Ki Chililji Piik Kwanda
Komwachi pounik kole kiptainigap Israel kityo che ki andou eng' kaatunet ak pororyosyek che neegitee. Kogereer Ezra ngoryennyi, koput siweek che po metinnyi ak tamnennyi, ak kotebee kwong'yo agoi koleetyo, yeityo kosaai saaetap kachililutyet, komwa tengekwogik komyee, ak koking'elilei kole kaagomweche Kwandanyo tokyi kosiir ye kanyoolu tengekwogikwak.
9 1Ye kagobata tuguuchu, ki bwonjo anee pounik, koleenji, “Ma kitabaanegei piigap Israel, ak tisiik, ak Lawiik eng' pororyosyek che neegitee icheek kobooto tuguukwak che yaacheen—Kanaanik, Hitik, Perisik, Jebusik, Amonik, Moabik, Misiriik, ak Amorik. 2Ki namji alak eng' tiibiikwak koek kwonyiik eng' icheegei ak eng' weeriikwak, ak koboorbooro sogoornatet ne tiliil kobooto pororyosyek che neegitee. Ak ko pounik ak kiptainik che ki andounen eng' kachililutyet ni.”
3Ye kagas niito, ka agereer ngoryennyu ak ngoryeet ne kiroochigei, ka aput siweek che po metinnyu ak tamnennyu, ak ka atebee akwong'yo. 4Yeityo ki tuiyo anee tugul che rukrugen eng' ng'aleegap Kamuktaindetap Israel, Kwandanyo, agobo kachililutyet ne po che ki kiluule, ak ka atebee akwong'yo agoi kagoochinet ne po koleetyo. a a v4 Kagoochinet ne po koleetyo ko kiyomset ne kiyaei peetuut age tugul, ne kiyaei olo po sait somok eng' peet.
5Eng' kagoochinet ne po koleetyo, ka ang'eet eng' iming'inetnyu, kagogereer ngoryennyu ak ngoryeet ne kiroochigei, ak ka abut kutung'oikyuk, ak ka achuul eunekyuk tokyi Kwandanyu, 6ak ka ale: “Kwandanyu, alilan ak atoptoben ang'eet tainnyu tokyi inyee, Kwandanyu, amu kageetu tengekwogikyok kosiir metowekyok, ak kageetu kaanutyennyo agoi kipsengwet. 7Kobooch peetuusyegap kwanisyekyok agoi nguno, kiga kimi eng' kaanutyet ne oo, ak amu tengekwogikyok, kigekoonji acheek—laitorinikyok ak tisiikyok—eunegap laitorinigap emotinwek, koba rotweet, luuleet, yookset, ak lilanet ne landaat eng' togoochikyok, ko uu ra. 8Ago nguno, eng' sait ne ming'in, kagonyo myeeindo ne punu Kwandanyo, ki ng'etunenech che ng'et ak kogoonech oldo ne kimnaat eng' ole ne tiliil ne po ineendet, si kolaptu konyekyok ak koonech saboon ne ming'in eng' otwoknatennyo. 9Ki ii otwogik acheek; ago ma kipagaakta Kwandanyo acheek eng' otwoknatennyo. Ki iboorchi rireenennyi acheek eng' taitap laitorinigap Persia, kogoonech saboon si keng'eet kootap Kwandanyo, keteech karatwekyik, ak koonech kerget ne po toreteet eng' Judah ak Jerusalem.
10Ak nguno, Kwandanyo, nee ne kemwae kasaang'e niito? Amu kigemeta ng'atuutiguk,
11che ki ing'at eng' otwogiguk maotik, kole: ‘Emet ne ochut si opun, ko murwoniitu eng' murwoonindap piik che menyei, che ki itukto emainooto murot age agoi murot age eng' poisyonikwak che yaacheen ak murwoonindanywa. 12Nooto anyun nguno, amegoochi tiibiikwok weeriikwak, anan otunji weeriikwok tiibiikwak, ak amocheeng' kalyennywa anan porotennywa koigeny, si ogimit, oam ne myee eng' emet, ak oonchi poroteet lagokwok koigeny.’
13Kasaang'e tuguuchu tugul che kagobwonech amu poisyonikyok che yaacheen ak kaanutyennyo ne oo—agot eng' nooto, inyee, Kwandanyo, kiga iriipkei kot kigewirech kong'eny ne ma koit ne nyolu tengekwogikyok, ak kigoonech che ng'et ko uu chu, 14tos keweeksei let kebagaakte ng'atuutiguk ak keogangei ak pororyosyek che yaei tuguuchu che yaacheen? Tos ma inereechech agoi iwong'ech, kot koma ng'et chii ne ng'et anan ne sabei? 15Kwandanyo, Kamuktaindetap Israel, itinye imanda inyee, amu kigeng'etune acheek koek che ng'et che sabei, ko uu ra. Keero, mi acheek eng' taing'ung' kobooto kaanutyennyo, agot ma kimuuchi kotonon chii age tugul eng' taing'ung' amu nooto.”