Me basika na mukanda
Dibuku

Asafe ke bokila na kati ya kitombe

Samu na mfumu ya musiku; na mutindu ya Yedutune. Nkunga ya Asafe.

Asafi lenda lala pongi ve mpe lenda tuba ve, mpe yandi ke yufula mambu yina bantu ke vwandaka na boma ya kuyufula: keti luzolo ya Tata ya yandi me manisa, keti yandi me zimbana na kulemvokila? Ata kima mosi ke soba ve, kaka kubambuka moyo ya yandi. Na luzolo ya yandi mosi, yandi ke bambuka mubu moyo, kisika nzila vwandaka ya tsyelika mpe bidimbu ya makulu vwandaka ya kutalana ve.

Kapu 77.

Mu ke bokila Tata ya beto na ndinga ngolo; ndinga ya munu ke nanguka na Tata ya beto, samu ti yandi kuwa munu. Na kilumbu ya mpasi ya munu, mu sosaka Mfumu Tata; na mpimpa, diboko ya munu vwandaka ya kulambula mpe yawu lembaka ve; mwela ya munu mangaka na kuzwa mbombolo. Mu ke bambuka Tata ya beto moyo, mpe mu ke na kukunga; mu ke yindula, mpe mpeve ya munu ke lemba.

Nge simbaka meso ya munu ya kufunguka; mu vwandaka na ntima mpasi mpe mu lendaka kutuba ve. Mu talaka bilumbu ya ntama, bamvula yina lutaka ntama. Mu bambukaka mukunga ya munu moyo na mpimpa; mu yindulaka na ntima ya munu, mpe mpeve ya munu sosaka: «Keti Mfumu Tata ke losa beto samu na seko, mpe yandi ke sadila dyaka beto bumbote ve ata fyoti? Keti luzolo ya yandi me manisa samu na seko? Keti nsilulu ya yandi me suka samu na bambandu na bambandu? Keti Tata ya beto me zimbana na kulemvokila? Keti na makasi yandi me yimina kyadi ya yandi?»

Na yina, mu tubaka: «Yayi ni kubondila ya munu: bamvula ya diboko ya kitata ya Nzambi ya Zulu-Nyonso.» a a v10 Kubondila yango ke tadila bamvula yina lutaka, ntangu diboko ya ngolo ya Nzambi ya Zulu-Nyonso salaka na ngolo nyonso samu na bantu ya yandi. Mu ke bambuka mavanga ya Tata ya beto moyo; ee, mu ke bambuka bimangu ya nge ya ntama moyo. Mu ke yindula bisalu ya nge nyonso, mpe mu ke tala mavanga ya nge ya ngolo. Nzila ya nge, Tata ya beto, kele ya longo. Nzambi nki kele nene mutindu Tata ya beto? Nge kele Tata ya beto yina ke salaka bimangu; nge me zabisa ngolo ya nge na kati ya makanda. Na diboko ya nge, nge kuulaka bantu ya nge, bana ya Yakobi mpe ya Yosefi.

Maza talaka nge, Tata ya beto; maza talaka nge mpe yawu tekitaka; ya tsyelika, mabulu ya nda ya maza tekitaka. Matuti nokisaka maza; mazulu wakisaka bidumu; madyonga ya nge kyenzulaka na balweka nyonso. Muningu ya bidumu ya nge wakanaka na kati ya kimbongila; balusyemo ya nge kyenzulaka yinza; ntoto tekitaka mpe ninganaka. Nzila ya nge lutaka na kati ya mbu, nzila ya nge na kati ya maza ya nene; kasi bidimbu ya makulu ya nge talanaka ve. Nge twadisaka bantu ya nge mutindu kibuka ya mameme, na diboko ya Moyize mpe ya Aloni.