መዝሙር 77

77 ¹ወደ አባታችን በታላቅ ድምፅ እጮኻለሁ፤ እርሱ ይሰማኝ ዘንድ ድምፄ ወደ አባታችን ከፍ ይላል። ²በመከራዬ ቀን ጌታ አባታችንን ፈለግሁ፤ በሌሊት እጄ ተዘርግታ አልታከተችም፤ ነፍሴም መጽናናትን እምቢ አለች። ³አባታችንን አስባለሁ፣ አቃስታለሁም፤ አሰላስላለሁ፣ መንፈሴም ይደክማል።

⁴የዐይኔን ሽፋሽፍት ገልጠህ ያዝህ፤ ተጨንቄም መናገር አልቻልሁም። ⁵ጥንት የነበሩትን ዘመናት፣ ከብዙ ጊዜ በፊት ያለፉትንም ዓመታት አሰብሁ። ⁶በሌሊት መዝሙሬን አስታወስሁ፤ በልቤም አሰላሰልሁ፣ መንፈሴም እንዲህ ሲል መረመረ፦ ⁷“ጌታ አባታችን ለዘላለም ይጥላልን፣ ዳግመኛም ሞገስን አያሳይምን? ⁸የኪዳኑ ፍቅር ለዘላለም አብቅቶአልን? የገባው ቃልስ ለትውልድ ሁሉ አልቆአልን? ⁹አባታችን ሞገስ ማድረግን ረስቶአልን? በቍጣውስ ርኅራኄውን ከልክሎአልን?”

¹⁰ከዚያም እንዲህ አልሁ፤ “ልመናዬ ይህ ነው፦ የልዑል ቀኝ እጅ ዓመታት።” ^a a v10 ልመናው ልዑል በኀያል እጁ ለሕዝቡ በኀይል ይሠራ ወደ ነበረባቸው ያለፉት ዓመታት ነው። ¹¹የአባታችንን ሥራ አስባለሁ፤ አዎን፣ የጥንቱን ተኣምራትህን አስታውሳለሁ። ¹²ሥራህን ሁሉ አሰላስላለሁ፣ ኀያል ሥራዎችህንም አስተነትናለሁ። ¹³አባታችን ሆይ፣ መንገድህ ቅዱስ ነው። እንደ አባታችን ታላቅ የሆነ አምላክ ማን ነው? ¹⁴ተኣምራትን የምታደርግ አባታችን አንተ ነህ፤ ኀይልህን በሕዝቦች መካከል ገለጥህ። ¹⁵በክንድህ ሕዝብህን ተቤዠህ፣ የያዕቆብንና የዮሴፍን ልጆች።

¹⁶አባታችን ሆይ፣ ውሃዎች አዩህ፤ ውሃዎች አዩህ ተጨነቁም፤ በእውነት፣ ጥልቆች ተንቀጠቀጡ። ¹⁷ደመናት ውሃ አፈሰሱ፤ ሰማያት በነጐድጓድ አስተጋቡ፤ ፍላጾችህ በየአቅጣጫው ተብለጨለጩ። ¹⁸የነጐድጓድህ ድምፅ በዐውሎ ነፋስ ውስጥ አስተጋባ፤ መብረቆችህ ዓለምን አበሩ፤ ምድር ተንቀጠቀጠች ተናወጠችም። ¹⁹መንገድህ በባሕር ውስጥ ነበር፣ ፈለግህም በታላላቅ ውሃዎች ውስጥ ነበር፤ ነገር ግን የእግርህ ፋና አልታየም። ²⁰ሕዝብህን በሙሴና በአሮን እጅ እንደ መንጋ መራህ።