Ezra 9

9 ¹Hi sākahai tharan, kathānabingna iwuili rai: "Israelwui mibing, pāngmonbing, kala Levinaobingna, athumwui ningkakachai ot khalei kuikhamareili yurbing, Canaannaobing, Hitnaobing, Periznaobing, Jebusnaobing, Ammonnaobing, Moabnaobing, Egyptnaobing, kala Amornaobing eina ngateishok makajimana. ²Athumna athumwui ngalānaobing kaikhali khalatta kala athumwui sha̱naobingwui vang preiva̱ sāda khuiya, kathara ara̱-azāli kuikhamareili khalei yurbing eina ngakum ngasaka. Kala hi mashitkasangwui pongli kathānabing eina akhokabingna khareli nganinga."

³Chi kashā eina, ina iwui kachon kala katuma serkhāka, ikui kala imorhā eina sam sāshatmi, kala matakhakda sompama. ⁴Chieina Israelwui Vare, ithumwui Avāwui tuili ngachee kaje saikorana, tukthuiserhaibingwui mashitkasangwui vang iwui pāngli kazipkhuiya, kala ngazin tharāzātwui atam eina tangda ina matakhakda sompama. ^a a v4 Kazing khaying tharāzāt chi kachida sāsang tharāzātna, ngashun ngalemli ngayu kathum tākam eina sākahaina.

⁵Ngazin tharāzāt tākam eina, iwui kachon kala katuma serkahai eina, ina khalatta hamsang kahaiwui eina ngakarthuida, ikhuktizangda khumsanghaida, kala ipāng iwui Avāshong khayinda, ⁶kala ina hānga: "O iwui Avā, ina imai nashong ngashānkā khavai maishida pa̱ngapāhaira, O iwui Avā, kaja ithumwui morei chi ithumwui kui eina juimeida shokhairasai, kala ithumwui khayonkhamāng kazingramli kāshunghaira. ⁷Ithumwui avāva̱ ngarāwui atam eina thuida aja eina tangda ithum khayonkhamāng thukmeiwui alungli lei, kala ithumwui morei sākahaiwui vang, ithum, ithumwui awungabing kala pāngmonbing, ngalei kachiva̱wui awungabingwui pāngli, shaothatli, narkahaili, sāshaili, kala imai phongda kakhayakli sangmiserhaowa; aja hithāda lei. ⁸Kha ara, kasha̱khawui vang, ithumwui Avāwui eina lukhamashan samphanghaira, ithumli shākkahai akha haimida, kala awui kathara pamli ithumli khangazip pheinganin mida, ithumwui mik kahor ngasak khavai kala ithumwui narkahailungli kateteo ringluishit mikhavaina. ⁹Ithum raonaona; chithālala ithumwui Avāna ithumwui narkahailungli ithumli mahorhaimana. Persiawui awungabingwui mangāli awui lukhamashan ithumshong pānmihaira, ithumli ringphau ngasakta, ithumwui Avāwui shim raisāri khavai, chiwui ruinganaili chipho khavai, kala Judah eina Jerusalemli ithumli ngayinkhui khavai raipan akha mikhavaina.

¹⁰Kala ara, O ithumwui Avā, hi sākahaiwui thili ithumna khi hāngshapra? Kaja ithumna nawui ningkhami malaihaira,

¹¹chi nawui rao marānbingwui pāng eina za̱ngasak kahaina: "Nathumna kazangda shimlui khavai ngalei chi, chiwui mibingwui makathar eina makhaohaira; athumwui ningkakachai ot china chili athumwui makathar eina akai eina akai tangda pemngasakhaira. ¹²Chiwui vang ara, nathumwui nao ngalāva̱la athumwui nao sha̱naobingli mafavā ngasakalu, kala athumwui nao ngalāva̱bingli nathumwui nao sha̱naobingwui vang makhuipaimana, kala lanla athumwui mashit lah kahao maphāpaimana; chithākha nathum pangda leira, ngalei chiwui kaphā shaira, kala chili nathumwui naobingli katang mavaila shimlui sāda haira."

¹³Ithumwui makaphā otsak kala khayonkhamāng kachungkhawui vang ithumwuitungli shokkahai saikorawui thili, chithālala nana, O ithumwui Avā, ithumwui morei eina samphang khavai kaji hupta teomeida ithumli tandi mihaida, hi kathāwui shākkahai ithumli mihaira, ¹⁴ithumna nawui ningkhami latluida sakhaida, hi ningkakachai ot kasā mibing eina ngalā ngakhotta? Nana ithumli shimān ngasak khavai tangda ithumli malungvāt masamphangla, shākkahai lah maringshok khipākha maleimara? ¹⁵O ithumwui Avā, Israelwui Vare, na khamashung khangarongna, kaja aja jithāda, ithum ringda khalei shākkahaida lei. Mha, ithum ithumwui khayonkhamāngwui alungli nawui mangāli lei; chiwui vang eina khipākha nawui mangāli nganing khavai maleimana."