Nna Ahụghị Ikwesị Ntụkwasị Obi

Chọgharịanụ Jerusalem maka otu onye eziokwu, ka Nna anyị kwuru, a ga-ahapụkwa obodo ahụ. Ọ dịghị onye a chọtara — ọ bụghị n'etiti ndị ogbenye, ọ bụghị n'etiti ndị ndú. Ndị amụma na-agha ụgha, ndị nchụàjà na-achị maka onwe ha, ndị mmadụ ka mma ya otú ahụ. Isi ahụ na-ejedebe n'ajụjụ a hapụrụ oghe.

Isi 5.

“Gagharienụ nʼokporo ámá niile nke Jerusalem, lee ugbu a ma mara ihe! Nyochaanụ ama ya niile—ọ bụrụ na unu ga-achọta otu onye, otu onye nke na-eme ihe ziri ezi ma na-achọ eziokwu, mgbe ahụ aga m agbaghara ya. Ọbụladị mgbe ha na-asị, ‘Dịka Nna anyị na-adị ndụ,’ ha na-aṅụ iyi ụgha.”

Nna anyị, ọ bụ na anya gị adịghị achọ ikwesị ntụkwasị obi? Ị tiri ha ihe, ma ha enweghị mgbu ọ bụla; ị repịara ha, ma ha jụrụ ịnara ndụmọdụ. Ha mere ka ihu ha sie ike karịa nkume; ha jụrụ ịlọghachi azụ. Mgbe ahụ, asịrị m, ‘Ndị a bụ naanị ndị ogbenye; ha dị nzuzu, nʼihi na ha amaghị ụzọ nke Nna anyị, ụzọ ziri ezi nke Nna ha.’ Aga m ejekwuru ndị ukwu ma gwa ha okwu, nʼihi na ha maara nʼezie ụzọ nke Nna anyị, ụzọ ziri ezi nke Nna ha.’ Ma ha onwe ha, ha niile, agbajiela yoku ahụ; ha adọbiela agbụ ndị ahụ. Nʼihi ya, ọdụm sitere nʼoké ọhịa ga-etigbu ha, nkịta ọhịa nke ọzara ga-adọgbu ha. Agụ owuru makpuru na-eche obodo ha niile; onye ọbụla si nʼime ha pụọ ka a ga-adọwasị adọwasị—nʼihi na nnupụisi ha dị ọtụtụ, ndaghachi azụ ha enweghị ọnụọgụgụ.

“Gịnị mere m ga-eji gbaghara gị? Ụmụ gị agbakụtala m azụ ma jiri ndị na-abụghị chi ọbụla ṅụọ iyi. Enyere m ha afọ ojuju, ma ha kwara iko ma jikọọ onwe ha gbaga nʼụlọ ndị akwụna. Ha dị ka oké ịnyịnya gbara abụba, ndị agụụ na-agụ, onye ọbụla na-etiku nwunye onye agbata obi ya mkpu.’ Ọ bụ na m gaghị ata ha ahụhụ nʼihi ihe ndị a? ka Nna anyị kwupụtara. Ọ bụ na agaghị m abọ ọbọ nʼahụ mba dị otu a? Rịgoonụ gafee nʼahịrị osisi vaịn ya ma bibie ha, ma unu emekwala ka ọ gwụchaa kpamkpam; wepụchaanụ alaka ya niile, nʼihi na ha abụghị nke Nna anyị. Nʼihi na ụlọ Izrel na ụlọ Juda abụrụla ndị na-ekwesịghị ntụkwasị obi nʼebe m nọ kpamkpam, ka Nna anyị kwupụtara.”

Ha ekwuola okwu ụgha banyere Nna anyị; ha sịrị, ‘Ọ gaghị eme ihe ọbụla! Ọ dịghị mbibi ga-abịakwasị anyị; anyị agaghị ahụ mma agha ma ọ bụ ụnwụ.’ Ndị amụma bụ naanị ikuku; okwu ahụ adịghị nʼime ha. Ya mere, ka e mee ha otu ahụ!

Nʼihi ya, nke a bụ ihe Nna nke usuu agha nke eluigwe kwuru: Nʼihi na unu ekwuola okwu a, ana m eme ka okwu m dị gị nʼọnụ bụrụ ọkụ, ndị a ka m na-eme nkụ, ọ ga-erepịakwa ha. Lee, ana m eweta otu mba sitere nʼebe dị anya imegide unu, O ụlọ Izrel, ka Nna anyị kwupụtara—mba na-adịgide adịgide, mba oge ochie, mba nke unu na-amaghị asụsụ ya, nke unu apụghị ịghọta okwu ọnụ ya. “Akpa àkụ̀ ha dị ka ili ghere oghe; ha niile bụ dike nʼagha. Ha ga-eri ihe ubi gị na achịcha gị; ha ga-eri ụmụ gị ndị ikom na ụmụ gị ndị inyom; ha ga-eri igwe anụ ụlọ gị na igwe ehi gị; ha ga-eri osisi vaịn gị na osisi fig gị. Ha ga-eji mma agha kwatuo obodo gị ndị e wusiri ike nke ị tụkwasịrị obi.”

Ma ọ bụladị nʼụbọchị ndị ahụ, ka Nna anyị kwupụtara, agaghị m ala unu nʼiyi kpamkpam. Mgbe ha ga-ajụ, ‘Gịnị mere Nna anyị ji mee anyị ihe ndị a niile?’ ị ga-asị ha: ‘Dịka unu si gbakụta m azụ ma fee chi ala ọzọ nʼala unu, otu a ka unu ga-esi fee ndị ọbịa nʼala nke na-abụghị nke unu.’

“Kwupụtanụ nke a nʼụlọ Jekọb; kwusaanụ ya na Juda: Nụrụnụ nke a, O ndị nzuzu na ndị na-enweghị uche, ndị nwere anya ma adịghị ahụ ụzọ, ndị nwere ntị ma adịghị anụ ihe:” Ọ bụ na unu adịghị atụ m egwu? ka Nna anyị kwupụtara. Ọ bụ na unu adịghị ama jijiji nʼihu m? E mere m ka ájá bụrụ oke nye oke osimiri, iwu ebighị ebi nke ọ na-apụghị ịgafe. Ọ bụ ezie na ebili mmiri na-amagharị, ha apụghị imeri; ọ bụ ezie na ha na-ebigbọ, ha apụghị ịgafe ya. Ma ndị a nwere obi isiike na nke nnupụisi; ha achigharịala pụọ ma gbaso ụzọ nke aka ha. Ha anaghị ekwu nʼobi ha, ‘Ka anyị tụọ Nna anyị egwu, onye na-enye mmiri ozuzo—mmiri mbụ na mmiri ikpeazụ nʼoge ya—onye na-echekwara anyị izu ndị a kara aka maka owuwe ihe ubi.’ “Njehie unu emeela ka ngọzi ndị a chigharịa pụọ, mmehie unu egbochiela unu ịnweta ihe ọma. Nʼihi na a na-achọta ndị ajọ omume nʼetiti ndị m; ha na-emakpu dị ka ndị ọzụ nnụnụ na-eche nʼụzọ; ha na-agbado ọnyà, ọ bụkwa mmadụ ka ha na-ejide. Dị ka ọkpọ nnụnụ jupụtara na nnụnụ, ụlọ ha jupụtara na aghụghọ; ya mere ha abụrụla ndị ukwu ma baa ọgaranya. Ha abụrụla ndị mara abụba ma na-egbuke egbuke; ha jupụtara nʼajọ omume. Ha anaghị ekwuchitere ụmụ mgbei okwu ikpe ha, ka ihe wee gaara ha nke ọma, ikike nke ndị nọ na mkpa, ha anaghị akwado ya.” Ọ bụ na m gaghị ata ha ahụhụ nʼihi ihe ndị a? ka Nna anyị kwupụtara. Ọ bụ na agaghị m abọ ọbọ nʼahụ mba dị otu a? “Ihe dị egwu na nke jọgburu onwe ya emeela nʼala ahụ: ndị amụma na-ebu amụma ụgha, ndị nchụàjà na-achị site nʼikike nke aka ha; ndị m hụkwara ya nʼanya otu a. Ma gịnị ka unu ga-eme mgbe ọgwụgwụ ga-abịa?”