Jeremia 5 FHB Father's Heart Bible™

5 ¹“Ũrũũnge njĩrainĩ cia Jerusalemu, rĩu ũrore na ũmenye! Caria ihaaro ciakuo—angĩkorwo no wone mũndũ ũmwe, mũndũ ũrĩa wĩkaga kĩhooto na agacaria ũhoro wa ma, hĩndĩ ĩyo nĩngamĩrekera. ²O na rĩrĩa moiga atĩrĩ, ‘ O ta ũrĩa Ithe witũ arĩ muoyo,’ no mehĩtaga na maheeni.”

³Wee Ithe witũ, githĩ maitho maku matiracaria wĩhokeku? Nĩwamahũũrire, no matiaiguire ruo; nĩwamaniinire, no makĩrega gũtaarwo. Nĩmoomirie mothiũ mao gũkĩra ihiga; makĩrega gũcooka. ⁴Hĩndĩ ĩyo ngĩuga atĩrĩ, ‘Aya no athĩĩni tu; nĩ akĩĩgu, nĩgũkorwo matiũĩ njĩra ya Ithe witũ, njĩra iria cia kĩhooto cia Ithe wao. ⁵Nĩngathiĩ kũrĩ andũ arĩa anene na njaarie nao, nĩgũkorwo ti-itherũ nĩmooĩ njĩra ya Ithe witũ, njĩra iria cia kĩhooto cia Ithe wao.’ No o nao, othe, nĩmoinĩte icooki; nĩmatuĩte mĩhĩndo. ⁶Nĩ ũndũ ũcio mũrũũthi uumĩte mũtitũ nĩũkamahũũra, njũũĩ ya werũ nĩĩkamatambuura. Ngarĩ ĩikaraga yoheirie matũũra mao; mũndũ o wothe ũkoima kuo nĩagatambuurwo tũcunjĩ—nĩgũkorwo ũremi wao nĩ mũingĩ, na kũhũndũka kwao gũtingĩtarĩka.

⁷“Nĩkĩĩ ingĩtũma ngũrekere? Ciana ciaku nĩcindiganĩirie niĩ na ikehĩta na icio itarĩ ngai. Nĩndamahũũnirie, no magĩtharia na magĩthiĩ irĩndĩ nyũmbainĩ cia maraya. ⁸Maatariĩ ta mbaarathi noru irĩ merirĩria, o ĩmwe ĩkĩania ĩgĩĩrirĩria mũtumia wa mũndũ ũrĩa ũngĩ.’ ⁹Githĩ ndikamaherithia nĩ ũndũ wa maũndũ maya? ũguo nĩguo Ithe witũ ekuuga. Githĩ ndikeerĩhĩria harĩ rũrĩrĩ ta rũrũ? ¹⁰Ambatai mũtuĩkanĩrie mĩhari yakuo ya mĩthabibũ, mwanange, no mũtikaniine biũ; rutai honge ciakuo, nĩgũkorwo ti cia Ithe witũ. ¹¹Nĩgũkorwo nyũmba ya Isiraeli na nyũmba ya Juda nĩ cindaganĩirie o biũ, ũguo nĩguo Ithe witũ ekuuga.”

¹²Nĩmaheeneirie ũhoro wa Ithe witũ; makiuga atĩrĩ, ‘Ndarĩ ũndũ ekaga! Gũtirĩ mũtino ũgaatũkora; tũtikoona rũhiũ rwa njora kana ng'aragu.’ ¹³Anabii no rũhuho tu; kiugo gĩtirĩ thĩinĩ wao. Nĩ ũndũ ũcio nĩmarĩĩkĩrwo ũguo!

¹⁴Nĩ ũndũ ũcio ũũ nĩguo Ithe wa mbũtũ cia igũrũ ekuuga: Tondũ nĩwarĩtie kiugo gĩkĩ, nĩ ngũtua ciugo ciakwa thĩinĩ wa kanua gaku mwaki, naguo andũ aya ndĩmatue ngũ, naguo mwaki ũcio nĩũkamaniina. ¹⁵Atĩrĩrĩ, nĩ ngũmũrehere rũrĩrĩ ruumĩte kũraya rũmũũkĩrĩre, inyuĩ nyũmba ya Isiraeli, ũguo nĩguo Ithe witũ ekuuga—rũrĩrĩ rũrĩ hinya, rũrĩrĩ rwa tene, rũrĩrĩ rũrĩa mũtooĩ rũthiomi rwaruo, rũrĩa mũtangĩigua mĩario yaruo. ¹⁶“Thiaka wao ũtariĩ ta mbĩrĩra hingũre; othe nĩ njamba cia ita irĩ hinya. ¹⁷Nĩmakaarĩa magetha maku na mĩgate yaku; nĩmakaarĩa aariũ aku na airĩĩtu aku; nĩmakaarĩa ndũũru ciaku cia mbũri na cia ng'ombe; nĩmakaarĩa mĩthabibũ yaku na mĩkũyũ yaku. Na rũhiũ rwa njora nĩmakamomora matũũra maku marĩa mairigĩre marĩa wĩhokete.”

¹⁸No o na matukũinĩ macio, ũguo nĩguo Ithe witũ ekuuga, ndikaamũniina biũ. ¹⁹Na rĩrĩa makooria atĩrĩ, ‘Nĩkĩĩ gĩtũmĩte Ithe witũ atwĩke maũndũ maya mothe?’ ũkaameera atĩrĩ: ‘O ta ũrĩa mwandiganĩirie mũgĩtungatĩra ngai cia kũngĩ bũrũriinĩ wanyu, no taguo mũgaatungatĩra ageni bũrũriinĩ ũrĩa ũtarĩ wanyu.’

²⁰“Anĩrĩrai ũhoro ũyũ nyũmbainĩ ya Jakubu; mũũhunjie kũu Juda: ²¹Thikĩrĩriai ũndũ ũyũ, inyuĩ andũ akĩĩgu na mũtarĩ ũmenyo, inyuĩ mũrĩ na maitho no mũtionaga, mũrĩ na matũ no mũtiiguaga:” ²²Githĩ mũtinjĩĩtigagĩra? ũguo nĩguo Ithe witũ ekuuga. Githĩ mũtiinainaga mbere yakwa? Niĩ nĩndaigire mũthanga ũtuĩke mũhaka wa iria, watho wa tene na tene ũrĩa ũtangĩkĩrwo. O na gũtuĩka makũmbĩ nĩmahũũranaga, matingĩhoota; o na mangĩruruma, matingĩrĩkĩra rĩo. ²³No andũ aya marĩ na ngoro nyũmũ na ya ũremi; nĩmagarũrũkĩte, magĩthiĩ na njĩra yao ene. ²⁴Matiugaga ngoroinĩ ciao atĩrĩ, ‘Nĩtwĩtigĩre Ithe witũ, ũrĩa ũheanaga mbura—mbura ya mbere na mbura ya thuutha o hĩndĩ yayo—ũrĩa ũtũigagĩra ciumia iria ciathĩĩretwo cia magetha.’ ²⁵“Mahĩtia maku nĩmagarũrĩte irathimo ici, namo mehia maku nĩmakũimĩte maũndũ mega. ²⁶Nĩgũkorwo gatagatĩinĩ ka andũ akwa nĩkuoneka andũ aaganu; mohithagĩra ta ategi a nyoni arĩa maikaraga meterete; maigaga mũtego, na nĩ andũ manyiitaga. ²⁷Ta kĩondo kĩiyũrĩte nyoni, noguo nyũmba ciao ciyũrĩte maheeni; nĩ ũndũ ũcio nĩmakũrĩte na magĩtonga. ²⁸Nĩmanorete, magakenga; nĩmaiyũrĩtwo nĩ ciĩko njũru. Maticiirĩrĩraga ciira wa ciana iria itarĩ na maithe, nĩgeetha igaacĩre, na matirũgamagĩrĩra kĩhooto kĩa arĩa athĩĩni.” ²⁹Githĩ ndikamaherithia nĩ ũndũ wa maũndũ maya? ũguo nĩguo Ithe witũ ekuuga. Githĩ ndikeerĩhĩria harĩ rũrĩrĩ ta rũrũ? ³⁰“Ũndũ wa kũmaka na wa magigi nĩwĩkĩkĩte bũrũriinĩ: ³¹anabii marathaga mohoro ma maheeni, nao athĩnjĩri Ngai maathanaga na ũhoti wao ene; nao andũ akwa nĩmendete ũguo. No mũgeeka atĩa rĩrĩa ithirĩro rĩgaakinya?”