ንመርዓት ክርስቶስ ምሕላው

ተቐናቐንቲ መምህራን፥ ጳውሎስ ሓሳውያን ሃዋርያት ዝብሎም፥ ዋጋ እናሓተትዎምን ብሕሱም እናሓዝዎምን ንቆሮንቶሳውያን ማሪኾምዎም። ዓሻ መሲሉ ኸዓ ታሪኹ ይዝርዝር፦ መግረፍቲ፥ ስብረት መርከብ፥ ጥሜት፥ ዘይቋርፅ ሓደጋ፥ ዕለታዊ ጭንቀት ምእንቲ ኣብያተ ክርስትያን። ክምካሕ እንተ ኣለዎ፥ ብድኻሙ ይምካሕ።

ምዕራፍ 11።

ሒደት ዕሽነተይ እንተ ትዕገሱለይ ፅቡቕ ነይሩ፤ እወ ኸዓ ትዕገሱለይ ኢኹም። ብቕንኣት ኣቦና እቐንኣልኩም ኣለኹ፤ ንሓደ ሰብኣይ ሓፂየኩም፥ ንፅህቲ ድንግል ጌረ ንክርስቶስ ከቕርበኩም እየ እሞ። ግና ከምቲ እቲ ተመን ብተንኰል ንሄዋን ዘስሓታ፥ ኣእምሮኹም ካብቲ ንክርስቶስ ዘለኩም ቅኑዕን ንፁህን ተወፋይነት ከይበላሾ እፈርሕ ኣለኹ። ሓደ ሰብ መፂኡ ካብቲ ንሕና ዝሰበኽናዮ ካልእ ኢየሱስ እንተ ሰበኸ፥ ወይ ካብቲ ዝተቐበልኩሞ ዝተፈለየ መንፈስ እንተ ተቐበልኩም፥ ወይ ካብቲ ዝተቐበልኩሞ ዝተፈለየ ወንጌል እንተ ተቐበልኩም፥ ፅቡቕ ጌርኩም ትዕገሱ ኢኹም። ኮይኑ ግና ካብቶም “ዓበይቲ ሃዋርያት” ሓደኳ ከም ዘይንእስ እቘፅር ኣለኹ። ብዘረባ ሞያ ዘይብለይ እኳ እንተ ኾንኩ፥ ብፍልጠት ግና ሞያ ዘይብለይ ኣይኮንኩን፤ እዙይ ከዓ ብዅሉ መገድን ብዅሉ ነገርን ገሊፅናልኩም ኢና።

ወይ ነፃ ወንጌል ኣቦና ስለ ዝሰበኽኩልኩም፥ ንስኻትኩም ክትለዓሉ ኢለ ንርእሰይ ብምትሕታተይ ሓጢኣት ድየ ገይረ? ንኣኻትኩም ከገልግል ኢለ፥ ካብ ካልኦት ኣብያተ ክርስትያናት ደገፍ ብምቕባል ዘመትኩወን። ምሳኻትኩም እንተለኹ ምስ ፀገምኩ ድማ ንሓደኳ ኣየኸበድኩን፤ እቶም ካብ መቄዶንያ ዝመፁ ኣሕዋት ነቲ ዝጐደለኒ ሃቡኒ። ብዝኾነ መገዲ ኸየኸብደኩም ንርእሰይ ሓለኹ፤ ደጊምውን ከምኡ ክገብር እየ። ሓቂ ክርስቶስ ኣባይ ስለ ዘሎ፥ እዝ ትምክሕተይ እዙይ ኣብ ከባቢ ኣካይያ ዝዓግቶ የለን። ስለምንታይ? ስለ ዘየፍቅረኩም ድየ? ከም ዘፍቅረኩምስ ኣቦና ይፈልጥ እዩ!

እቲ ዝገብሮ ዘለኹ ኸዓ ክገብሮ እየ፤ ነቶም በቲ ዝምክሕሉ ነገር ከማና ኽቍፀሩ ምችዊ ጊዜ ዝደልዩ፥ ምችዊ ጊዜኦም ንምቍራፅ። እዚኣቶም ሓሳውያን ሃዋርያት፥ ጠለምቲ ሰራሕተኛታት፥ ርእሶም ከም ሃዋርያት ክርስቶስ ዘመስሉ እዮም እሞ። እዙይ ከዓ ዘደንቕ ኣይኮነን፤ ሰይጣን ባዕሉ ርእሱ ኸም መልኣኽ ብርሃን የመስል እዩ እሞ። ስለዙይ ኣገልገልቱውን ርእሶም ከም ኣገልገልቲ ፅድቂ እንተ ኣመሰሉ ዘገርም ኣይኮነን። መወዳእታኦም ከም ግብሮም ክኸውን እዩ።

ትምክሕቲ ዓሻ ብዛዕባ መከራ

ከም ብሓድሽ እብል ኣለኹ፥ ሓደኳ ዓሻ ኣይምሰሎ። እንተ ኾይኑ ግና፥ ኣነውን ቅሩብ ክምካሕ ምእንቲ፥ ንኣይ ከም ዓሻ ተቐበሉ። እዝ ብትብዓት ዝመልኦ ትምክሕተይ ዝዛረቦ ዘለኹ፥ ከም ጐይታ ዘይኮነ፥ ከም ዓሻ ደኣ እየ ዝዛረቦ ዘለኹ። ብዙሓት ብስጋ ስለ ዝምክሑ፥ ኣነውን ክምካሕ እየ። ንስኻትኩም ለባማት ስለ ዝኾንኩም፥ ንዓሻታት ብፍቓድኩም ትዕገስዎም ኢኹም እሞ! ሓደ ሰብ ባርያ እንተ ገበረኩም፥ ሓደ ሰብ እንተ በልዐኩም፥ ሓደ ሰብ እንተ መዝመዘኩም፥ ሓደ ሰብ ርእሱ እንተ ኣዕበየ፥ ሓደ ሰብ ገፅኩም እንተ ፀፍዐኩም፥ ትዕገሱ ኢኹም። እዙይ ንውርደተይ እብሎ ኣለኹ፦ ንሕናስ ነዙይ ኣዝዩ ደኺምና ኢና። ዝኾነ ሰብ ክምካሕ ዝደፍረሉ ግና፥ ከም ዓሻ እየ ዝዛረብ ዘለኹ፥ ኣነውን እድፍሮ እየ። ዕብራውያን ድዮም? ኣነውን እየ። እስራኤላውያን ድዮም? ኣነውን እየ። ዘርኢ ኣብርሃም ድዮም? ኣነውን እየ። ኣገልገልቲ ክርስቶስ ድዮም? ከም ዕቡድ እየ ዝዛረብ—ኣነ ዝበለፀ እየ፤ ብዝበዝሐ ጻዕሪ፥ ብዝበዝሐ ማእሰርቲ፥ ካብ መጠን ንላዕሊ ብመውቃዕቲ፥ ብዙሕ ጊዜ ኸዓ ናብ ሞት ቀሪበ። ካብ ኣይሁድ ሓሙሽተ ጊዜ፥ ካብ ኣርብዓ ሓደ ዝጐደሎ መግረፍቲ ተቐበልኩ። ^a ሰለስተ ጊዜ ብበትሪ ተገረፍኩ፥ ሓደ ጊዜ ብእምኒ ተወጊረ፥ ሰለስተ ጊዜ መርከበይ ተሰብረ፤ ሓደ ለይትን መዓልትን ኣብ ዕምቈት ባሕሪ ኣሕለፍኩ። ኵልሻዕ ኣብ ጉዕዞ፤ ብሓደጋ ወሓይዝ፥ ብሓደጋ ጐሓሉት፥ ብሓደጋ ካብ ወገነይ፥ ብሓደጋ ካብ ኣህዛብ፥ ብሓደጋ ኣብ ከተማ፥ ብሓደጋ ኣብ በረኻ፥ ብሓደጋ ኣብ ባሕሪ፥ ብሓደጋ ኣብ ማእኸል ሓሳውያን ኣሕዋት፤ ብድኻምን ፃዕርን፥ ብዙሕ ጊዜ ብዘይ ድቃስ ብምሕዳር፥ ብጥሜትን ብፅምእን፥ ብዙሕ ጊዜ ብዘይ ምግቢ፥ ብዛሕልን ብዕርቃንን።

ካብዝ ኵሉ ብተወሳኺ ድማ፥ መዓልታዊ ፂቕታ ይኽብደኒ ኣሎ፦ ንዅለን ኣብያተ ክርስትያናት ዘለኒ ጭንቀት። ዝደክም መን እዩ፥ ኣነ ድማ ዘይደክም? ዝዕንቀፍ መን እዩ፥ ኣነ ድማ ብቝጥዓ ዘይነድድ?

ክምካሕ ዝግብአኒ እንተ ኾይኑ፥ በቲ ድኻመይ ዘርኢ ነገር ክምካሕ እየ። ኣቦና፥ ኣቦ ጐይታና ኢየሱስ፥ ንሱ ንዘለኣለም ቡሩኽ ዝኾነ፥ ከም ዘይሕሱ ይፈልጥ እዩ። ኣብ ደማስቆ፥ ሹም ንጉስ ኣሬጣስ ክሕዘኒ ኢሉ ነታ ኸተማ ይሕልዋ ነበረ፤ ብመስኮት መንደቕ ግና ብመሶብ ተወረድኩ፤ ካብ ኢዱውን ኣምለጥኩ።