پولوس د پلار نه ورکړے شوے اِختيار دفاع کوى

د هغه نيوکه کوونکي وايي چې ليکونه يې زورور دي خو په حضور کې بې اغېزې دی او خبرې يې هېڅ ارزښت نه لري. پولوس ځواب ورکوي چې د هغه وسلې انساني نه دي، د سيالانو هغه لوبه ردوي چې ځانونه په ځانونو اندازه کوي، او د هغې ساحې دننه پاتې کېږي چې زموږ پلار ورته ټاکلې ده.

څپرکی 10.

زۀ پولوس پخپله د مسيح د نرمى او حلم په وسيله تاسو ته عرض کوم، زۀ هغه څوک چې مخامخ تاسو سره عاجز يم، خو د تاسو نه ليرې چې يم نو په تاسو باندې جُرأت کوم. زۀ منت کوم چې کله زۀ حاضر يم، نو ضرورت دې نۀ وى چې جُرأت وکړم، هغه حوصله چې زۀ يې د هغه کسانو په خلاف استعمالول غواړم کوم چې ګومان کوى چې مونږ د اِنسانى معيارونو مطابق ژوند کوو. ځکه کۀ څۀ هم مونږ په جسم کښې ژوند کوو، خو د اِنسانى معيارونو مطابق جنګ نۀ کوو. ځکه زمونږ د جنګ وسلې صرف اِنسانى نۀ دى، بلکې د زمونږ پلار په وسيله د قلعو د ړنګولو دپاره قوتناکې دى. مونږ دليلونه او هر هغه مغروره شے چې د زمونږ پلار د پوهې په خلاف اوچتيږى ړنګوو، او هر خيال د مسيح د اطاعت دپاره قېدى کوو. او کله چې ستاسو اطاعت پوره شى، نو مونږ د هرې نافرمانۍ د سزا ورکولو دپاره تيار يُو.

تاسو شيونو ته د ظاهرى بڼې په لحاظ ګورئ. کۀ څوک پدې يقين لرى چې هغه د مسيح دے، نو هغه دې دا بيا په فکر کښې وساتى چې څنګه هغه د مسيح دے، هم هغه شان مونږ هم يُو. ځکه کۀ زۀ د هغه اِختيار په حقله لږ څۀ زيات هم فخر وکړم چې مالِک مونږ ته راکړو، چې تاسو جوړ کړو، نۀ چې تاسو ړنګ کړو، نو زۀ به شرمنده نۀ شم. زۀ نۀ غواړم چې داسې ښکاره شم چې ګنى زۀ تاسو په خپلو خطونو باندې وېرول غواړم. ځکه هغوئ وائى چې، ”د هغۀ خطونه وزنى او قوتناک دى، خو په حاضرۍ کښې هغه کمزورے دے او د هغۀ تقرير هيڅ ارزښت نۀ لرى.“ داسې کس دې پوه شى چې، څۀ چې مونږ په خط کښې د نۀ موجودۍ په وخت کښې وايو، هم هغه به مونږ د حاضرۍ په وخت کښې وکړو.

مونږ دا جُرأت نۀ کوو چې ځان د هغه کسانو سره شمار يا مقابله کړو چې د ځان تعريف کوى. هغوئ خپل ځان د خپل ځان په معيار نَاپى او خپل ځان د خپل ځان سره مقابله کوى، نو هغوئ هيڅ پوهه نۀ ښايى. خو مونږ به د حد نه زيات فخر ونۀ کړو، بلکې صرف د هغه دائرې د اندازې په حد کښې چې زمونږ پلار مونږ ته مقرره کړه، هغه اندازه چې تاسو ته هم رسيږى. مونږ د خپل حد نه نۀ تيريږو، ګنى چې مونږ تاسو ته نۀ وُو رسيدلى، ځکه مونږ اول کسان وُو چې د مسيح د اِنجيل سره تر تاسو پورې ورسيدلو. مونږ د نورو کسانو په محنتونو کښې د حد نه زيات فخر نۀ کوو، خو اُميد لرو چې لکه څنګه ستاسو ايمان زياتيږى، هم هغه شان به زمونږ دائره ستاسو په مينځ کښې ډېره پراخه شى، دې دپاره چې مونږ ستاسو د سرحد نه ها خوا په علاقو کښې د اِنجيل منادى وکړو، او د هغه کار په حقله فخر ونۀ کړو چې د چا بل په علاقه کښې مخکښې شوے وى. خو، ”چې څوک فخر کوى، هغه دې د زمونږ پلار په حقله فخر وکړى.“ ^a ځکه هغه څوک چې د خپل ځان تعريف کوى هغه مقبول نۀ وى، بلکې هغه څوک چې زمونږ پلار يې تعريف کوى.