ኤርሚያስ 5 FHB Father's Heart Bible™

5 ¹“ኣብ ኣደባባያት ኢየሩሳሌም ዙሩ፥ ሕዚ ርአዩ ኣስተውዕሉ ድማ! ኣደባባያት እታ ኸተማ ድለዩ፤ ፍትሒ ዝገብርን ሓቂ ዝደልን ሓደ ሰብ እንተ ረኸብኩም፥ ይቕረ ክብለላ እየ። ²‘ኣቦና ህያው እዩ’ እኳ እንተ በሉ፥ ብሓሰት እዮም ዝምሕሉ።”

³ኦ ኣቦና፥ ኣዒንትኻ ንእምነትዶ ኣይጥምታን? ወቒዕካዮም፥ ንሳቶም ግና ኣይሓመሙን፤ ኣጥፊእካዮም፥ ተግሳፅ ግና ኣበዩ። ገፆም ካብ ከውሒ ኣትረሩ፤ ክምለሱ ኣበዩ። ⁴ሽዑ ኣነ ኸዓ፥ “እዚኣቶም ድኻታት ጥራሕ እዮም፤ ዓያሹ እዮም፤ መንገዲ ኣቦና፥ ፍርዲ ኣቦኦም ኣይፈልጡን እዮም እሞ” በልኩ። ⁵“ናብቶም ዓበይቲ ኸይደ ክዛረቦም እየ፤ ንሳቶም መንገዲ ኣቦና፥ ፍርዲ ኣቦኦም ብርግፅ ይፈልጡ እዮም እሞ።” ንሳቶም ድማ ኵሎም ኣርዑት ሰቢሮም፤ መእሰሪኦም በቲኾም። ⁶ስለዙይ ካብ ዱር ዝወፀ ኣንበሳ ክወቕዖም እዩ፤ ተዅላ በረኻ ከዓ ክገማምዖም እዩ። ነብሪ ኣብ ከተማታቶም ኣድብዩ የማዕዱ ኣሎ፤ ካብኣተን ዝወፀ ዅሉ ክንጣጠል እዩ፤ ዓመፆም ብዙሕ እዩ እሞ፥ ምኽሓዶም ድማ ቚፅሪ የብሉን።

⁷“ከመይ ጌረ ይቕረ ክብለልኪ? ደቅኺ ንኣይ ሓዲጎም፥ ኣምላኽ ብዘይኮነ ድማ መሓሉ። ኣፅጊበዮም፥ ንሳቶም ግና ዘመዉ፥ ናብ ኣብያተ ኣመንዝራታት ድማ ተጓይዮም ከዱ። ⁸ከም ስቡሓት ስዱዓት ፈረሳት ኮኑ፤ ነፍሲ ወከፍ ናብ ሰበይቲ ብፃዩ ይሃንም ነበረ። ⁹ስለ እዝ ነገራት እዚኣቶምዶ ኣይቐፅዖምን? ይብል ኣቦና። ከምዙይ ኣብ ዝበለ ህዝቢዶ ሕነይ ኣይፈዲን? ¹⁰ናብ ቀጸላ ወይኒ ደዪብኩም ኣጥፍኡ፥ ፈፂምኩም ግና ኣይተፅንትዋ፤ ጨናፍራ ኣልግሱ፥ ናይ ኣቦና ኣይኮናን እየን እሞ። ¹¹ቤት እስራኤልን ቤት ይሁዳን ኣባይ ፈፂሞም ጠሊሞም እዮም፥ ይብል ኣቦና።”

¹²ብዛዕባ ኣቦና ሓሶት ተዛሪቦም፤ “ንሱ ገለ ኣይገብርን እዩ! መዓት ናባና ኣይመፅእን፤ ሰይፊ ኾነ ጥሜት ኣይንርእን” በሉ። ¹³እቶም ነብያት ንፋስ ጥራሕ እዮም፤ እቲ ቃል ኣባታቶም የለን። ስለዙይ ከምዙይ ይኹኖም!

¹⁴ስለዙይ ኣቦ ሰራዊት ሰማይ ከምዙይ ይብል ኣሎ፦ እዝ ቃል እዙይ ስለ ዝተዛረብኩምዎ፥ ነቲ ቃለይ ኣብ ኣፍካ ሓዊ ክገብሮ እየ፤ ነዝ ህዝቢ እዙይ ድማ ዕንፀይቲ ክገብሮ እየ፤ ክበልዖም ከዓ እዩ። ¹⁵እንሆ፥ ኣብ ልዕሌኹም ህዝቢ ካብ ርሑቕ ከምፅእ እየ፥ ኦ ቤት እስራኤል፥ ይብል ኣቦና፤ ዝፀንዕ ህዝቢ፥ ናይ ጥንቲ ህዝቢ፥ ቋንቋኡ ዘይትፈልጥዎ ህዝቢ፥ ዘረባኡ ዘይትርድእዎ ህዝቢ። ¹⁶“ኣፅቄቶም ከም ክፉት መቓብር እዩ፤ ኵሎም ሓያላት ጀጋኑ እዮም። ¹⁷ዓፂድካ እንጀራኻ ድማ ክበልዑ እዮም፤ ኣወዳትካን ኣዋልድካን ክበልዑ እዮም፤ መጓሰኻ ኣሓኻ ድማ ክበልዑ እዮም፤ ወይንኻ ኣእዋም በለስካ ድማ ክበልዑ እዮም። ነተን እትኣምነለን ዝተቐፀራ ከተማታትካ ብሰይፊ ኸፍርሱወን እዮም።”

¹⁸ኮይኑ ግና በተን መዓልቲታት እቲኣተንውን ፈፂመ ኣይኸጥፍአኩምን እየ፥ ይብል ኣቦና። ¹⁹ንሳቶም ድማ “ኣቦና ስለ ምንታይ እዝ ዅሉ ገበረና?” ምስ ሓተቱ፥ “ከምቲ ንኣይ ሓዲግኩም ኣብ ምድሪኹም ንኻልኦት ኣማልኽቲ ዘምለኽኩም፥ ከምኡ ኸዓ ኣብ ዘይ ናትኩም ምድሪ ንጓኖት ከተገልግሉ ኢኹም” ኢልካ ንገሮም።

²⁰“እዙይ ኣብ ቤት ያእቆብ ኣውጁ፤ ኣብ ይሁዳ ድማ ኣስምዕዎ፦ ²¹ኣታ ዓሻን ዘየስተውዕልን ህዝቢ፥ ኣዒንቲ እንዳለኩም ዘይትርእዩ፥ ኣእዛን እንዳለኩም ዘይትሰምዑ፥ እዙይ ስምዑ፦” ²²ንኣይዶ ኣይትፈርሁን ኢኹም? ይብል ኣቦና። ኣብ ቅድመይዶ ኣይትንቀጥቀጡን ኢኹም? ንሑፃ ንባሕሪ ዶብ ጌረ፥ ዘይሰግሮ ናይ ዘለኣለም ስርዓት ገበርኩ። ማዕበላ እኳ እንተ ተናወፀ፥ ክስዕሩ ኣይኽእሉን፤ እኳ እንተ ሃመሙ፥ ክሰግርዎ ኣይኽእሉን። ²³እዝ ህዝቢ እዙይ ግና፥ ህልኸኛን ዓመፀኛን ልቢ ኣለዎ፤ ኣግሊሶም ድማ ናብ ገዛእ መንገዶም ከዱ። ²⁴ብልቦም ድማ “ነቲ ዝናም፥ ዝናም ፅድያን ክረምትን በብጊዜኡ ዝህበና፥ ነተን ዝተመደባ ሰሙናት ዓፂድ ዝሕልወልና ኣቦና ንፍራህ” ኣይብሉን እዮም። ²⁵“ኣበሳኹም ነዝ በረከት እዙይ መለሶ፤ ሓጢኣትኩምን ነቲ ፅቡቕ ካባኻትኩም ከልከሎ። ²⁶ኣብ ማእኸል ህዝበይ ክፉኣት ሰባት ይርከቡ እዮም እሞ፤ ከም ገፈፍቲ ኣዕዋፍ ኣድብዮም ይፅበዩ፤ መፈንጠር ይተኽሉ፥ ንሰብ ድማ ይማርኹ። ²⁷ከምቲ ብኣዕዋፍ ዝመልአ ኣቕፉ፥ ኣባይቶም ተንኰል መሊእወን ኣሎ፤ ስለዙይ ዓበዩ ሃብተሙ ድማ። ²⁸ሰብሑ ገዘፉ፤ ብኽፉእ ግብሪ ኣዝዮም በዚሖም። ምእንቲ ኽሰልጦም ኢሎም ንጉዳይ ደኽታም ኣይማጐቱሉን፤ መሰል ፅጉም ድማ ኣይድግፉን።” ²⁹ስለ እዝ ነገራት እዙይዶ ኣይቐፅዖምን እየ? ይብል ኣቦና። ኣብ ልዕሊ ኸምዙይ ዝበለ ህዝቢዶ ኣይበቀልን እየ? ³⁰“ኣብታ ምድሪ ዜስደምምን ዜፍርህን ነገር ኮይኑ ኣሎ፦ ³¹ነብያት ብሓሰት ይንበዩ፤ ካህናት ድማ ብገዛእ ስልጣኖም ይገዝኡ፤ ህዝበይ ከዓ ነዙይ ከምኡ ይፈቱ። ኣብ መወዳእታ ግና እንታይ ክትገብሩ ኢኹም?”