Isaiah 33

33 ¹Nali kakhanang ngasāranu, sākakathān, na khalattava mashimānmana; na yorkazā, khipānakha nali mayorkazaia! Nana sākazam kuphailaga, na sāshimānhaora; nana yorkazā tuishonhaiakha, nali yorkazāra.

²Ithumwui Avā, ithumli lumashanmilu; ithumna nali hondalei. Ngathor kachida ithumwui yāng sāmilu, kachot atamli ithumwui huikhami sāmilu. ³Nawui akhon khangashum eina mibingna yāmura; na ngakarthui tharan, yurbing raithāhaora. ⁴Nawui ngaponkakhui khaohna kazipkhui thāda kazipserhai; khaohnaobing khangapon thāda, mibingna chiwuitungli ngawokzangra.

⁵Ithumwui Avā khāngchikata, kaja a kajuili pama; ana Zionli mashun kala khamashung khangarong eina chipemhaira. ⁶A nawui atambingwui mataikasang shimphung, huikhami, thangkhamei kala theikakhuiwui kashāng ngasāra; ithumwui Avāli khangachee hi Zionwui lanna.

⁷Yanglu, athumwui kapanga mibingna chānreili ngakaora; chingrihaiwui mathunbingna wukkhananglāk eina chapa. ⁸Chānreibing thingmihaira; ramkazatabing shongfawui eina shimānserhaira. Tuingashit sākhayanghaira, awui keinungbing yangkharinghaira, mi khipānakhala makhayāshimana. ⁹Ngaleina chapngachāda thenghaowa; Lebanon khayakhaowa ngahuihaowa; Sharon siwuk thāda ngasāhaira, kala Bashan kala Carmelna thingnā khanuktāhaowa.

¹⁰"Ara ina ngakarthuira,' da ithumwui Avāna hānga, 'ara ina khāngchikatra, ara ina I khalatta khāngkāra. ¹¹Nana lanji naovaira, nana lanjikung pharāra; nawui khaksui hi nali chuikhavai meina. ¹²Ka̱shāt khanuktāda meina chuithat kahai thāda, mibingna chuitāda hotla onhaora. ¹³Kha̱ramli khalei nathum, ina sākahai chi nganālu; kala ngalemli khalei nathum, iwui pangshap theikhuilu.'"

¹⁴Zionli morei kaphungbing ngacheehaira; vare makathei mibing kathirra: "Ithumwui ngachaili khipāna hiya kachuia meili ngasoda ringshapra? Ithumwui ngachaili khipāna katang makhavai meiwonli ngasoda ringshapra?" ¹⁵Khamashung khangarong eina kazata, kala khamashung tui hānga, takzāwui tongkazā makhui, kala pheizā khuikhavai awui pāng khānga, ashee kakhuiwui kasā hāngkachitheili khanā shungnama, kala makaphā theikhavai amik shungnama chi, ¹⁶ana kajuili pamra, kala awui ngayin khavai kaphungwui raipanbing ngasāra; awui kashakazā ali sāmira, kala awui tara̱ mathengmara.

¹⁷Nawui mik eina awunga awui khamathāli theira; athumna kha̱ram zangkahai ngalei theira. ¹⁸Nawui wuklungna thuikahai khangachee chi chukmaja̱ra: "Mashing shānkhui kahai chi khipākhala? Shai khān kahai chi khipākhala? Dolanbing shānkhui kahai chi khipākhala?" ¹⁹Athumwui tui makashā bhap matāki khavai, nana bhap matāmana male eina khangapao da matui mashitkasangabing miyur chi nana matheiluimara.

²⁰Ithumwui langchin phanit keinung Zionli yanglu! Nawui mik eina chingri kahaipam, manganuk khavai kachonshim Jerusalem theira; awui pākra̱ katang masāshatmara kala awui khara̱ katang makaimara. ²¹Kha chili ithumwui Avāna awui khangamkharei eina ithumli kong mashālak kala tara̱ khalei pam ngasāra, chili huikhavai khalei marikhong akhala mazatrarmara kala pangshapa jahas akhala makhaungrarmara. ²²Kaja ithumwui Avāna ithumwui bichar sāmena, ithumwui Avāna ithumli ain kaso kahaina, ithumwui Avāna ithumwui awungana; ana ithumli huikhuira.

²³Nawui jahaswui khara̱bing ngalāhaida hokthanghaira; chi eina akhoka pakra̱ awuipamli khaninghai masārarmana, kala marikhong ngakhunvā masārarmana. Chieina thongthāng kachungkha chi ngayarra, kala phei katekabingnala ngaponkakhui ot chi khuiungra. ²⁴Kala Zionli somkapama khipākhana, "I kazāhaira" da mahāngmara; chili kapama mibingwui morei chi pheomira.