Izaiya 33 FHB Father's Heart Bible™

33 ¹Dzedze kwa iwe, nyakufudza, iwe udakhonda kufudzwa; iwe nyakusandukira, udakhonda kusandukirwa na munthu! Ungamala kufudza, unadzafudzwa; ungasiya kusandukira, unadzasandukirwa.

²Baba wathu, khalani na ntsisi kuna ife; ife tisadikhira Imwe. Khalani mphambvu yathu macibese onsene, upulumuki wathu mu n'dzidzi wa nyatwa. ³Pa kubvuma kwa fala yanu anthu asathawa; mungalamuka Imwe, mitundu ya anthu isabalalika. ⁴Pinthu pyako pyakupokosera pisagumanywa ninga dzombe linagumana; ninga madzombe akunjipa, anthu asapithamangira.

⁵Baba wathu ndi wakukuzwa, thangwi Iye asakhala kudzulu; Iye adadzaza Siyoni na kutonga kwadidi na kulungama. ⁶Iye anadzakhala maziko akuwanga a midzidzi yako, cuma ca upulumuki, nzeru, na cidziwiso; kugopa Baba wathu ndi cuma ca Siyoni.

⁷Onani, amuna awo acipapo asakhuwa m'misewu; amithenga a ntendere asalira mwakuwawa. ⁸Njira zikulu zasiyiwa; anyakuyenda ulendo asowa pa njira. Cibverano casweka, mizinda yace yanyozewa, nkhabe munthu analemedzwa. ⁹Dziko isalira mbiifa; Libanu asamanyazi mbauma; Saroni akhala ninga gwangwa, Bashani na Karmelo asagwisa masamba awo.

¹⁰“Cincino Ine ndinalamuka,’ alonga Baba wathu, ‘cincino Ine ndinakuzwa, cincino Ine ndinadzikweza. ¹¹Iwe usatenga pathupi pa makoko, usabala mapesi; mpweya wako ndi moto unadzakupisa iwe. ¹²Mitundu ya anthu inadzapiswa mpaka kukhala dota, ninga minga yakugwandwa mbipiswa pa moto. ¹³Bverani, imwe ale muli kutali, pidacita Ine; imwe ale muli cifupi, zindikirani mphambvu zanga.’”

¹⁴Anyakudawa a mu Siyoni aphatwa na kugopa; kutetemera kwaphata anthu akusowa Mulungu: “Mbani pakati pathu anakwanisa kukhala pabodzi na moto unapisa? Mbani pakati pathu anakwanisa kukhala na malamba a moto akukhonda kumala?” ¹⁵Ule anafamba mwakulungama mbalonga pyakulungama, ule anakhonda phindu yakupatikana mwakupokosera mbakoya manja ace toera akhonde kutambira cipepeso, ule anafunga makutu ace toera akhonde kubva masasanyiro a kuphana mbafunga maso ace toera akhonde kuona pyakuipa, ¹⁶uyu ndiye anadzakhala pa mbuto zakulepha, cakubisalira cace cinadzakhala malinga a mapiri; nkate wace unadzaperekwa kwa iye, madzi ace nkhabe kudzamala.

¹⁷Maso ako anadzaona mambo mu kubalika kwace; anadzaona dziko inafika kutali kakamwe. ¹⁸Ntima wako unadzanyerezera kugopa kwakale: “Ali kupi ule akhalengesa? Ali kupi ule akhapima misonkho? Ali kupi ule akhalengesa nsanja?” ¹⁹Nkhabe kudzaona pontho anthu akuuma nkhope ale, mbumba ya anthu ale kulonga kwawo ndi kwakunentsa kakamwe toera kubvesesa, akulonga mu cilongero cakuti nkhabe kucibvesesa iwe.

²⁰Onani Siyoni, nzinda wa maphwando athu akusankhulwa! Maso ako anadzaona Yerusalema, nyumba ya ntendere, nsasa wakuti nkhabe kudzagwedezwa, wakuti mikhomo yace nkhabe kudzazuzwa nee ntambo zace nkhabe kudzaduka. ²¹Mbwenye penepo Baba wathu mu ukulu wace anadzakhala kwa ife mbuto ya mikulo mikulu yakulapha na mitsinje, kwakuti nkhabe ngalawa ya nkhafi inakwanisa kuenda, nee ngalawa ikulu inakwanisa kupita. ²²Thangwi Baba wathu ndi nyakutonga wathu, Baba wathu ndi nyakupereka mitemo yathu, Baba wathu ndi mambo wathu; Iye anadzatipulumusa.

²³Ntambo zako zalekerera: nkhabe kukwanisa kuphatisa dhepo pa mbuto yace nee kucitisa nguwo ikhale yakutambaswa. Penepo pinthu pizinji pyakupambira pinadzagawanywa, ngakhala anyakulemala anadzakwata pinthu pyakupokosera. ²⁴Na nkhabe m'bodzi wakukhala mu Siyoni anadzalonga kuti: “Ine ndiri nyakuduwala”; mbumba inakhala kweneko inadzalekererwa madawo awo.