Asafi Wukalunga mu Phipha
Kikuma kya mutwadisi wa bayimbidi; bwosu bwena Yedutuni. Mukunga wa Asafi.
Azafi kalendaku leka keti zonza, amana wisi yuvula mana batu bisi mona bweya mu kuyuvula: lungongu lwa Tata wandi lwásuka? Wázimbakana bu kasóngila mamboti ma bukheti? Heku kima kisi soba kaasi mbambukulu yandi. Mu luzolu wisi yubuka yanga, kuna nzila yákala ya kyedika amana bitambi byákala bisi monama ku.
77 1Yikalunga mu ndinga ya ngolu kwena Tata wetu; ndinga yama yitelama kwena Tata wetu, hanga kanyuka. 2Muna tangwa dya phasi zama yásanda Pfumu Tata; muna phipha koku dyama dyátandumuka amana kadilembwaku; moya wama wábusila kubongila kikesa. 3Yiyubuka Tata wetu, amana yihuma; yimedina, amana kitembu kyama kilembama.
4Wásimba mesu mama hanga makala mákanguka; yákala yangalakanu amana yálembwa kuzonza. 5Yabánza bilumbu bya thama, mimvu mina myáluta thama. 6Yáyubuka mukunga wama muna phipha; yámedina ni mbundu yama, amana kitembu kyama kyásanda: 7«Pfumu Tata kabúsila mvula yi mvula, amana kakasóngilaku hika mamboti? 8Lungongu lwandi lwa bulunda lwásuka mvula yi mvula? Lusilu lwandi lwásukisa kwena makula moosu? 9Tata wetu wázimbakana kuheka khenda? Muna khabu wákanga kyadi kyandi?»
10Buna yázimbula: «Dyadi dyenina kilombu kyama: mimvu mya koku dya kitata dya Wuna Lutini Boosu.» a a v10 Kilombu kyenina mu mimvu myaluta, mu tangwa dina koku dya ngolu dya Wuna Lutini Boosu dyásala ngolu kikuma kya kikanda kyandi. 11Yikayubuka mihangu mya Tata wetu; eeh, yikayubuka bithondu byaku bya thama. 12Yikamedina mu bisalu byaku byosu, amana yikabanza mihangu myaku mya ngolu. 13Nzila yaku, A Tata wetu, yenina yatoma. Nzambi mbi wenina mbuta hanga Tata wetu? 14Ngeyi wenina Tata wetu wuna wisi hanga bithondu; wásengumuna ngolu zaku hana kati dya bikanda. 15Ni koku dyaku wáhulula kikanda kyaku, bana ba Yakobi yi Yozefu.
16Mamba mámona ngeyi, A Tata wetu; mamba mámona ngeyi amana mátekita; kyedika, vunda dya mamba dyáningana. 17Matuti mátyakisa mamba; mazilu máyukalakana ni ndinga ya mubandanu; biphunza byaku byákyenzuka homa hosu. 18Ndinga ya mubandanu waku yáyukalakana muna kivunzi; mitsyenzya myaku myákyenzula tsi; tsi yátekita amana yáningana. 19Nzila yaku yákala muna yanga, kitambu kyaku muna mamba ma mbuta; kaasi bitambi byaku byámonikaku. 20Wáthwala kikanda kyaku hanga kibuka kya mikoku, ni koku dya Moyize yi Loni.
