Mautibou shanga ügütü
Mautian akibü mautibou cheei touje haoeibü jihsiphai hapda. Walama shuong leiluan kikei, theyolanyobü sungenan apbei, hoba Zion kabü mühghaü akibü shuong tanei, aoei suibü wan yoa kila khamlabü dogo phelabü. Jongaibü kho lemailela honei ki: namku aloutibü hoba sii apbü hapbü lele nyek khinbü. Haoeneibü Bou kho matjembou hoba Choba ki.
33 1No mautibou shanga ügütü, nyi mautian akitei; no yaakshaubou, aoyouei nyi ayaakshaukei! Nyi mautila thonlaje, nyi mautian aplabü; nyi yaakshala thonlaje, nyi yaakshaun aplabü.
2Abou, kün to onoushi; künei ka to tükdea kida. Athakko ngeyang seneibü hau yingshi, khonku chaloua seneibü khümenbü yingshi. 3Kaibü ngühlang thungan mütshuong ngaida; nyi meimeilaje, phangshuong lintida. 4Kaibü peisilei koksüngei yoshaibü tegü yoshaian apda; koksüng shoongaibü tegü, mütshuongei khüto kaiya.
5Seneibü Bou yaangenbou ki, aishanga haoei suokbüa kia; haoei Zion to ngühmai hoba saopobüei shentikei. 6Haoei kaibü jiha shanga tükdebü chemshang yinglabü, khümenbü, songsido hoba hapbüngebü nyaksinam; seneibü Bou to hatbü kho Zion nyaksinam ki.
7Chühashi, haoeneibü maang kaangbü müt shuong khonga ngekda; sangmai ngühthonbü shuongei kaang haapda. 8Walama shuong leiluan kikei; walama paibü shuong lam ka bangkei. Theyolanyobü mautikei, haoeibü sangnyu shuong aweasüngla khangkei, müt che ongkei ahangenda. 9Kaoei mang haapda hoba leiluda; Lebanon himouko hoba yuida; Sharon yam tegü yeikei, hoba Bashan hoba Karmela haoeneibü sang shaknyinkei.
10“‘Tou ngo meimeilabü,’ dogo seneibü Bouei lauda, ‘tou ngo yaangentilabü, tou ngo lolo phonan aplabü. 11Nyi sho künlabü, nyi youho buklabü; kaibü hak kho nyi lonan aplabü wan ki. 12Mütshuong thamngu la yeilabü, wapan apbü sang si jak wana longbü tegü. 13Saabü ka kibü kan, ngei kümbü kho ditashi; hoba nyangko kibü kan, ngeibü hau theletashi.’”
14Zion kibü shabü shuong hatkei; Mühghaü to ühütbü shuong to hatbümokbüei sühkei: “Sen yoa aoyouei mautibü wan yoa kila thük? Sen yoa aoyouei ponpen wanlüh yoa kila thük?” 15Aoei saopobüei paida hoba tükdebü ngüh lauda, khonei pailetbü to maangüangbou, hoba besa ale shanga haoeibü ik shaknyinbou, aoei sii angbü thamtham to haoeibü nou küplepan hoba amaibü to haoeibü nyek semlepbou, 16ho müt kho suokbüa kilabü, haoeibü hushang kho shongh lapheishon kilabü; haoeibü phe hao to kulabü, hoba haoeibü dei athonlabü.
17Kaibü nyekei Choba hao hemaisaomaibüa haplabü; haoenei saabü sühko kibü kaodak haplabü. 18Kaibü maangponei shaangbü hatbü shanga maanglimaangsanglabü: “Chandinbou aoa ki? Khüm anjinleito kümbou aoa ki? Thaonyu chandinbou aoa ki?” 19Nyi touje yonglam lilibü mütshuong ho ahaplabü, haoeneibü ngüh ditenla athükbü phangshuong, nyi aditenlabü lishanga tongtongbü.
20Zion to chühashi, seneibü pienbü lem sangnyu! Kaibü nyekei Jerusalem haplabü, sangmaia kibü chem, ameimeilabü neichem, haoeibü anjin chekei ongkei apikletlabü, hoba haoeibü janglüh chekei ongkei athonlabü. 21Lausikei khünei seneibü Bouei hao yaangenbüa, sen shanga shumang hoba shushou hopatham kishang che kilabü, khünei longchem che haula athük hoba longchem yaangbü che danjung haula athük. 22Aishanga seneibü Bou kho seneibü matjembou ki, seneibü Bou kho seneibü ngühkhüm kubou ki, seneibü Bou kho seneibü Choba ki; haoei sen khümenlabü.
23Kaibü janglüh shuong loan joukei: kho longchem sembung tonenla athük hoba nei phangsi athük. Kheijinei soletbü juong shomlabü, hoba lamek shuongei ong peisilei leilanglabü. 24Hoba Ziona kibü aoyouei ong, “Ngo shatda,” dogo alaulabü; khünei kibü mütshuong haoeneibü shabü apbulabü.
