Pholu wuzonzila lulendu luna kámuheka Tata
Bana bisi mufunda bisi zimbula ni mikanda myandi myenina yi ngolu, kaasi tangwa kenina ha mesu kenina konda ngolu amana ndinga yandi yisi tala kima ku. Pholu wuzimbudi ni binwaninu byandi byisiku bya kimutu, wábwisa mpaka ya bakwenu ya kudilengila bawu-meni, amana wázinga muna kisalu kina kámuhekila Tata wetu.
10 1Meni, Pholu, meni-meni, yiluheka kikesa muna buweti yi talala ya Kidisitu—meni wuna wa dikulumuna ku mesu menu, kaasi tangwa yisiku lutala, wena yi kikesa kwena benu. 2Yikululomba ni, tangwa yikála yenu, yakalaku yi mfunu wa kusongila kikesa—muna kikumbwala kina mbati banza kusadila kwena bana bisi banza ni twisi dyatila hanga batu ba kimutu. 3Mukuma, ata twisi zinga mu lutu, twanwanaku mvita hanga batu ba kimutu. 4Mukuma, binwaninu byetu bya mvita byisiku bya kimutu, kaasi byenina yi ngolu muna Tata wetu mu kumwanga makaka ma ngolu. 5Tumwanga lengu ndinga yi kima kyosu kya lulendu kina kibati tombuka mu kakidila nzayilu ya Tata wetu, amana tubonga mabanza moosu hanga bakwa boloku mu kulemvukila Kidisitu. 6Amana twenina bakubama mu kuheka ndola kwena kosu dyambu dya kukolama, tangwa bulemvu bwenu bwalunga.
7Lwisi tala mambu mu mbunzu. Yuka ni mutu wisi kwikila ni yandi wenina wa Kidisitu, kabanza hika dyadi: hanga yandi wenina wa Kidisitu, bwabuna phi betu. 8Mukuma, ata yiditsikisa fyoti kuluta mu lulendu luna kátuheka Pfumu—mu kutunga benu, ka mu kubwisa benu ku—yiyúkaku tsoni. 9Yizodiku ni yimonika hanga yisi sanda mu kusya benu bweya ni mikanda myama. 10Mukuma, bisi zimbula: «Mikanda myandi myenina mya nzitu yi mya ngolu, kaasi tangwa kena yandu, kena wazoka, amana ndinga zandi zisiku kala yi mupfunu.» 11Mutu wa mutindu wuna kabakisa ni: mana tuzimbudini mu mukanda tangwa twisiku lutala, mawu tukasala tangwa twakála yenu.
12Twalendaku kuditanga holo kudifwanikisa yi bana bisi kuditsikisa bawu meni. Mu kuditesa bawu yi bawu meni, mu kudifwanikisa bawu yi bawu meni, basongilaku ngangu. 13Kaasi, twaditsikisaku ku kuluta tendu, kaka muna kitesu kya kinzunga kina kátukabila Tata wetu—kitesu kina kibati tula nana kwena benu. 14Twalutaku tendu, hanga ni twatulaku kwena benu, mukuma betu twákala batheti mu kutula nana kwena benu ni Musamu wa Bukheti wa Kidisitu. 15Twaditsikisaku ku kuluta tendu mu bisalu bya bakhaka, kaasi twenina yi kivuvu ni, bwosu lukwikilu lwenu lwisi kula, kinzunga kyetu hakati dya benu kyakula lawu, 16ndangu tusamuna Musamu wa Bukheti muna binzunga bina byenina ku thwala ya benu, konda kuditsikisa mu kisalu kyamana salama mu kinzunga kya mutu wahika. 17Kaasi, «Yambula mukwa kuditsikisa kasya kuditsikisa kwandi mwena Tata wetu.» a a v17 Pholu wisi tanga mambu ma mbikudi Yelemiya, kuna wuna wisi fwana mu kuditsikisila yandi wenina Nzambi wa bulunda, wuna wisi kuditela khumbu ya Tata. Bwabuna, kuditsikisa kwa kyedika kwisi tuka mwena betu meni ku, kaasi mwena yandi. 18Mukuma, ka wuna wisi kuditsikisa yandi meni ku wuna wisi tambwasama, kaasi wuna Tata wetu kisi tambwasa.
