Esra 9

9 ¹Nígbà tí a ti ṣe èyí tán, àwọn ìjòyè tọ̀ mí wá, wọ́n wí pé, “Àwọn ènìyàn Israẹli, àwọn àlùfáà, àti àwọn ọmọ Lefi kò ya ara wọn sọ́tọ̀ kúrò lọ́dọ̀ àwọn ènìyàn tí ó yí wọn ká, pẹ̀lú ohun ìríra wọn—àwọn ará Kenaani, àwọn ará Hitti, àwọn ará Perisi, àwọn ará Jebusi, àwọn ará Ammoni, àwọn ará Moabu, àwọn ará Ejibiti, àti àwọn ará Amori. ²Wọ́n ti fẹ́ nínú àwọn ọmọbìnrin wọn ní aya fún ara wọn àti fún àwọn ọmọkùnrin wọn, wọ́n sì da irú-ọmọ mímọ́ pọ̀ mọ́ àwọn ènìyàn tí ó yí wọn ká. Àwọn ìjòyè àti àwọn olórí ni ó sì ṣáájú nínú àìṣòótọ́ yìí.”

³Nígbà tí mo gbọ́ èyí, mo fa aṣọ mi àti agbádá mi ya, mo fa irun orí mi àti irùngbọ̀n mi tu, mo sì jókòó ní ìrẹ̀wẹ̀sì ọkàn. ⁴Nígbà náà ni gbogbo àwọn tí ó wárìrì nítorí ọ̀rọ̀ Ọlọ́run Israẹli, Baba wa, péjọ sọ́dọ̀ mi nítorí àìṣòótọ́ àwọn ìgbèkùn, mo sì jókòó ní ìrẹ̀wẹ̀sì ọkàn títí di àkókò ẹbọ àṣálẹ́. ^a a v4 Ẹbọ àṣálẹ́ ni ẹbọ ojoojúmọ́ tí a máa ń rú nígbà gbogbo ní nǹkan bíi aago mẹ́ta ọ̀sán.

⁵Ní àkókò ẹbọ àṣálẹ́, mo dìde kúrò nínú ìrẹ̀lẹ̀ mi, pẹ̀lú aṣọ mi àti agbádá mi tí ó ya, mo sì wólẹ̀ lórí eékún mi, mo na ọwọ́ mi sí Baba mi, ⁶mo sì wí pé, “Baba mi, ojú ń tì mí, ẹ̀gàn sì bò mí láti gbé ojú mi sókè sí ọ, Baba mi, nítorí àwọn ẹ̀ṣẹ̀ wa ti ga ju orí wa lọ, ẹ̀bi wa sì ti dàgbà dé ọ̀run. ⁷Láti ọjọ́ àwọn baba ńlá wa wá títí di ìsinsìnyí, àwa ti wà nínú ẹ̀bi ńlá, àti nítorí àwọn ẹ̀ṣẹ̀ wa, àwa—àti àwọn ọba wa àti àwọn àlùfáà wa—ni a fi lé àwọn ọba ilẹ̀ wọ̀nyí lọ́wọ́, fún idà, ìgbèkùn, ìkógun, àti ìtìjú gban̄gba ní ojú wa, gẹ́gẹ́ bí ó ti rí lónìí. ⁸Ṣùgbọ́n nísinsìnyí, fún ìgbà díẹ̀, oore-ọ̀fẹ́ ti wá láti ọ̀dọ̀ Baba wa, ó fi àṣẹ́kù sílẹ̀ fún wa, ó sì fún wa ní ibi ìdúró tí ó fìdí múlẹ̀ ní ibi mímọ́ rẹ̀, láti mú kí ojú wa mọ́lẹ̀, àti láti fún wa ní ìsọ́jí díẹ̀ nínú ìsìnrú wa. ⁹Ẹrú ni àwa; síbẹ̀ Baba wa kò kọ̀ wá sílẹ̀ nínú ìsìnrú wa. Ó na ìfẹ́ májẹ̀mú rẹ̀ sí wa níwájú àwọn ọba Persia, ó sì sọ wá di ààyè, kí a lè gbé ilé Baba wa ró, kí a tún ahoro rẹ̀ ṣe, kí ó sì fún wa ní odi ààbò ní Juda àti ní Jerusalẹmu.

¹⁰Nísinsìnyí, Baba wa, kín ni àwa lè wí lẹ́yìn èyí? Nítorí àwa ti kọ àwọn òfin rẹ sílẹ̀,

¹¹tí ìwọ ti fi àṣẹ fún nípasẹ̀ àwọn ìránṣẹ́ rẹ, àwọn wòlíì, pé, “Ilẹ̀ tí ẹ̀yin ń wọ̀ lọ láti gbà jẹ́ aláìmọ́ nípa ìwà àìmọ́ àwọn ènìyàn rẹ̀, àwọn tí àwọn ìwà ìríra wọn ti kún un láti orí dé orí pẹ̀lú ẹ̀gbin wọn. ¹²Nítorí náà nísinsìnyí, ẹ má ṣe fi àwọn ọmọbìnrin yín fún àwọn ọmọkùnrin wọn, ẹ má sì ṣe gbà àwọn ọmọbìnrin wọn fún àwọn ọmọkùnrin yín, ẹ má sì ṣe wá àlàáfíà wọn tàbí ìre wọn láéláé, kí ẹ̀yin lè lera, kí ẹ sì jẹ ohun rere ilẹ̀ náà, kí ẹ sì fi í sílẹ̀ ní ogún fún àwọn ọmọ yín títí láéláé.”

¹³Lẹ́yìn gbogbo ohun tí ó ti dé bá wa nítorí àwọn iṣẹ́ búburú wa àti ẹ̀bi ńlá wa—àní nígbà náà ni ìwọ, Baba wa, dá ìyà wa dúró, tí o fi ìyà jẹ wá dín ju bí àwọn ẹ̀ṣẹ̀ wa ti tọ́ sí lọ, tí o sì fún wa ní àṣẹ́kù bí irú èyí, ¹⁴àwa ha tún lè rú àwọn òfin rẹ, kí a sì bá àwọn ènìyàn tí ń ṣe irú àwọn ohun ìríra wọ̀nyí ṣe ìgbéyàwó bí? Ìwọ kì yóò ha bínú sí wa títí ìwọ yóò fi pa wá run, láìfi àṣẹ́kù tàbí ẹni tí ó yè sílẹ̀ bí? ¹⁵Baba wa, Ọlọ́run Israẹli, olódodo ni ìwọ, nítorí a fi àwa sílẹ̀ ní àṣẹ́kù tí ó yè, gẹ́gẹ́ bí ó ti rí lónìí. Kíyèsi i, àwa wà níwájú rẹ nínú ẹ̀bi wa, bí ó tilẹ̀ jẹ́ pé kò sí ẹni tí ó lè dúró níwájú rẹ nítorí rẹ̀.”