Isaiah 33

33 ¹Ègbé ni fún ọ, ìwọ apanirun, tí a kò tíì parun; ìwọ ọ̀dàlẹ̀, ẹni tí ẹnikẹ́ni kò tíì dà! Nígbà tí ìwọ bá parí ìparun, a ó pa ọ́ run; nígbà tí ìwọ bá dẹ́kun ìdàlẹ̀, a ó dà ọ́.

²Baba wa, ṣàánú fún wa; àwa ń dúró dè ọ́. Jẹ́ agbára wa ní àràárọ̀, ìgbàlà wa ní àkókò ìpọ́njú. ³Ní ìró ãrá ohùn rẹ àwọn ènìyàn sá; nígbà tí ìwọ bá dìde, àwọn orílẹ̀-èdè fọ́nká. ⁴A ó kó ìkógun rẹ jọ bí eṣú ti ń kó jọ; bí ọ̀wọ́ eṣú, àwọn ènìyàn yóò sáré lù ú.

⁵Baba wa ga, nítorí ó ń gbé ibi gíga; ó ti fi ìdájọ́ àti òdodo kún Sioni. ⁶Yóò jẹ́ ìpìlẹ̀ tí ó dájú fún àkókò rẹ, ọ̀pọ̀ ìgbàlà, ọgbọ́n, àti ìmọ̀; ìbẹ̀rù Baba wa ni ìṣúra Sioni.

⁷Wò ó, àwọn akọni wọn ń kígbe ní àwọn ìgboro; àwọn ikọ̀ àlàáfíà ń sọkún kíkorò. ⁸Àwọn ọ̀nà ńlá dahoro; àwọn arìnrìn-àjò ti pòórá kúrò lójú ọ̀nà. A ti ba májẹ̀mú náà jẹ́, a ti kẹ́gàn àwọn ìlú rẹ̀, a kò bọ̀wọ̀ fún ẹnikẹ́ni. ⁹Ilẹ̀ náà ń ṣọ̀fọ̀, ó sì ń ṣòfò; ojú ti Lebanoni, ó sì ń rẹ̀dànù; Ṣaroni ti dàbí aginjù, Baṣani àti Karmeli sì ń rẹ ewé wọn dànù.

¹⁰“Ní ìsinsìnyí ni èmi yóò dìde,' ni Baba wa wí, 'ní ìsinsìnyí ni a ó gbé mi ga, ní ìsinsìnyí ni èmi yóò gbé ara mi sókè. ¹¹Ẹ̀yin lóyún ìyàngbò, ẹ ó sì bí koríko gbígbẹ; ẹ̀mí yín jẹ́ iná tí yóò jó yín run. ¹²A ó sun àwọn ènìyàn di eérú, bí ẹ̀gún tí a gé lulẹ̀ tí a sì fi iná sí. ¹³Ẹ gbọ́, ẹ̀yin tí ẹ wà ní ọ̀nà jíjìn, ohun tí mo ti ṣe; ẹ̀yin tí ẹ wà nítòsí, ẹ sì jẹ́wọ́ agbára mi.'”

¹⁴Ẹ̀rù ba àwọn ẹlẹ́ṣẹ̀ ní Sioni; ìwárìrì sì mú àwọn aláìwà-bí-Ọlọ́run: “Ta ni nínú wa tí ó lè bá iná ajónirun gbé? Ta ni nínú wa tí ó lè bá ọ̀wọ́-iná àìnípẹ̀kun gbé?” ¹⁵Ẹni tí ń rìn ní òdodo tí ó sì ń sọ ohun tí ó tọ́, tí ó kọ̀ èrè tí ó wá nípa ìfipá-gbà, tí ó sì ń dá ọwọ́ rẹ̀ dúró láti gba àbẹ̀tẹ́lẹ̀, tí ó dí etí rẹ̀ sí ète ìtàjẹ̀sílẹ̀, tí ó sì dí ojú rẹ̀ sí ibi, ¹⁶èyí ni ẹni tí yóò máa gbé ní ibi gíga, ẹni tí ibi ìsádi rẹ̀ yóò jẹ́ àwọn odi òkè; a ó fún un ní oúnjẹ rẹ̀, omi rẹ̀ kì yóò sì gbẹ.

¹⁷Ojú rẹ yóò rí ọba nínú ẹwà rẹ̀; wọn yóò rí ilẹ̀ tí ó na jìnnà réré. ¹⁸Ọkàn rẹ yóò ṣe àṣàrò lórí ìpayà àtijọ́: “Níbo ni ẹni tí ó ka owó wà? Níbo ni ẹni tí ó wọn owó-orí wà? Níbo ni ẹni tí ó ka àwọn ilé-ìṣọ́ wà?” ¹⁹Ìwọ kì yóò rí àwọn ènìyàn agbéraga náà mọ́, àwọn ènìyàn tí ọ̀rọ̀ wọn ṣàjèjì jù láti gbọ́yé, tí ń kólòlò ní èdè tí ìwọ kò lè gbọ́.

²⁰Wo Sioni, ìlú àwọn àjọ̀dún wa tí a yàn! Ojú rẹ yóò rí Jerusalẹmu, ibùgbé àlàáfíà, àgọ́ tí a kì yóò ṣí kúrò, tí a kì yóò fa èèkàn rẹ̀ tu rí, tí okùn rẹ̀ kì yóò sì já láéláé. ²¹Ṣùgbọ́n níbẹ̀ Baba wa nínú ọláńlá rẹ̀ yóò jẹ́ fún wa ní ibi odò gbígbòòrò àti ìṣàn omi, níbi tí ọkọ̀ ojú-omi tí ó ní ìwakọ̀ kò lè lọ, tí ọkọ̀ ńlá kò sì lè kọjá. ²²Nítorí Baba wa ni onídàájọ́ wa, Baba wa ni olùfúnni-ní-òfin wa, Baba wa ni ọba wa; òun ni yóò gbà wá là.

²³Okùn ọkọ̀ rẹ ti dẹ̀: kò lè di òpó-ọkọ̀ mú ní ipò rẹ̀ tàbí kí ó na aṣọ ọkọ̀ sílẹ̀. Nígbà náà ni a ó pín ọ̀pọ̀ rẹpẹtẹ ìkógun, àní àwọn arọ yóò sì kó ìkógun lọ. ²⁴Kò sì sí ẹni tí ń gbé ní Sioni tí yóò wí pé, “Àìsàn ń ṣe mí”; àwọn ènìyàn tí ń gbé ibẹ̀ ni a ó dárí ẹ̀ṣẹ̀ wọn jì.