Riibeetap Pergeiyatap Kristo
Kaanyooru kaneetik che ng'oorei Paulo che kuuree kayooktoinik che lemeenik Korintoik, kingo onei kagoochinoik ak koyachi icheek ng'wony. Kingo yae ineendet perberyo, kosiri poisyoniikyik: koboorweet, ng'emeetap meli, rubeet, ng'oiyondit ne po kotugul, ak nyigiisindo ne po kotugul agobo kanisook. Ngo nyolu kong'et, ko kong'etei agobo nyalildanyi.
11 1Katamache ale omuit perberyo ne ming'in ne abunu anee—ak iman omuitwa. 2Aamin ng'etkong' agobo okweek eng' ng'etkong'utyetap Kwandanyo, amu ki agosyinok ak muren agenge, si amut okweek ko uu chepto ne tiliil eng' Kristo. 3Ago aiywei ale, ko uu ye ki koberber ndaret Hawa eng' ng'aalseennyi, si ma kong'emak mindilileeng'wong' eng' muguleldo ne po iman ak ne tiliil ne po Kristo. 4Amu ngo nyo chii ak koamde Jeso age ne ma ne ki keamde acheek, anan onam sabeet age ne teer ak ne ki onam, anan logoiywek alak che teer ak che ki ocham, ko omuit komyee. 5Ago abwaati ale ma aa ne ming'in agine kosiir ofisyonik chooto che oo miising'. 6Agot nganda ma ang'oomen eng' ng'aleek, ago ma aa ne ma ng'oomen eng' ng'omnateet; ki kiboorunok niito eng' ortinwek tugul, eng' tuguuk tugul.
7Anan ka ayai tengekto eng' aitu anee kei, si otogoste okweek, amu ki aamwok logoiywek che po Kwandanyo ne ma kialdawo kiy? 8Ki arebee churook alak eng' anam toreteet eng' icheek, si apoisiin okweek. 9Ye ki ami kobootok ak atinye mogornateet, ki ma aiimin chii age—amu tupchosyek che ki punu Makedonia ko ki koonu che ki abetwa. Ki ariipkei si ma aiiminok eng' kiy age tugul, ak ayai kogeny ko uu nooto. 10Amu mi imandap Kristo eng' anee, ma kisilem loskeitani eng' komoswegap Akaia. 11Amune? Amu ma achame okweek? Ingen Kwandanyo ale achame okweek!
12Ak kiy ne ayaei, ayaei kogeny, si atil poroindo ne po icheek che mache poroindo si kiit keele yamegei ak acheek eng' tuguuk che loskeigei agobo. 13Amu pichu ko ofisyonik che lembenik, poisyonik che berberenik, che walgei koek ofisyonigap Kristo. 14Ak ma po kwang'utyet, amu agot Setani kowalgei koek angeetap lapkeiyet. 15Ma po kwang'utyet ne oo anyun, ye walgei otwogikyik agine koek otwogigap imanda. Egu leennywa ko uu yautosyekwak.
Loskeitetap Chii ne Abusat agobo Nyalilda
16Amwae kogeny ale, mogeiit chii age keele abusat anee. Ago ngo oyaei nooto, onam anee ko uu abusat, si aloskei agine anee ne ming'in. 17Kiy ne amwae eng' loskeitani ne po kimnateet, ma amwae ko uu ye mwaei Kiptaiyat, ago ko uu abusat. 18Amu loskeigei piik che chaang' ko uu kweanetap chiito, aloskei agine anee. 19Amu omuit piik che perber eng' boiboiyet, amu oo okweek utaatiin miising'! 20Omuit ngo egunok chii otwogik, ngo amok chii, ngo nam chii tuguuguk, ngo toroorsegei chii parak, ngo rabaachin chii matang'wong'. 21Amwae niito eng' teweernatennyu: ki kinyaluli acheek eng' nooto. Ago kiy age tugul ne ng'at chii koloskei—amwae eng' perberyo—ang'at agine anee. 22Tos Hebranik icheek? Aa agine anee. Tos piigap Israel icheek? Aa agine anee. Tos iyoteetap Abraham? Aa agine anee. 23Tos otwogigap Kristo? Ang'alaal ko uu chii ne mong'en metit—aa ne siirei: eng' labotik che chaang' kosiir, eng' kabetanet che chaang', eng' pirutik che ma kikwean, ak kakila ami neegit ak meet. 24Kolda muut ki anam eng' Yahudik pirutik artam che minutik agenge. a a v24 Ki chamchi ng'atuutyetap Yahudiik pirutik agoi artam; ki kigoonjin sosom ak sokol si ma kesiir koiteetap ng'atuutyet eng' ma anyiny. 25Kolda somok ki kibir eng' keendogik, kolda agenge ki kibir koik, kolda somok ki kong'emak meliit; ki atebi kemoi agenge ak peet agenge eng' ole loo peek. 26Awendi kila: eng' ng'wanindap ainoosyek, eng' ng'wanindap rebiik, eng' ng'wanindo ne punu piikyuk, eng' ng'wanindo ne punu Pororyosyek, eng' ng'wanindo ne mi nganaseet, eng' ng'wanindo ne mi surkwen, eng' ng'wanindo ne mi arooset, eng' ng'wanindo ne mi kwenutap tupcho che lembenik; 27eng' labotik ak nyalilda, eng' kemousyek che chaang' che ma anuuiyo, eng' rubeet ak melelda, kakila ma mi amitwogik, eng' kaitityet ak aach ngorit.
28Kobatee tuguuk tugul alak, weigei anee peet age tugul kaimutyet: kaimutyet agobo churook tugul. 29Ng'oo ne nyaluli, ak ma anyaluli anee? Ng'oo ne tach, ak ma anereech kot eng' anee?
30Ngo nyolu aloskei, aloskei agobo tuguuk che booru nyalulnatennyu. 31Ingen Kwandanyo, Kwandap Kiptaiyandennyo Jeso, ne beruurot agoi koigeny, ale ma alemda anee. 32Eng' Damasko, ki riip pounindetap laitoryat Areta nganaseet si konam anee, 33ago ki kiituutwo eng' kibunda eng' karichok ne mi loget, ak achililye eunek.