Saopobüa Songdakbü Choba
Semthetbü kaonyeka laang yaangbü yemkao tegü mütshuong shela yeitibü yaangenbü shuongei, Bou shanga amlangbü laubü hoba mühei haiyetnyu ikkong ngaitibü ngoubüloubü müt khulimbo laangda. Lele kibü yaksa shuongei youlat shisho lühlabü ngüh ditlabü. Soushou sen shongeiko pean longbü hoba menlang kho hek yaangbü kaonyek la yeilabü lele, chem yaang kho apyoan kilabü.
32 1Chühashi, Choba cheei saopobüa songdaklabü, hoba yaangenbü shuongei ngühmaia songdaklabü. 2Haoen che cheei yei ka shela phatko kilabü, yei yaangbü ka lapheishon phatko, kao ulangbüa dei shumang phatko, semthetbü kaonyeka laang yaangbü yemkao phatko kilabü. 3Kheijinei hapbü shuongeibü nyek akhinlabü, hoba ditbü shuongeibü nou haanglabü. 4Tongbü maangponei hapbüngebü ditenlabü, hoba ngüh laula athükbü lishangei tongde hoba shangashatko joyolabü. 5Touje ngoubüloubü müt to yaangbou dogo anyenlabü, ayingsi haang alongbü müt to soneikangbü dogo alaulabü. 6Aishanga ngoubüloubü mütei ngoubüla lauda, hoba haoeibü maangponei amaibü takda: Mühghaü amailembü kümsilei kümla, seneibü Bou shanga amlangbü laula, mühei haiyetnyu to ikkong ngaitila hoba deilabü to yunglabü dei akula. 7Haang alongbü müteibü insiaubu amaibü ki; haoei amaibü lapheishon takda, amlangbü nyena shalebü mautila, khambü shuongei ngühmaanglanko haoeibü mat laualasikei. 8Lausikei yaangbou mütei yaangbü thinei lamda, hoba yaangbü thinei thükto haoei loda.
Loenashi, Lelea Kibü Nouyangshousi Shuong
9Kanei lele kibü yaksa shuong, loenan ngeibü loei ditashi; kanei lele kibü nouyangshousi shuong, ngei laubü ngüh ditashi.
10“Po che hoba chalou shisho phaia kanei lühlabü, kanei lele kibü yaksa shuong, aishanga semlüh hek alonglabü, hoba yoshaibü akilabü. 11Lühashi, kanei lele kibü shuong; khonkushi, kanei lele kibü shuong! Jembü lolo neisimei hangletashi, hoba senounei neiashi. 12Chühsebü maibü sek shanga kaneibü senlang hekashi, maihekbü semlüh shanga, 13ngeibü mütli kaonyek shanga, khünei sang si jak yemtikulabü; maimaitham, olinbü sangnyua kibü olinbü chem pendou shanga. 14Aishanga Choba chem abanglabü, müt juongbü sangnyu apyoan kilabü; shongh hoba lapheichem ponpen shanga suokbü kaonyek yeilabü, yamkabü gadu shuong shanga olinbü yeilabü, sanlon shuong shanga lamshaushang kilabü, 15seneibü Bou Soushou khu thüka ka sen thükto koutiko sühko, hoba yamlamang maihekbü sek yeilabü, hoba maihekbü sek yam dogo weeilabü. 16Kheijinei matjembü yamlamanga kilabü, hoba saopobü maihekbü seka jouan kilabü. 17Saopobü kümsilei kho sangmai kilabü, hoba saopobü ka longbü kho koshikbü hoba ponpen püetangetbü kilabü. 18Ngeibü mütli sangmai chema, püetangetbü kishanga, akuklabü haksoshang ka kilabü. 19Senlaangei yam to yantikulasikei, hoba sangnyu lemailela yantikuansikei, 20dei pendou aeto kela ongbü, masu hoba gadu amakhetko lamshautibü kanei olinbou kilabü.”
