2 Corinthnao 11

11 ¹Iwui eina mangkhama̱ teokha nathumna hengsangmiranu da ina ningchānga. Kala kachangkhat eina nathumna ili hengsangda lei. ²Ithumwui Avāwui yuikashi eina ina nathumwui vang yuikashi; kaja Khristali kachingva̱ tharzā kahai sāda chigat khavai, gahara akhali nathumli khangashit sāhaira. ³Kha phara̱na awui mareimarā eina Eveli minam ngasakhai thāda, nathumwui ning chi Khristawui vang tharzā kala kathar dharmarin chiwui eina shimān ngasakhaipaishina da ina ngachee. ⁴Kachikathā akhana rālaga ithumna hāshokhaira Jishu maningla khangatei Jishu hāshoklala, lah nathumna samphangpai manglā maningla khangatei manglā samphanglala, lah nathumna khuisangpai paokaphā maningla khangatei paokaphā khuisanglala, nathumna kaphā thada hengsangda lei. ⁵Chithālala ina kahaka paokazatbing chili teokha mareimeimana da ina shānkhui. ⁶Ina tui matui khavaili makhui thālala, awor chi makhui maningmana; hi ithumna otsak saikorali, apong saikoralila nathumli chitheihaira.

⁷Lah nathumli khāngkakā khavai ina ikhalatta hamsangchaoluishitwui vang morei sāla? Kaja ithumwui Avāwui paokaphā chi nathumli khikha mapola hāshokhaira. ⁸Nathumli otram ngatha̱ khavai khangatei churchbingwui eina ngachon khuida athumli namkazā sāhaira. ⁹Nathumwuili leilakha kala kachā leilakha, ina khipālikha machot ngasakpaimana; kaja Macedoniawui ivānaobingna iwui kachā chi ngarānmi. Ina apong saikorali nathumli machot ngasak khavai ikhalatta horhaira, kala chithāda sāchingra. ¹⁰Khristawui khamashung ili leiwui vang, Achaiawui ngaleibingli hi langkaso chi masa̱haomimara. ¹¹Khisāda chithada sāli? Nathumli ina maleishimana kaji vangla? Ina leishiya kaji chi ithumwui Avāna thei!

¹²Kala athumna langsoi otbingli ithum thāda shānkhui khavai atam kachā ningchāngbingwui apong chi katat khavai, ina kasā chi sāchingra. ¹³Kaja hi mibing chi kakapik paokazatbing, mikhanam ot kasābing, Khristawui paokazat thada akhalatta azak ngacheikhuibingna. ¹⁴Kala hi matakhak kahai maningmana, kaja Satanna khalatta kahorwui kazingrao thada azak ngacheikhui. ¹⁵Chieina awui raobingnala khamashung khangarongwui rao thada azak ngacheikhui hi matakhak kahai maningmana. Athumwui khanao chi athumwui otsak athishurda sāra.

Mangkhama̱ akhawui kakhanang langkaso

¹⁶Ina latluida hāngna, khipānakha ili mangkhama̱na da maphaningaranu. Kha nathumna chithāda phaningakha, inala teokha langso khavai mangkhama̱ mi thada ili khuisanglu. ¹⁷Hi thaklāk langkasowui alungli ina matui chi, Prohona matui thāda maningmana, kha mangkhama̱ akhana matui thāda hāngna. ¹⁸Kaja mi kachungkhana okathuiwui ningphanin eina langsoi jilaga, ila langsora. ¹⁹Kaja nathum thangkhameibing haklak jilaga, mangkhama̱bingli khamathān eina hengsanga! ²⁰Kachikathāna nathumli raonao sāakha, kachikathāna nathumli shaikanakha, kachikathāna nathumwui eina tongkazā samphangakha, kachikathāna akhalattali khāngmathotakha, kachikathāna nathumwui mai shaoakha, nathumna hengsanga. ²¹Ina hi iwui maishi eina hāngna: ithumva chiwui vang ngazan haklaka. Kha kachikathāna langso khavai akhashilikha, ina tākam eina akhashira; ina mangma̱lak eina hāngna. ²²Athum Hebrewnaobingla? Ila Hebrewnaona. Israelnaobingla? Ila Israelnaona. Abrahamwui naomayarabingla? Ila Abrahamwui naomayarana. ²³Athum Khristawui raobingla? Ina kapā mi thāda hāngna. Ina lāng haklaka: ot kasā lāng haklak, phātop kazang lāng haklak, kashao mashānrarmana, kala kathili ra̱ra̱ nganaihaira. ²⁴Ina Jihudibingwui pāngli lijei hangmatili akha kateowa phangā shida samphanga. ^a a v24 Jihudiwui ainna lijei hangmati tāshunga shao mayāsai; ainna mayā tāshunga chi machihuilak eina malāng ngasak khavai, hangmatili akha kateo lijei shao khangachāna. ²⁵Kathum shida lijei eina shaokahaina, akha shida lunggui eina horthatkahaina, kathum shida tara̱li phong ngasāhaira; ngayā akha ngashun akha ina kathukali apisanga. ²⁶Atam kachida ram vāchinga: kongwui eina kalākashi, khangaponabingwui eina kalākashi, iwui miyurwui eina kalākashi, Gentilebingwui eina kalākashi, keinungli kalākashi, lamhāngli kalākashi, tara̱li kalākashi, minam avānaobing alungli kalākashi; ²⁷ot kasā eina kachotkachāngli, ngayā kachungkha makapida, kathai eina ra̱kachangli, ra̱ra̱ kashakazā maleila, khamakui eina ka̱lā kashili ina leihaira.

²⁸Ot saikora hi mazangla, thangthangwui otsakna ili ritlak eina shirena. Chi church saikorawui vang malungkharingna. ²⁹Khipā ngazanhaokhala, kala ina mangazanmana? Khipāli ningkhamaong ngasakhaokhala, kala ina malungkhavātna mapemmara?

³⁰Ina langso samikahaiakha, iwui ngazan chitheimi otbingwui vang langsora. ³¹Ina makapikmana kaji chi ithumwui Proho Jishuwui Avā, mashimānda kasokahai ithumwui Avāna thei. ³²Damascusli, Awunga Aretaswui governorna ili tukkhui khavai keinung chiwui khamayona sai, ³³kha phākholi khalei charfa akha eina, ili sopkai akhali sanglaga chihotāhaowa, kala awui pāng eina nganaishokhaowa.