Zaburi 77

77 ¹Ninamlilia Baba yetu kwa sauti kuu; sauti yangu inapaa kwa Baba yetu, ili anisikie. ²Siku ya taabu yangu nalimtafuta Baba Mwenyezi; usiku mkono wangu ulinyoshwa wala haukuchoka; nafsi yangu ilikataa kufarijiwa. ³Ninamkumbuka Baba yetu, nami naugua; natafakari, na roho yangu inazimia.

⁴Uliyashika macho yangu yasifumbe; nilifadhaika nisiweze kusema. ⁵Nilizitafakari siku za zamani, miaka ya enzi za kale. ⁶Niliukumbuka wimbo wangu wakati wa usiku; nalitafakari moyoni mwangu, na roho yangu ikachunguza: ⁷"Je, Baba Mwenyezi atatukataa milele, wala hatapendezwa nasi tena kamwe? ⁸Je, upendo wake wa agano umekoma milele? Je, ahadi yake imefikia mwisho kwa vizazi vyote? ⁹Je, Baba yetu amesahau kuwa na neema? Je, kwa hasira amezuia huruma zake?"

¹⁰Ndipo niliposema, "Haya ndiyo maombi yangu: miaka ya mkono wa kuume wa Aliye Juu." ^a a v10 Maombi haya yanaelekezwa kwa miaka iliyopita ambapo mkono wenye nguvu wa Aliye Juu ulitenda kwa uweza kwa ajili ya watu wake. ¹¹Nitayakumbuka matendo ya Baba yetu; naam, nitayakumbuka maajabu yako ya zamani. ¹²Nitatafakari kazi zako zote, na kuyaangalia matendo yako makuu. ¹³Njia yako, Baba yetu, ni takatifu. Ni mungu yupi aliye mkuu kama Baba yetu? ¹⁴Wewe ndiwe Baba yetu utendaye maajabu; umedhihirisha nguvu zako kati ya mataifa. ¹⁵Kwa mkono wako uliwakomboa watu wako, wana wa Yakobo na Yusufu.

¹⁶Maji yalikuona, Baba yetu; maji yalikuona yakatetemeka; naam, vilindi vikatikisika. ¹⁷Mawingu yalimwaga maji; anga zikatoa sauti ya radi; mishale yako ikametameta pande zote. ¹⁸Sauti ya radi yako ilivuma katika kimbunga; umeme wako uliangaza dunia; nchi ikatetemeka na kutikisika. ¹⁹Njia yako ilikuwa baharini, mapito yako katika maji makuu; lakini nyayo zako hazikuonekana. ²⁰Uliwaongoza watu wako kama kundi la kondoo kwa mkono wa Musa na Haruni.