Asafe Akhuwa Mu Cidima
Kwa nyakutsogolera wa nyimbo; mwakubverana na Yedhutuni. Nyimbo ya Asafe.
Asafi asakhonda kugona peno kulonga, mbabvunza cinthu cinagopa anthu kawiri-kawiri kubvunza: kodi ufuni wa Baba wace wamala? Kodi aduwala kubvera ntsisi? Mulibe cinthu cinasanduka kunja kwa makumbukidwe ace. Iye asakumbuka mwakufuna nyanza, pidakhala njira yandimomwene mbwenye minyalo yace nkhaioneka.
77 1Ndisakhuwa mwakugaluza kuna Baba wathu; fala yanga isakwira kuna Baba wathu, toera Iye andibvesere. 2Pa ntsiku ya nyatwa yanga ndidasaka Baba Wankulu; namasiku nkono wanga ukhatambalala mbukhonda kuneta; moyo wanga walamba kubalangazwa. 3Ndisakumbuka Baba wathu, mbandibuula; ndisanyerezera, nzimu wanga usafewa.
4Imwe mwakhondesa maukope anga kufunga; ndakhala wakutsukwala mbandikhonda kukwanisa kulonga. 5Ndanyerezera ntsiku zakale, pyaka pidapita kalekale. 6Ndakumbuka nyimbo yanga namasiku; ndanyerezera na ntima wanga, nzimu wanga wasaka: 7“Kodi Baba Wankulu anatiramba kwenda na kwenda, cipo anatipangiza pontho kukoma ntima? 8Kodi kufuna kwace kwa cibverano kwamala kwenda na kwenda? Kodi pikiro yace yamala kwa mibadwo yonsene? 9Kodi Baba wathu ayebwa kukhala wakukoma ntima? Kodi mu ukali wace afungira ntsisi zace?”
10Penepo ndalonga: “Ici ndico cikumbiro canga: pyaka pya nkono wamadyo wa Wankulu Kwene Kwene.” a a v10 Cikumbiro ciri kuna pyaka pidapita, n'dzidzi udaphata basa mwamphambvu nkono wamphambvu wa Wankulu Kwene Kwene thangwi ya mbumba yace. 11Ndinakumbuka macitiro a Baba wathu; inde, ndinakumbuka pyakudzumatirisa pyanu pyakale. 12Ndinanyerezera mabasa anu onsene, mbandidinga macitiro anu amphambvu. 13Njira yanu, Baba wathu, ndi yakucena. Mbani mulungu wankulu ninga Baba wathu? 14Imwe ndimwe Baba wathu anacita pyakudzumatirisa; mwadziwisa mphambvu zanu pakati pa madzindza. 15Na nkono wanu mwaomba mbumba yanu, ana a Yakobe na Zuze.
16Madzi akuwonani, Baba wathu; madzi akuwonani mbanjenjemera; inde, madzi akuzika atetemera. 17Makole agwisa madzi; kudzulu kwabveka na mabingu; miseu yanu yagalima konsene kwene. 18Mbvumo wa mabingu anu wabveka mu condzi; mphezi zanu zaceresa dziko yonsene; dziko yatetemera mbitekenyeka. 19Njira yanu ikhapita mu bara, njira yanu mu madzi makulu; mbwenye miendo yanu nee yawoneka. 20Mwatsogolera mbumba yanu ninga nkumbi wa mabira, na nkono wa Mose na Aroni.
