ኢሳይያስ 33

33 ¹አንተ ያልጠፋህ አጥፊ ሆይ፣ ወዮልህ! አንተ ማንም ያላታለለህ አታላይ ሆይ፣ ወዮልህ! ማጥፋትን በፈጸምህ ጊዜ፣ አንተ ትጠፋለህ፤ ማታለልን ባቆምህ ጊዜ፣ አንተ ትታለላለህ።

²አባታችን ሆይ፣ ማረን፤ አንተን እንጠባበቃለን። በየማለዳው ኀይላችን ሁን፤ በመከራ ጊዜ ድነታችን ሁን። ³በድምፅህ ጩኸት ሕዝቦች ይሸሻሉ፤ አንተ በተነሣህ ጊዜ አሕዛብ ይበታተናሉ። ⁴ምርኮህ አንበጣ እንደሚሰበስብ ይሰበሰባል፤ ሰዎች እንደ አንበጣ መንጋ በእርሱ ላይ ይወራወራሉ።

⁵አባታችን ከፍ ከፍ ብሎአል፤ በከፍታ ላይ ይኖራልና፤ ጽዮንን በፍትሕና በጽድቅ ሞልቶአታል። ⁶ለዘመናትህ የማይናወጥ መሠረት ይሆናል፤ የድነት፣ የጥበብና የዕውቀት ብዛት ነው፤ የአባታችን ፍርሀት የጽዮን መዝገብ ነው።

⁷እነሆ፣ ኀያሎቻቸው በመንገድ ላይ ይጮኻሉ፤ የሰላም መልእክተኞች መራራ ልቅሶ ያለቅሳሉ። ⁸አውራ ጎዳናዎች ባዶ ሆነው ተኝተዋል፤ መንገደኞች ከመንገድ ጠፍተዋል። ኪዳኑ ተጥሶአል፤ ከተሞቹ ተናቀዋል፤ ማንም አይከበርም። ⁹ምድር ታዝናለች፤ ትደክማለችም፤ ሊባኖስ አፍሮ ይጠወልጋል፤ ሳሮን እንደ በረሓ ሆናለች፤ ባሳንና ቀርሜሎስም ቅጠላቸውን ያረግፋሉ።

¹⁰“አሁን እነሣለሁ” ይላል አባታችን፤ “አሁን ከፍ ከፍ እላለሁ፤ አሁን ራሴን ከፍ አደርጋለሁ። ¹¹ገለባ ትፀንሳላችሁ፤ አገዳ ትወልዳላችሁ፤ እስትንፋሳችሁ የሚበላችሁ እሳት ነው። ¹²ሕዝቦች እንደ ተቈረጠና እንደ ተቃጠለ እሾህ ተቃጥለው አመድ ይሆናሉ። ¹³እናንተ በሩቅ ያላችሁ ያደረግሁትን ስሙ፤ እናንተም በቅርብ ያላችሁ ኀይሌን እወቁ።”

¹⁴በጽዮን ያሉ ኀጢአተኞች ተሸብረዋል፤ ረከሱትን መንቀጥቀጥ ይዞአቸዋል፤ “ከእኛ መካከል ከሚበላ እሳት ጋራ ማን ሊኖር ይችላል?” ¹⁵በጽድቅ የሚመላለስ፣ ቅንንም የሚናገር፣ በግፍ የተገኘን ትርፍ የሚጸየፍ፣ እጁንም ጕቦ ከመቀበል የሚይዝ፣ ደም ለማፍሰስ ከሚደረግ ተንኰል ጆሮውን የሚደፍን፣ ዐይኑንም ከክፉ የሚያሳውር፣ ¹⁶በከፍታ ላይ የሚኖር ይህ ነው፤ መጠጊያውም የተራራ ምሽግ ይሆናል፤ እንጀራው ይሰጠዋል፤ ውሃውም አያልቅበትም።

¹⁷ዐይኖችህ ንጉሡን በውበቱ ያዩታል፤ ርቆ የተዘረጋ ምድርንም ያያሉ። ¹⁸ልብህ ያለፈውን ሽብር ያስባል፤ “የቈጠረው የት አለ? ግብሩን የመዘነው የት አለ? ግንቦችን የቈጠረው የት አለ?” ¹⁹እነዚያን ትዕቢተኞች ሕዝብ ከእንግዲህ አታይም፤ ንግግራቸው ለመከተል እጅግ እንግዳ የሆነ፣ በማትረዳው ቋንቋ የሚንተባተብ ሕዝብ ነው።

²⁰የበዓላችን ከተማ ጽዮንን ተመልከት! ዐይኖችህ ኢየሩሳሌምን ያዩአታል፤ ሰላማዊ ማደሪያ፣ የማይነቃነቅ ድንኳን፣ ካስማዎቿ ከቶ የማይነቀሉ፣ ገመዶቿም ከቶ የማይበጠሱ ናት። ²¹በዚያ ግን አባታችን በግርማው ሰፊ ወንዞችና ጅረቶች ያሉበት ስፍራ ሆኖ ለእኛ ይሆንልናል፤ በዚያ መቅዘፊያ ያለው ታንኳ አይሄድም፤ ኀያል መርከብም አያልፍም። ²²አባታችን ፈራጃችን ነውና፤ አባታችን ሕግ ሰጪያችን ነው፤ አባታችን ንጉሣችን ነው፤ እርሱ ያድነናል።

²³ገመዶችህ ላልተዋል፤ ምሰሶውን በስፍራው ሊይዝ፣ ሸራውንም ሊዘረጋ አይችሉም። በዚያን ጊዜ የተትረፈረፈ ምርኮ ይከፋፈላል፤ አንካሳውም እንኳ ዘረፋውን ይወስዳል። ²⁴በጽዮን የሚኖር ማንም፣ “ታምሜአለሁ” አይልም፤ በዚያ የሚኖረው ሕዝብ ኀጢአቱ ይሰረይለታል።