Phaawulos aangoo Abbaan isaaf kenne in ittisa

Warri isa qeeqan xalayoonni isaa jabaa dha, garuu fuula duratti inni dadhabaa dha, dubbiin isaas homaa hin fakkaatu jedhu. Phaawuloos meeshaan waraana isaa kan namaa akka hin taane deebisa; tapha warra isa morman kan ofiin of safaranii dida, daangaa Abbaan keenya isaaf kenne keessattis tura.

Boqonnaa 10.

Ani Phaawulos ofumaan, garraamummaa fi laafina Kristositiin isin nan kadhadha—ani yeroon isin bira jiru fuulaa fuulatti gad of qaba, yeroon isin irraa fagaadhu garuu isin irratti jabaadha. Yeroon isin bira jiru, amanamummaa nuti akka fedhii namaatti jiraannu jedhanii yaadan irratti itti fayyadamuuf yaadu sanaan jabaachuun akka na hin barbaachifne isin nan kadhadha. Nuti foon keessa jiraanne illee, akka fedhii namaatti waraana hin lolu. Meeshaan lola keenyaa kan namaa qofa osoo hin ta'in, Abbaa keenya biraa kan humna qabuu fi dallaa jabaa diiguuf ta'e dha. Falmii fi of-tuulummaa beekumsa Abbaa keenyaatiin ol ka'e hundumaa in diignee, yaada hundumaa booji'anii Kristosiif in ajajamsiifna. Ajajamuun keessan erga guutameen booda, ajajamuu diduu hundumaa adabuuf qophaa'oo dha.

Isin waan mul'atutti in ilaaltu. Namni tokko akka inni kan Kristos ta'e yoo amane, inni kan Kristos ta'e akkuma ta'ee, nuti illee akkasuma ta'uu keenya deebi'ee haa yaadu. Waan aangoo Gooftaan isin ijaaruuf malee isin diiguuf nuuf kenne ilaalchisee yoon xiqqoo caalaa of jaja illee, ani hin qaanaa'u. Ani xalayaa kootiin isin sodaachisuuf yaaluu fakkaachuu hin barbaadu. Sababii isaan «Xalayaan isaa ulfaataa fi jabaa dha, garuu fuulaa fuulatti yeroo ta'u inni dadhabaa dha, dubbiin isaas homaa hin ta'u» jedhaniif. Namni akkasii kana haa beeku: waan nuti yeroo isin biratti hin jirre xalayaadhaan dubbannu, yeroo isin bira jirru in goona.

Nuti warra ofii isaanii leellisan keessaa tokko tokkoo wajjin of lakkaa'uu yookaan of wal bira qabuuf hin ija jabaannu. Isaan ofii isaaniitiin of safaranii, ofii isaanii wajjin of wal bira qabuudhaan hubannaa hin qaban. Nuti garuu daangaa ol of hin jajnu; safartuu naannoo Abbaan keenya nuuf murteesse keessa qofa of janna—safartuun sun isin bira iyyuu in ga'a. Nuti akka isin bira hin ga'iniitti daangaa hin cabsinu; sababii nuti wangeela Kristos qabannee isin bira hanga ga'utti warra duraa taaneef. Nuti dadhabbii warra biraa irratti daangaa ol of hin jajnu, garuu amantiin keessan yeroo guddatu naannoon keenya isin gidduutti baay'ee akka bal'atu abdii qabna, akka nuti naannoo isin gara fuullee jiru keessatti wangeela lallabnuuf, hojii naannoo namni biraa keessatti duraan hojjetame irratti of hin jajnuuf. Garuu «inni of jaju Abbaa keenya keessatti haa of jaju.» ^a Namni ofii isaa leellisu miti kan fudhatama, kan Abbaan keenya leellisu malee.