2ይ ቆሮንቶስ 9 FHB Father's Heart Bible™

9 ¹ብዛዕባ እቲ ንቅዱሳን ዝግበር ኣገልግሎት ክፅሕፈልኩም ኣየድልየንን። ²ትህንጥዩ ምህላውኩም እፈልጥ እየ እሞ፥ ናብ መቄዶንያውያን ብዛዕባኻትኩም እምካሕ ኣለኹ፤ ኣካይያ ካብ ዝሓለፈ ዓመት ድልውቲ ምዃናን፥ ቅንኣትኩም ድማ ንብዙሓት ካብኣቶም ኣለዓዒሉ ምህላውን እነግር። ³ስለዙይ፥ ከምቲ ዝበልክዎ ድሉዋት ክትኮኑ፥ እቲ ብዛዕባኻትኩም ዘለና ትምክሕቲ በዝ ነገር እዙይ ከንቱ ከይኸውን፥ ነሕዋት እልእኽ ኣለኹ። ⁴እንተ ዘይኮነ፥ መቄዶንያውያን ምሳይ መፂኦም ዘይተዳለኹም እንተ ረኺቦምኹም፥ በዝ ርግፀኛነት እዙይ ንሕና ክንሓፍር ኢና፤ ንስኻትኩምስ ይትረፍ። ⁵ስለዙይ፥ ነሕዋት ቀቅድመይ ናባኻትኩም ክኸዱ፥ ነቲ ዘተስፈኹምዎ ልግሲ ዝመልኦ ውህብቶ ኣቐዲሞም ከዳልውዎን ክምሕፀኖም ኣድላዪ ከም ዝኾነ ሓሰብኩ፤ ከምዙይ ድማ፥ ብግዲ ዝተውሃበ ዘይኮነስ፥ ከም ፍቓደኛ ውህብቶ ድሉው ክኸውን እዩ።

⁶እዙይ ዘክሩ፦ እቲ ሒደት ዝዘርእ፥ ሒደት ድማ ክዓፅድ እዩ፤ እቲ ብልግሲ ዝዘርእ ከዓ፥ ብልግሲ ድማ ክዓፅድ እዩ። ⁷ነፍሲ ወከፍ ከምቲ ብልቡ ዝመደቦ ይሃብ እምበር፥ ብሕዘን ወይ ብግዲ ኣይኹን፤ ኣቦና ሕጉስ ወሃቢ የፍቅር እዩ እሞ። ⁸ኣቦና፥ ብዅሉ ነገር ኵልሻዕ ዘድልየኩም ኵሉ እናሃለወኩም፥ ኣብ ኵሉ ሰናይ ግብሪ ምእንቲ ኽትበዝሑ፥ ኵሉ ፀጋ ናባኻትኩም ከብዝሕ ይኽእል እዩ። ⁹ከምቲ ዝተፅሓፈ፦ “ፋሕ ኣቢሉ ንድኻታት ሃበ፤ ፅድቁ ንዘለኣለም ይነብር።”

¹⁰እቲ ንዘራኢ ዘርኢ፥ ንምብላዕ ድማ እንጀራ ዝህብ፥ ዘርእኹም ክህበኩምን ከብዝሓልኩምን እዩ፤ ፍረ ፅድቅኹም ድማ ከዕብየልኩም እዩ። ¹¹ንኵሉ ልግሲ ብዅሉ ነገር ክትህብትሙ ኢኹም፤ እዙይ ድማ ብኣና ኣቢሉ ንኣቦና ምስጋና የምፅእ። ¹²እዝ እትገብርዎ ኣገልግሎት እዙይ፥ ናይ ቅዱሳን ድሌት ዘማልእ ጥራሕ ዘይኮነስ፥ ናብ ኣቦና ብዙሕ ናይ ምስጋና ተግባራት ድማ የብዝሕ እዩ። ¹³በዝ ኣገልግሎት እዙይ ተፈቲንኩም ስለ ዝተረኸብኩም፥ ወንጌል ክርስቶስ ብምእማንኩም ዘለኩም ተኣዛዝነት፥ ከምኡውን ምሳታቶምን ምስ ኵሉ ሰብን ብልግሲ ብምክፋልኩም ምኽንያት፥ ካልኦት ንኣቦና ከመስግኑ እዮም። ¹⁴ኣብ ፀሎቶም ምእንታኻትኩም፥ ስለ እቲ ኣቦና ዝሃበኩም ዝበልፅ ፀጋ፥ ብናፍቖት ክናፍቑኹም እዮም። ¹⁵ስለ እቲ ክግለፅ ዘይኽእል ውህብቶ፥ ንኣቦና ምስጋና ይኹን!