. Paul jawab di ke tar hathiyar khan manuh laga nohoi, aru bironde thaka khan laga nijor pora nijor ke mapi thaka khel tu tai namane, aru amar Pitri tar ke dise sima bhitor te thake.

Adhyay 10.

Moi, Paul, nije, Khrista laga nomro aru norom mon pora tumikhan ke binti kori ase—moi jun tumikhan laga age te thaka homoi te nomro ase, kintu dur te thaka homoi te tumikhan nimite saahosi ase. Moi binti kori ase, jetia moi tumikhan logot ahhibo tetiya saahosi hobole nalage—kun manuh khan pora amikhan manuh laga tarika pora jivon kore bhabe, taikhan birodh te cholai bole moi bhabi thaka biswas eitu. Kilemane amikhan gau-mangso te jivon korile bhi, amikhan manuh laga tarika pora lorai nakore. Kilemane amikhan laga lorai laga hathiyar khan khali manuh laga nahoi, kintu gorh khan ke bhangai dibole amar Pitri pora takot thaka ase. Amikhan torko khan aru amar Pitri laga gyaan birodh te uthi thaka sob ahankar jinis ke bhangai di ase, aru Khrista ke mani bole sob bhabona ke bondhi kori loi ase. Aru jetia tumikhan laga mani lua purna hobo, tetiya amikhan sob namani lua kaam ke saja dibole taiyar ase.

Tumikhan to bahar laga rup pora jinis khan ke sai ase. Jodi kunba nije Khrista laga ase koi kene nishchoy ase, tene hole tar ke aru ekbar bhabi bole dibi: tar nisena Khrista laga ase, tene amikhan bhi ase. Kilemane Prabhu pora amikhan ke diya adhikar nimite—tumikhan ke bhangai dibole nohoi, kintu bonai tulibole—moi olop bisi phutani korile bhi, moi sorom napabo. Moi laga chithi khan pora tumikhan ke bhoi khilai ase nisena dikhibole moi na-itcha kore. Kilemane taikhan koi ase, “Tar laga chithi khan bhari aru takot thaka ase, kintu nije thaka homoi te tai komjur ase aru tar kotha kua to eku daam nai.” Eneka manuh pora bujhi lobo lage: dur te thaka homoi te amikhan chithi pora ki koi, nije thaka homoi te amikhan eitu koribo.

Nijor ke nije prosansa kora kunba manuh khan logot amikhan nije ke milai bole ba tulna koribole himmat nakore. Taikhan nije ke nije pora napi kene, nije ke nije logot tulna kori kene, eku buddhi nadikhai. Kintu amikhan simana paar kori kene phutani nakoribo, khali amar Pitri pora amikhan ke diya elaka laga naap bhitor te—juntu naap tumikhan tak bhi punchi ase. Amikhan simana paar kori ja nai, jineka amikhan tumikhan tak punchibo para nai nisena; kilemane Khrista laga susamachar loi kene tumikhan tak punchibole amikhan he poila thakise. Amikhan dusra khan laga kaam nimite simana paar kori kene phutani nakore, kintu asha kore je tumikhan laga biswas bari jua logote, tumikhan majot te amikhan laga elaka bisi dangor hobo, titia amikhan tumikhan laga para dur te thaka jagah khan te susamachar prachar koribo paribo, kun dusra manuh laga elaka te age pora kori luwa kaam nimite phutani nakori kene. Kintu “kun phutani kore, tai amar Pitri te phutani koribi.” ^a Kilemane nijor ke nije prosansa kora manuh grohon kora nahoi, kintu amar Pitri pora kun ke prosansa kore, tai he grohon hoi.