Sailāmlak eina Lukhamashan Pemtha̱ya
Kum akha kahai rida phokkahai kankhamiwui lemmet chi ara eina tangda mapemmana. Paulna chili ningkhami masāmana. Ana Macedoniawui mibing chitheia, athum kachām kala kakhanang chungkha, kha ithumwui Avāwui lukhamashan eina athumna khangarapa hakmei chigata; ana church bingwui ngachaili ngaraikachā mashun chi mimāng kapo, kala lemmetwui pongli khipānakha khayon malei khavai Titusli shākhi mi eina chihovā.
8 1Ivānaobing, Macedoniawui churchbingli mikahai ithumwui Avāwui lukhamashan chi nathumna theiranu da ithumna ningchānga. 2Kakhanang kachungkha eina athumli chāng yanglala, athumwui ringphā pemtha̱ kala kachām kaho china sailāmlak khavaili pemtha̱da shokhaowa. 3Kaja ina shākhi mina: athumna khangarapa athishurda, kala chili hakmei, mathānthup katonga eina chigata. 4Katharabingli ngachonkhamiwui mayākhami kala ngasokharum samphang khavai, saklak eina ithumli poi. 5Hi ithumna phaningkasā thada maningmana. Athumna ithumwui Avāwui ningkhami athishurda athum khalatta khare Proholi, chiwui thili ithumli mikahaina. 6Chiwui vang eina, ana sāphok kahai thāda, nathumwui alungli hi lukhamashanwui ot chila kupkhui khavai Titusli ithumna poi. 7Kha nathumna ot saikorali, shitkasangli, tuili, thangkhameili, ningkachot saikorali, kala nathumwui vang ithumna khami leikashili phāmeikap kaje thāda, hi sailāmlak chigatlala nathumna phāmeikap khavai sālu. 8Hi ningkhami maningmana; kha kateibingwui ningkachot eina nathumwui leikashiwui kachangkhat chi ina chāng yang khavaina. 9Ithumwui Proho Jishu Khristawui lukhamashan chi nathumna thei: ana kashānga jilala, nathumwui vang kachāma ngasāhaowa, chithākha awui kachām eina nathumli shāngsang ngasakra. 10Hiwui pongli iwui kaphaning hina: achākum eina hi sāda maningla, sākhavai ningkachāngla khami haophok kahai nathumwui vang hi kānnā khavaina. 11Sākhavai ningkachāng chi nathumwui khalei athishurda kupkhuili chānjam khavai, ara sākhavai chila kupkhuilu. 12Ningkachāng leiakha, chi miwui khalei athishurda khamayā samphanga, makhalei athishurda maningmana. 13Ina hānghai chi kateibingli ngasāmkhui ngasakda nathumli khanang ngasak khavai maningmana, kha ngaraikachā mashun leikhavaina. 14Ara nathumwui kachungkha khalei china athumwui khavāt khuirāranu; chithākha athumwui kachungkha khalei china nathumwui khavāt khuirāra, kala ngaraichā leira. 15Hithada kapihaida lei: "kachungkha kakhui mi china mataimana; kateokha kakhui mi chila mavātmana."
Ningkachot eina Titusli Chihovā
16Nathumwui vang ina khami ningkachot ngaraikachā chi Tituswui alungli sangmi ithumwui Avāli ningshisa. 17Ana ithumwui kapo chi samngaroka maningla, kha akhalatta ningkachot meikapa jilaga, akhalattawui ningkachāng eina nathumwuili vāhaira. 18Ali ngasoda, awui paokaphāwui otsakwui vang church saikorana sochikat khami ivānao chi ithumna chihovai. 19Chimāng maningmana, kha Proho khalattawui tekhamatei khavai kala ithumwui ningkachot chitheikhavai, ithumna sākasā hi mavātlak lemmet ithum ngasoda vākhavai churchbingnala ali kapangkhui. 20Ithumna sākasā hi mavātlak lemmetwui pongli khipākhana ithumli khayon malei khavai, hikathā khangarān sāra; 21kaja kaphā otna kaji, Prohowui mangāli maningla, kha mibingwui mangālila, sākhavai hi ithumwui ningrinna. 22Athumli ngasoda ithumwui ivānao chi chihovai; ali ra̱ra̱ tamyang khami kala kachungkhali ningmazingda kahai theihaira, kala ara nathumli awui ning khanganung kahakva̱wui vang lāngmeikhārda ningmazinga. 23Titusva iwui ot sākhangaruma, kala nathumwui vang iwui otsakruma akhana. Ithumwui ivānaobing chiya churchbingwui paomebing, kala Khristawui tekhamateina. 24Chiwui vang eina, churchbingwui mangāli, nathumwui leikashiwui shākhi kala nathumwui maramli ithumwui lāngso chi athumli achitheilu.
