Asaph andhar te jor pora mate
Sangit cholai kora manuh karne; Jeduthun laga niyom hisab te. Asaph laga ekta Zabur.
Asaph huti bole aru kotha kobole napare, aru manuh khan sodai sudhibole bhoi kora kotha sudhe: tai laga Pitri laga morom khotom hoi jaise naki, Tai daya kora pahori jaise naki? Kisu bhi nobodli, khali tai laga yaad. Tai jani-buji kene samundar ke yaad kore, jun jaga te rasta hosa thakise aru theng laga chinu khan dikha napai.
77 1Moi amar Pitri ke jor pora matise; moi laga awaj amar Pitri logot te uthi jai, Tar pora moi ke huni bole. 2Moi laga dukh laga din te moi Mohan Pitri ke bisarise; rati te moi laga hath pasari thakise aru tanta huwa nai; moi laga atma shanti pabole mana korise. 3Moi amar Pitri ke yaad kore, aru moi hahakar kore; moi bhabona kore, aru moi laga atma komjur hoi jai.
4Apuni moi laga suku-pata khuli kene rakhise; moi dukh paise aru kotha kobo para nai. 5Moi age laga din khan ke bhabise, bisi age jai juwa saal khan ke. 6Moi laga git ke moi yaad korise rati te; moi laga mon pora bhabona korise, aru moi laga atma pora bisarise: 7“Mohan Pitri pora hodai karne phelai dibo naki, aru aru kitia bhi daya nadikhabo naki? 8Tar laga vachan laga morom hodai nimite khotom hoi jaise naki? Tar laga diya kotha sob jamana khan karne khotom hoi jaise naki? 9Amar Pitri pora anugrah kori bole pahori jaise naki? Tar pora khong te Tar laga morom bondh kori rakhise naki?”
10Tetiya moi koise, “Eitu moi laga anurodh ase: Sob se Mohan Ekjon laga dyna hath laga saal khan.” a a v10 Anurodh tu age laga saal khan karne ase jitia Sob se Mohan Ekjon laga shakti thaka hath pora Tar laga manuh khan karne shakti pora kaam korise. 11Moi amar Pitri laga kaam khan ke yaad koribo; hoi, moi Apuni laga age laga ascharya kaam khan ke yaad koribo. 12Moi Apuni laga sob kaam uporte bhabona koribo, aru Apuni laga shakti thaka kaam khan ke bhabi sabo. 13Apuni laga rasta, amar Pitri, pobitro ase. Kun dyota amar Pitri nisena dangor ase? 14Apuni ascharya kaam kora amar Pitri ase; Apuni jati khan majot te Apuni laga shakti ke janai dise. 15Apuni laga hath pora Apuni laga manuh khan ke udhar korise, Jacob aru Joseph laga bacha khan ke.
16Pani khan pora Apuni ke dikhise, amar Pitri; pani khan pora Apuni ke dikhi kene kapi uthise; hosa pora, gobhir pani khan kapi uthise. 17Badal khan pora pani ulai dise; akash te megh gorji uthise; Apuni laga tir khan sob phale te chamkise. 18Apuni laga megh gorjon laga awaj bhuramri hawa majot te ghumise; Apuni laga bijli pora prithibi ke ujala kori dise; prithibi kapi kene hili jaise. 19Apuni laga rasta samundar majot pora thakise, Apuni laga rasta dangor pani khan majot pora thakise; kintu Apuni laga theng laga chihna dikha nai. 20Apuni laga manuh khan ke mer laga jhak nisena cholai loi jaise Moses aru Aaron laga hath pora.