2 Kọrinti 11

11 ¹Èmi fẹ́ kí ẹ fàyè gba ìwà òmùgọ̀ díẹ̀ lọ́wọ́ mi—ẹ sì ń fàyè gbà mí nítòótọ́. ²Mo ń jowú lórí yín pẹ̀lú owú Baba wa, nítorí mo ti bá yín dána sí ọkọ kan ṣoṣo, kí n lè mú yín wá gẹ́gẹ́ bí wúńdíá mímọ́ fún Kristi. ³Ṣùgbọ́n ẹ̀rù ń bà mí pé, gẹ́gẹ́ bí ejò ti tan Efa jẹ nípa àrékérekè rẹ̀, kí ọkàn yín má ṣe díbàjẹ́ kúrò nínú ìfọkànsìn tòótọ́ àti mímọ́ sí Kristi. ⁴Nítorí bí ẹnìkan bá wá tí ó sì ń wàásù Jesu mìíràn yàtọ̀ sí èyí tí àwa wàásù, tàbí tí ẹ gba ẹ̀mí mìíràn yàtọ̀ sí èyí tí ẹ gbà, tàbí ìhìnrere mìíràn yàtọ̀ sí èyí tí ẹ tẹ́wọ́gbà, ẹ fàyè gbà á dáadáa. ⁵Síbẹ̀ mo rò pé èmi kò rẹlẹ̀ rárá sí àwọn “àpọ́sítélì ńlá-ńlá” wọ̀nyẹn. ⁶Bí ó tilẹ̀ jẹ́ pé n kò ní ìmọ̀ ọ̀rọ̀ sísọ, èmi kì í ṣe aláìní ìmọ̀; a ti fi èyí hàn yín kedere ní ọ̀nà gbogbo, nínú ohun gbogbo.

⁷Tàbí mo ha dẹ́ṣẹ̀ bí mo ti rẹ ara mi sílẹ̀ kí a lè gbé yín ga, nígbà tí mo wàásù ìhìnrere Baba wa fún yín lọ́fẹ̀ẹ́? ⁸Mo kó àwọn ìjọ mìíràn ní ẹrù nípa gbígba ìrànlọ́wọ́ lọ́wọ́ wọn kí n lè sìn yín. ⁹Nígbà tí mo wà pẹ̀lú yín tí àìní sì ń bá mi, n kò di ẹrù lọ́rùn ẹnikẹ́ni—àwọn arákùnrin láti Makedóníà ni ó pèsè ohun tí ó bù kù fún mi. Mo pa ara mi mọ́ kúrò nínú dídi ẹrù lọ́rùn yín ní ọ̀nàkọ̀nà, èmi yóò sì máa ṣe bẹ́ẹ̀. ¹⁰Bí òtítọ́ Kristi ti ń bẹ nínú mi, ìfọ́nnu yìí kì yóò dákẹ́ ní àwọn agbègbè Akaia. ¹¹Èéṣe? Nítorí pé èmi kò fẹ́ràn yín ni bí? Baba wa mọ̀ pé mo fẹ́ràn yín!

¹²Ohun tí mo sì ń ṣe ni èmi yóò máa ṣe lọ, kí n lè gé àǹfààní kúrò lọ́wọ́ àwọn tí ń fẹ́ àǹfààní láti kà wọ́n sí ẹni tí ó bá wa dọ́gba nínú àwọn ohun tí wọ́n ń fọ́nnu lé lórí. ¹³Nítorí àwọn ènìyàn wọ̀nyí jẹ́ àpọ́sítélì èké, òṣìṣẹ́ ẹ̀tàn, tí wọ́n ń pa ara wọn dà bí àpọ́sítélì Kristi. ¹⁴Kò sì ya ni lẹ́nu, nítorí Satani pàápàá ń pa ara rẹ̀ dà bí angẹli ìmọ́lẹ̀. ¹⁵Nítorí náà kò ya ni lẹ́nu pé àwọn ìránṣẹ́ rẹ̀ pẹ̀lú ń pa ara wọn dà bí ìránṣẹ́ òdodo. Òpin wọn yóò rí gẹ́gẹ́ bí iṣẹ́ wọn.

Ìfọ́nnu Òmùgọ̀ Nípa Ìjìyà

¹⁶Mo tún wí pé, kí ẹnikẹ́ni má ṣe kà mí sí òmùgọ̀. Ṣùgbọ́n bí ẹ bá ṣe bẹ́ẹ̀, ẹ gbà mí gẹ́gẹ́ bí òmùgọ̀, kí èmi pẹ̀lú lè fọ́nnu díẹ̀. ¹⁷Ohun tí mo wí nínú ìfọ́nnu onígbọ̀ngbọ̀n yìí, kì í ṣe bí Olúwa ti ì bá wí ni mo wí i, bí kò ṣe bí òmùgọ̀. ¹⁸Bí ọ̀pọ̀lọpọ̀ ti ń fọ́nnu gẹ́gẹ́ bí òṣùwọ̀n ènìyàn, èmi pẹ̀lú yóò fọ́nnu. ¹⁹Nítorí ẹ fi inú dídùn fàyè gba àwọn òmùgọ̀, bí ẹ ti gbọ́n tó bẹ́ẹ̀! ²⁰Ẹ fàyè gbà á bí ẹnìkan bá sọ yín di ẹrú, bí ẹnìkan bá jẹ yín run, bí ẹnìkan bá rẹ́ yín jẹ, bí ẹnìkan bá gbé ara rẹ̀ ga, bí ẹnìkan bá gbá yín lójú. ²¹Mo wí èyí fún ìtìjú ara mi: àwa jẹ́ aláìlágbára jù fún nǹkan bẹ́ẹ̀. Ṣùgbọ́n ohunkóhun tí ẹnikẹ́ni bá ní ìgboyà láti fọ́nnu lé lórí—mo ń sọ̀rọ̀ bí òmùgọ̀—èmi pẹ̀lú ní ìgboyà. ²²Hébérù ni wọ́n bí? Bẹ́ẹ̀ ni èmi náà. Ọmọ Israẹli ni wọ́n bí? Bẹ́ẹ̀ ni èmi náà. Irú-ọmọ Abrahamu ni wọ́n bí? Bẹ́ẹ̀ ni èmi náà. ²³Ìránṣẹ́ Kristi ni wọ́n bí? Mo ń sọ̀rọ̀ bí òmùgọ̀ wèrè—èmi sì jù bẹ́ẹ̀ lọ: pẹ̀lú iṣẹ́ àṣekára tí ó pọ̀ jù, ìfisẹ́wọ̀n tí ó pọ̀ jù, nínà tí kò níye, àti ní ọ̀pọ̀ ìgbà ní àtàtà ikú. ²⁴Nígbà márùn-ún ni mo gba pàṣán ogójì dín ọ̀kan lọ́wọ́ àwọn Júù. ^a a v24 Òfin àwọn Júù gba ààyè fún pàṣán tí ó tó ogójì; ọkàndínlógójì ni wọ́n ń nà kí wọ́n má baà kọjá ààlà òfin lọ́nà àìròtẹ́lẹ̀. ²⁵Nígbà mẹ́ta ni wọ́n fi ọ̀pá nà mí, nígbà kan ni wọ́n sọ mí ní òkúta, nígbà mẹ́ta ni ọkọ̀ ojú omi mi rì; ọjọ́ kan àti òru kan ni mo lò nínú ibú omi. ²⁶Mo máa ń rìnrìn àjò nígbà gbogbo: nínú ewu odò, nínú ewu àwọn ọlọ́ṣà, nínú ewu láti ọwọ́ àwọn ènìyàn mi, nínú ewu láti ọwọ́ àwọn Kèfèrí, nínú ewu ní ìlú, nínú ewu ní aginjù, nínú ewu ní òkun, nínú ewu láàrin àwọn arákùnrin èké; ²⁷nínú làálàá àti ìnira, nínú ọ̀pọ̀ òru àìsùn, nínú ebi àti òǹgbẹ, ní ọ̀pọ̀ ìgbà láìjẹun, nínú òtútù àti ìhòòhò.

²⁸Yàtọ̀ sí gbogbo rẹ̀, ìdààmú ojoojúmọ́ ń pa mí lára: àníyàn fún gbogbo àwọn ìjọ. ²⁹Ta ni ó jẹ́ aláìlágbára, tí èmi kò sì jẹ́ aláìlágbára? Ta ni a mú kọsẹ̀, tí inú mi kò sì gbiná pẹ̀lú ìbínú?

³⁰Bí ó bá yẹ kí n fọ́nnu, èmi yóò fọ́nnu nípa àwọn ohun tí ó fi àìlera mi hàn. ³¹Baba wa, Baba Olúwa wa Jesu, ẹni ìbùkún títí láéláé, mọ̀ pé èmi kò purọ́. ³²Ní Damasku, gómìnà abẹ́ Aretasi ọba ṣọ́ ìlú náà láti mú mi, ³³ṣùgbọ́n nínú apẹ̀rẹ̀ ni a sọ̀ mí kalẹ̀ gba ojú fèrèsé kan lára odi, mo sì bọ́ lọ́wọ́ rẹ̀.