Mütliei Bou khulimbo shed shonakei
Jaishou shuongei Israelbü leiyeibü shuong lolo kaijembo kibü mütshuong yoa yak lela shaangbou kikei dogo lenkei. Ezraei haoeibü nei jitnyinkei, haoeibü khu phenyokei, hoba lit sühko maangpangan setkei, kheijinei the chongchingko ngühlepan, seneibü Bouei haoeneibü shedsikhau deko the kubü shanga maang angtikei.
9 1Ho kümbü phaia, jaishou shuongei kü jungto louan laukei, “Israelbü shousi shuong, ungshedbou shuong hoba Levibü, Kananbü, Hitbü, Perizbü, Jebusbü, Ammonbü, Moabbü, Ijepbü hoba Amorbü, habü kaijembo kibü mütli ka, haoeneibü mangsenlabü peisilei yoa, haoen lolo abangenti. 2Haoenei haoeneibü nouyangshou atei jembü shanga hoba haoeneibü shousi shanga yak la lekei, hoba saopobü lilabü kaijembo kibü mütli yoa kheiyokei. Hoba ho shed shabüa jaishou hoba leiyeibü shuongei shaangbou kikei.”
3Ngei kho ditjinei, kü nei hoba neisimei jitnyinkei, hoba kü khu hoba kü sembung ka khulou phenyokei, hoba maangpangan setkei. 4Kheijinei Israelbü Mühghaü, seneibü Boueibü ngüh to lühbü pendou, langsenbü shuongeibü shed shabü shanga, kü jungto kamshaikei, hoba chasem lembü on ngo maangpangan setkei. a a v4 Chasem lembü kho chalou weko lembü kümsilei kikei, kho nangsek lanthük danko lembü kikei.
5Chasem lembüa, kü nei hoba neisimei jitnyinan, ngo kü eaaoabü ka meimeikei, hoba kü youkük ka phoan, kü Bou to kü ik ngühlepkei, 6hoba ngei laukei, “Kü Bou, ngo kü the kü Bou nyi aeto shingla himouko hoba the aleneneko ki, aishanga seneibü shabü seneibü khu to ong thükkabou to angkei, hoba seneibü shedbü khuthük on angkei. 7Seneibü pisibou shuongeibü chalou ka tat sühko senei shedbü yaangbüa kikei, hoba seneibü shabü shanga, senei—seneibü choba hoba ungshedbou shuong—kaodak shuongeibü choba shuong ika, küman to, langsenbü to, soletbü to, hoba seneibü the ka himou thonbüa, khümbo kuan apbei, tat sühko kibü tegü. 8Lausikei tou, longche shanga, seneibü Bou ka onou loukei; haoei sen shanga jouan kibü shuong püetkei hoba haoeibü saopobü setshanga sen la kaangkhühtham yepshang che kukei, seneibü nyek ipbula hoba seneibü aaothu ka sen la shisho langkei kula shanga. 9Sen aao kia; lausikei seneibü Bouei seneibü aaothu ka sen ainletkei. Haoei Persiabü choba shuong thedanga sen to haoeibü üeisanou shingkei, sen to langkei kuan, seneibü Bou chem tonentila, kho leilubü shuong kümla, hoba Jihuda hoba Jerusalema sen la püetlabü kümthang che kula shanga.
10Hoba tou, O seneibü Bou, ho phaia senei ai laulabü? Aishanga senei kaibü sakkubü ngühkhüm inletkei,
11laobou nyi kaibü sambou thuseibü shuong danko sakkukei, ‘Nyi phetphanla loubü kaonyek kho kabü müteibü asaopobüei leilubü ki, haoeneibü mangsenlabü kümsileiei kho ji ka ji thon sühko haoeneibü asaopobüei shenkukei. 12Kheijinei tou, kaneibü nouyangshou haoeneibü shousi la teku, ayingsi haoeneibü nouyangshou kaneibü shousi la teleti, hoba haoeneibü hakso ayingsi haoeneibü naangmaibü telam, khünei kan kaangbü yeilabü hoba kaonyek kabü maibü peisilei shaulabü hoba kho ponpen shanga kaneibü shousi shuong la phetphan la kulabü.’
13Seneibü amaibü kümsilei hoba shedbü yaangbü shanga sen la loubü pendou phaia—kheijinei nyi, seneibü Bouei, seneibü shabü mubü to limbo shisho matjem sen la kukei, hoba hibü tegü jouan kibü shuong sen la kukei— 14Senei nyibou kaibü sakkubü ngühkhüm lulimbü hoba habü mangsenlabü kümsilei kümbü mütli yoa laolam yaknga kilabü lo? Jouan kibü ayingsi jouletbü che ongkei ajoutiko sen amautishongko, nyi sen khulimbo khauanglabü aying lo? 15O seneibü Bou, Israelbü Mühghaü, nyi saopobü ki, aishanga tat sühko kibü tegü, senei jouan kibü jouletbü che la jouan kia. Chühashi, senei seneibü shedbüa nyi thedanga kia, lausikei kho shanga ao che ongkei nyi thedanga shaüla athük.”
