Wadziwika mu Yuda
Kwa ntsogoleri wa anyakuimba: na pyakuimbira pya nyungwe. Salmo ya Azafi, nyimbo.
Nkhondo yamala kale pinatoma salmo. Ku Salemi miseu, pyakudzikhotcerera na supada pyagona pyakuphwanyika, anyankhondo agona, akavalo agona mwakudodoma. Cinthu cikulu nkhabe luso la Izarayeli, mbwenye kuti Baba wathu alamuka toera kupulumusa akupfulika a dziko.
76 1Baba wathu ndi wakudziwika mu Yuda; mu Izarayeli dzina yace ndi ikulu. 2Tenti yace iri mu Salemi, mbuto yace yakukhala iri mu Siyoni. a a v2 Salemi ndi dzina yakale ya Yerusalemi — nzinda ule Baba wathu adasankhula toera kukhalamo. 3Penepo iye aphwanya miseu yakuyetimira, xango na supada na pyombo pya nkhondo.
4Imwe ndimwe akuyetima, akulemedzeka kupita mapiri a pyakuphatwa. 5Anyankhondo akuwanga kakamwe apokwa pyakufunda pyawo; andzimira mu kugona kwawo; nkhabe m'bodzi wa anyankhondo adakwanisa kulamusa manja ace. 6Mu kusandika kwanu, Mulungu wa Yakobe, ngolo na kavalo pyonsene pyagona pyakudzumatirwa. 7Imwe, ndimwe wakuti musafunika kugopwa! Mbani anakwanisa kulimira pamaso panu ukali wanu ungalamuka? 8Kubulukira kudzulu imwe mwalonga ciyeruzo; dziko yagopa mbikhala dete, 9pidalamuka Baba wathu toera kuyeruza, toera kupulumusa onsene akucepeseka a pa dziko yapantsi.
10Mwandimomwene ukali wa anthu unadzakusimbani, imwe munadzabvala pyakusala pyace. b b v10 Maseze ukali wa anthu kuna Mulungu, pakumalisira usabweresa mbiri kuna iye — iye asabvala ukali wawo ninga cidzindikiro ca kupembera. 11Citani mapiciro anu kuna Baba wanu mbamukwanirisa; onsene ali n'khundu mwace mbabwerese miyoni kuna ule anafunika kugopwa, 12ule anagwanda nzimu wa atongi, ule anagopwa na amambo a pa dziko yapantsi.
