መዝሙር 77 FHB Father's Heart Bible™

77 ¹ድምፀይ ዓው ኣቢለ ናብ ኣቦና እጠርዕ፤ ክሰምዐኒ ድማ ድምፀይ ናብ ኣቦና ይዓርግ። ²ብመዓልቲ መከራይ ንጐይታ ኣቦ ደለኽዎ፤ ብለይቲ ኢደይ ተዘርጊሓ ኣይደከመትን፤ ነፍሰይ ክትፅናናዕ ኣበየት። ³ንኣቦና እዝክሮ እሞ እግዕር፤ አስተንትኖ ኣለኹ እሞ መንፈሰይ ይደክም።

⁴ንቆብ ኣዒንተይ ክፉት ገበርካ፤ ተሸቢረ ኽዛረብ ከዓ ኣይከኣልኩን። ⁵ነተን ናይ ጥንቲ መዓልቲታት ሓሰብኩ፥ ነተን ካብ ነዊሕ ዝሓለፈ ዓመታት። ⁶ንመዝሙረይ ዘከርኩ ኣብ ለይቲ፤ ብልበይ አስተንተንኩ፥ መንፈሰይ ከዓ መርመሮ፦ ⁷“ጐይታ ኣቦ ንዘለኣለም ዶ ይድርቢ፥ ደጊምከ ፀጋ ኣየርእን ድዩ? ⁸ምሕረቱ ንዘለኣለም ተወዲኡ ድዩ? ተስፋኡ ንዅሉ ወለዶ ኣብቂዑ ድዩ? ⁹ኣቦና ፀጋ ምግባር ረሲዑ ድዩ? ብቝጥዓ ርህራሄኡ ኸልኢዑ ድዩ?”

¹⁰ሽዑ ድማ “እዝ ልማኖይ እዩ፦ እተን ናይ የማናይ ኢድ እቲ ልዑል ዓመታት” በልኩ። ^a a v10 እቲ ልማኖ ናብተን ሓያል ኢድ እቲ ልዑል ንህዝቡ ብሓይሊ ዝሰርሓለን ዝሓለፋ ዓመታት እዩ። ¹¹ንግብርታት ኣቦና ኽዝክር እየ፤ እወ፥ ነቲ ናይ ጥንቲ ተኣምራትካ ኽዝክር እየ። ¹²ንዅሉ ግብርኻ ኸስተንትኖ እየ፤ ንሓያል ግብርታትካውን ክሓስቦ እየ። ¹³ኦ ኣቦና፥ መንገድኻ ቅዱስ እዩ። ከም ኣቦና ዓብዪ ኣምላኽ ዳኣ መን ኣሎ? ¹⁴ንስኻ ተኣምራት እትገብር ኣቦና ኢኻ፤ ሓይልኻ ኣብ ማእኸል ኣህዛብ ኣፍለጥካ። ¹⁵ብቕልፅምካ ንህዝብኻ ተቤዘኻዮም፥ ንደቂ ያእቆብን ዮሴፍን።

¹⁶ኦ ኣቦና፥ እቲ ማያት ረአየካ፤ እቲ ማያት ረአየካ እሞ ተጨነቐ፤ እቲ መዓሙቕ ድማ ብሓቂ ኣንቀጥቀጠ። ¹⁷እቲ ደመና ማይ ኣፍሰሰ፤ ሰማያት ነጐድጓድ ኣስምዐ፤ ፍላፃታትካ ናብ ኵሉ ወገን በረቑ። ¹⁸ድምፂ ነጐድጓድካ ብንፋስ ኣውሎ ተሰምዐ፤ መባርቕትኻ ንዓለም ኣብርሆ፤ ምድሪ ተናወፀትን ኣንቀጥቀጠትን። ¹⁹መንገድኻ ብባሕሪ እዩ ነይሩ፥ መገድኻ ድማ ብዓብዪ ማያት፤ ኣሰር እግርኻ ግና ኣይተራእየን። ²⁰ንህዝብኻ ኸም መጓሰ መራሕኻዮም ብኢድ ሙሴን ኣሮንን።