Ezra 9

9 ¹Human mahimo kini, miduol kanako ang mga opisyal: “Ang katawhan sa Israel, ang mga pari, ug ang mga Levihanon wala magpabiling bulag gikan sa nanaglibot nga mga katawhan uban sa ilang mangil-ad nga mga butang—ang mga Canaanhon, mga Hitihanon, mga Perizihanon, mga Jebusihanon, mga Amonihanon, mga Moabihanon, mga Ehiptohanon, ug mga Amorihanon. ²Gikuha nila ang pipila sa ilang mga anak nga babaye ingon nga mga asawa alang sa ilang kaugalingon ug alang sa ilang mga anak nga lalaki, nga gisagol ang balaang kaliwat sa nanaglibot nga mga katawhan. Ug ang mga opisyal ug mga pangulo mao ang nanguna niini nga pagkamaluibon.”

³Sa pagkadungog niini, gigisi ko ang akong bisti ug kupo, giibot ko ang buhok sa akong ulo ug bangas, ug milingkod ako nga nahingangha. ⁴Unya ang tanan nga nangurog tungod sa mga pulong sa Dios sa Israel, ang atong Amahan, nagtigom kanako tungod sa pagkamaluibon sa mga binihag, ug milingkod ako nga nahingangha hangtod sa halad sa kagabhion. ^a a v4 Ang halad sa kagabhion mao ang naandang inadlaw nga halad nga gihimo sa mga alas tres sa hapon.

⁵Sa halad sa kagabhion mibangon ako gikan sa akong pagpaubos, nga gisi ang akong bisti ug kupo, ug miluhod ako, nga gibukhad ang akong mga kamot ngadto sa akong Amahan, ⁶ug miingon ako: “Akong Amahan, naulaw ako ug napakaulawan sa pag-isa sa akong nawong nganha kanimo, akong Amahan, kay ang among mga sala milabaw na sa among mga ulo, ug ang among kasal-anan mitubo hangtod sa kalangitan. ⁷Sukad sa mga adlaw sa among mga katigulangan hangtod karon, anaa kami sa lalom nga kasal-anan, ug tungod sa among mga sala kami—ang among mga hari ug mga pari—gitugyan ngadto sa mga hari sa kayutaan, ngadto sa espada, sa pagkabihag, sa pagpangagaw, ug sa dayag nga kaulaw sa among mga nawong, sama karong adlawa. ⁸Apan karon, sa makadiyot nga higayon, miabot ang grasya gikan sa among Amahan, nga nagbilin kanamo ug nahibilin ug naghatag kanamo ug lig-on nga tungtonganan sa iyang balaang dapit, aron pasidlakon ang among mga mata ug hatagan kami ug diyutayng kabuhi diha sa among pagkaulipon. ⁹Mga ulipon kami; apan ang among Amahan wala mobiya kanamo sa among pagkaulipon. Gipaabot niya ang iyang gugmang walay paglubad kanamo atubangan sa mga hari sa Persia, nga nagbuhi kanamo aron sa pagtukod sa balay sa among Amahan, pag-ayo sa mga nagun-ob niini, ug paghatag kanamo ug paril nga panalipod sa Juda ug sa Jerusalem.

¹⁰Ug karon, among Amahan, unsa pa may among ikasulti human niini? Kay among gisalikway ang imong mga sugo,

¹¹nga imong gisugo pinaagi sa imong mga alagad nga mga propeta: ‘Ang yuta nga inyong sudlon aron panag-iyahon nahugawan sa kahugaw sa mga katawhan niini, kansang mangil-ad nga mga buhat nakapuno niini gikan sa usa ka tumoy ngadto sa pikas pinaagi sa ilang kahugawan. ¹²Busa karon ayaw ihatag ang inyong mga anak nga babaye ngadto sa ilang mga anak nga lalaki ni kuhaon ang ilang mga anak nga babaye alang sa inyong mga anak nga lalaki, ug ayaw gayod pangitaa ang ilang kalinaw o ang ilang kauswagan, aron kamo molig-on, mokaon sa maayong abot sa yuta, ug ibilin kini nga panulondon sa inyong mga anak hangtod sa kahangtoran.’

¹³Human sa tanan nga midangat kanamo tungod sa among mga daotang buhat ug sa dakong kasal-anan—bisan pa niadto ikaw, among Amahan, nagpugong, nga gisilotan mo kami ug mas gaan pa kay sa angay sa among mga sala, ug gihatagan kami ug nahibilin nga sama niini, ¹⁴molapas ba kami pag-usab sa imong mga sugo ug makigminyo sa mga katawhan nga nagabuhat niining mangil-ad nga mga butang? Dili ka ba masuko kanamo hangtod nga malaglag mo kami, nga walay mahibilin ni makalingkawas? ¹⁵Among Amahan, Dios sa Israel, matarong ka, kay nahibilin kami nga nakalingkawas nga salin, sama karong adlawa. Ania kami sa imong atubangan sa among kasal-anan, bisan walay makabarog sa imong atubangan tungod niini.”