Kü Chempen Lang Ki dogo Ngei Ngeakei
Jobei Mühghaüei ngo shedtikei hoba lubü pendou wapan apbei dogo lauda: haoeibü ngüma la saoei mangsenda, jaisi shuongei hao achühda, shousi shuongei hao makda. Haoei kü sembung laanga tetan phola ngümthungda. Kheijinei maimai tükde che lanlangda, kü leilubou langkei ki hoba ngei kü ik loloei Mühghaü hapla dogo.
19 1Hobaje Jobei jongaikei, 2“Kanei lalokche sühko kü soushou mautiko, hoba ngühei ngo shemtilabü? 3Ho anei kanei ngo himoutikei; ngo shemtila kanei ihimouyoko ki. 4Hoba ngei maimaitham shed shonalonga, kü shedbü kü yoa thonan ki. 5Maimaitham kanei ngo thüka kan lolo yaangenalonga, hoba kü himou ngo khulimbo aukabü shanga jungeialonga, 6Kheijinei Mühghaüei ngo shedtikei, hoba haoei jembü tak kü kaijembo khinkukei dogo ngeashi. 7Ngei, ‘Shieikoe!’ dogo ngekda, lausikei kü to ajongaida; ngei thuibü shanga ngekda, lausikei matjem aying. a a v7 Shangiednyu ‘Shieikoe!’ dogo ngaibü kho ngühmai shanga mütshuong thedanga ngaibü che kikei — müt atei no khulimbo amaibü kümbü shanga thuila ngaibü dogo shenbü kikei. 8Haoei kü lam banyu thangetkei, khünei ngei paila athük, hoba haoei kü lamnyua nakthüh phokukei. 9Haoei kü soneikangbü kü ka sungkei, hoba kü khu ka khun taketkei. 10Haoei kü la pendou aenei ngo tuongtikei, hoba ngo mauakei; haoei kü maangpon bunyu tegü pheian apbei. 11Haoei ngo khulimbo jembü maangshat wanlongtikei, hoba ngo jembü dangbou tegü weeida. 12Haoeibü sepai tan liko meimeida; haoenei ngo khulimbo kao ongenda, hoba kü neichem kaijembo shaida. 13Haoei kü jaisinasi shuong ngo ka saabü phokukei, hoba ngo shenbü shuong ngo ka aeibou yenbou yeikei. 14Kü chempen shuongei ngo bangakei, hoba kü nyangbü lepbü shuongei ngo makei. 15Kü chema kibü yensi shuong hoba kü samnyu shuongei ngo yenbou tegü weeikei; haoen nyeka ngo küksithang yeia. 16Ngei kü sambü to ngada, lausikei haoei ajongaida; ngei kü mütpemei hao to sukujakuda. 17Kü hak kü yak to nyaülüm hida, hoba kü jembü jaisinasi shuong to ngo nyaülüm hida. 18Khei younak chilang shuongeikei ngo nyikuda; ngo pijinei, haoenei ngo khulimbo joyoda. 19Kü nyangbü jenabou pendouei ngo mangsenda, hoba ngei sanoubü shuongei ngo khulimbo sepeikei. 20Kü lo kü khon hoba kü phe to senetakei, hoba ngo kü hauh khonei ong satenkei. 21Ngo to onoushi, ngo to onoushi, kü jenabou shuong, aishanga Mühghaü ikei ngo to ngümbei! 22Kan aila Mühghaü tegü ngo shieida, hoba kü phe to ladangkei asenyühshemda? 23Kü ngüh doan phokua yingma! Khübü kho le chenei doan phokua yingma! 24nam peisilei hoba sishaiei laanga ponpen shanga thüngenan dokei yingma! 25Aishanga kü Chempen lang ki dogo ngei ngekei, hoba thon chalou ka haoei thamngu thüka lolabü. b b v25 Kayangbü dan lubü lubü ka Jobei Mühghaü nyangbü aying tegü ong laukei; lausikei hanei kaangkhühtham nyen che thangetakei: ‘kü Chempen,’ aoei hao to jembü dogo lapbou. Khrista mütshuongei ho ngüh kho seneibü Bou Jisua thükenbü shaangbü maanglembü dogo shangied ditkei, aoei jembü shousi shuong shanga ngühmai lela thon chalou ka lolabü. 26Hoba kü khon mautian phaia, khei yingasikei kü phea ngei Mühghaü haplabü, 27Aoei to ngo lolo haplabü, hoba kü lolo nyekei hao to chühlabü, lubü müt aying. Kü maangpon ngo yoa semthetkei! 28Kanei, ‘Künei Job lai shijung haula!’ hoba, ‘Ho ngühbü li hao yoa hapbei,’ dogo lalaje, 29kanei in to hatjan, aishanga maangshatei in kayang sungbakulabü, khei kanei matjembü che kia dogo ngelabü.”
