9 1 प्रभूच्या लोकांची सेवा करण्याविषयी तुम्हांला लिहिण्याची मला गरज नाही, 2 कारण तुमची उत्सुकता मला माहीत आहे, आणि त्याविषयी मी मासेदोनियाच्या लोकांपुढे तुमचा अभिमान बाळगतो, की अखयाचे लोक गेल्या वर्षापासूनच तयार आहेत; आणि तुमच्या आवेशाने त्यांच्यातील बहुतेकांना प्रवृत्त केले आहे. 3 म्हणून मी बंधूंना पाठवीत आहे, यासाठी की तुमच्याविषयीचा आमचा अभिमान या बाबतीत पोकळ ठरू नये—मी म्हटल्याप्रमाणे तुम्ही तयार असावे. 4 नाहीतर, जर मासेदोनियाचे लोक माझ्याबरोबर आले आणि त्यांना तुम्ही तयार नसलेले आढळले, तर एवढ्या विश्वासामुळे आम्हांला—तुमची तर गोष्टच सोडा—लाज वाटेल. 5 म्हणून मला हे आवश्यक वाटले की बंधूंना विनंती करावी की त्यांनी तुमच्याकडे अगोदर जावे आणि तुम्ही वचन दिलेली उदार देणगी आधीच तयार करून ठेवावी, यासाठी की ती नाखुशीने दिलेली नव्हे, तर राजीखुशीने दिलेली देणगी म्हणून तयार असावी.
6 हे लक्षात ठेवा: जो थोडे पेरतो तो थोडेच कापणी करील, आणि जो उदारपणे पेरतो तो उदारपणे कापणी करील. 7 प्रत्येकाने आपल्या मनात ठरवल्याप्रमाणे द्यावे, नाखुशीने किंवा जबरदस्तीने नव्हे, कारण आनंदाने देणाऱ्यावर आमचा पिता प्रीती करतो. 8 आमचा पिता तुमच्यावर सर्व कृपा विपुलतेने ओतू शकतो, यासाठी की प्रत्येक गोष्टीत तुम्हांला जे लागते ते सर्व सदैव मिळून, तुम्ही प्रत्येक चांगल्या कामात विपुल व्हावे. 9 असे लिहिले आहे त्याप्रमाणे: “त्याने आपल्या देणग्या गरिबांना उधळून वाटल्या; त्याची नीतिमत्ता सर्वकाळ टिकते.”
10 जो पेरणाऱ्याला बी आणि खाण्यासाठी भाकर पुरवतो, तोच तुमचे बी पुरवील व वाढवील आणि तुमच्या नीतिमत्तेचे पीक अधिक करील. 11 तुम्ही प्रत्येक गोष्टीत समृद्ध व्हाल, यासाठी की सर्व प्रकारे उदार व्हावे, आणि त्यामुळे आमच्याद्वारे आमच्या पित्याला धन्यवाद अर्पण होतील. 12 तुम्ही करीत असलेल्या या सेवेने प्रभूच्या लोकांच्या गरजा भागवल्या जातातच, इतकेच नव्हे, तर ती आमच्या पित्याला अर्पण होणाऱ्या पुष्कळ धन्यवादांनी विपुल होते. 13 या सेवेने सिद्ध होऊन, तुम्ही ख्रिस्ताच्या सुवार्तेचा अंगीकार करण्यातील तुमच्या आज्ञाधारकतेमुळे, आणि त्यांच्याशी व इतर सर्वांशी उदारपणे वाटून घेतल्यामुळे, इतर लोक आमच्या पित्याची स्तुती करतील. 14 तुमच्यासाठी केलेल्या त्यांच्या प्रार्थनांत, आमच्या पित्याने तुम्हांला दिलेल्या अपार कृपेमुळे ते तुमच्याविषयी उत्कंठा धरतील. 15 आमच्या पित्याला त्याच्या अवर्णनीय देणगीबद्दल धन्यवाद असो!
