Laa 77

77 ¹Ina ithumwui Avāli panglāk eina ngakaowa; ana ili shāmi khavai, iwui akhon ithumwui Avāli kāshunga. ²Iwui kakhanang zimiksholi ina Avā Proholi phā; ngayā iwui pāng katingshokta lei, kala ngachāng mathāhaimana; imanglāna ringphā phā khavai mamayāmana. ³Ina ithumwui Avāli phaningunga, kala ina ringngādalei; ina machuka, kala imanglā vānhaowa.

⁴Nana iwui imikphung sholak eina singmi; I wukkhananga, kala matuishap mamang. ⁵Ina achālakhawui zimiksho, thuikahai atamwui zingkumbing chi machukkhui. ⁶Ngayāli ina iwui laa phaningunga; ining eina machuka, kala imanglāna phākashok: ⁷"Avā Prohona mashimānla horhaora, kala latluida ngahānkhangai masāluimara? ⁸Awui makhangachei leikashi mashimānla ngasāmhairalā? Awui tuingashit thot saikorali kānhairalā? ⁹Ithumwui Avāna lumashanmi khavai malaihairalā? Ana malungvāt eina awui lukhamashan khuithuihaorala?"

¹⁰Chieina ina hānga, "Juikhamataiwui yāpangwui zingkumbing chi iwui kapona." ^a a v10 Kapo hi thuikahai zingkumbing, Juikhamataiwui pāngthei khareina awui mibingwui vang pangshap eina ot sāmi atamli sāna. ¹¹Ina ithumwui Avāwui otsak phaningungra; mha, thuikahai nawui matakhak kahai otbing ina phaningungra. ¹²Ina nawui ot saikorali machukra, kala nawui pangshap otsakbing chi yangkhuira. ¹³Nawui apong, ithumwui Avā, katharana. Ithumwui Avā thāda hakta vare khipā leikhala? ¹⁴Nava matakhak kahai ot sāme ithumwui Avāna; nana yurbingwui alungli nawui pangshap theingasakhaira. ¹⁵Nawui pāngthei eina nawui mibing, Jacob eina Josephwui naomayarabingli ngatangkhuihaira.

¹⁶Tara̱na nali theihaira, O ithumwui Avā; tara̱na nali theida reoranga; mha, kathukabing nganuka. ¹⁷Muiyāna tara̱ rotāmira; kazingna khangashum eina hākashok; nawui malāthingbing peichaoda kaprorra. ¹⁸Nawui khangashumkhon sur alungli matuishoka; nawui rikhānbingna okathui horngasaka; okathui kathirda nganuka. ¹⁹Nawui shongfa ngayi kānvai, nawui apong hakkhamahā tara̱ kānvai; chithalala nawui achonmāngbing matheimana. ²⁰Nana nawui mibingli Moses eina Aaronwui pāng eina yao ashangva̱ thāda thānzata.