यशया 32

32 ¹ पाहा, एक राजा नीतिमत्तेने राज्य करील, आणि अधिपती न्यायाने राज्य चालवतील. ² प्रत्येकजण वाऱ्यापासूनचा आसरा, वादळापासूनचे आश्रयस्थान असा होईल; कोरड्या भूमीतील पाण्याच्या प्रवाहांसारखा, थकलेल्या भूमीतील मोठ्या खडकाच्या सावलीसारखा. ³ मग पाहणाऱ्यांचे डोळे मिटले जाणार नाहीत, आणि ऐकणाऱ्यांचे कान लक्ष देतील. ⁴ उतावळ्या मनाला समजेल ज्ञान, आणि अडखळणारी जीभ सहज व स्पष्ट बोलेल. ⁵ यापुढे मूर्खाला उदार म्हटले जाणार नाही, किंवा नीचाला प्रतिष्ठित मानले जाणार नाही. ⁶ कारण मूर्ख मूर्खपणाचे बोलतो, आणि त्याचे मन दुष्टपणाचा कट रचते: अधर्म आचरण्याचा, आमच्या पित्याविषयी लबाडी बोलण्याचा, भुकेल्यांना काहीही न देण्याचा आणि तहानलेल्यांना पिण्यापासून वंचित ठेवण्याचा. ⁷ नीचाची शस्त्रे दुष्ट आहेत; तो नाश करण्यासाठी दुष्ट कारस्थाने रचतो — गरिबांचा खोट्या शब्दांनी नाश, गरजू न्यायाने आपली बाजू मांडत असतानाही. ⁸ पण उदार माणूस योजना करतो उदार गोष्टींची, आणि उदार गोष्टींनीच तो टिकून राहतो.

निर्धास्त कन्यांनो, उठा

⁹ निर्धास्त स्त्रियांनो, उठा आणि माझी वाणी ऐका; निश्चिंत कन्यांनो, ऐका मी काय म्हणतो ते.

¹⁰ वर्षभराहून थोड्याच अधिक काळात तुम्ही थरथर कापाल, निश्चिंत स्त्रियांनो, कारण द्राक्षांचा हंगाम बुडेल, आणि पीक गोळा करणे होणार नाही. ¹¹ थरथर कापा, निर्धास्त जनांनो; भयाने कंपित व्हा, निश्चिंतांनो! स्वतःला उघडे करा आणि कंबरेभोवती शोकवस्त्रे बांधा. ¹² रम्य शेतांसाठी आपली छाती बडवा, फलदायी द्राक्षवेलीसाठी, ¹³ माझ्या लोकांच्या भूमीसाठी, जिथे काटे व काटेरी झुडपे वाढतात; खरोखर, आनंदमय नगरातील सर्व हर्षगृहांसाठी. ¹⁴ कारण राजवाडा ओसाड पडेल, गजबजलेले नगर निर्जन होईल; टेकडी व पहारा-बुरूज सदासर्वकाळ उजाड जागा होतील, रानगाढवांचा आनंद, कळपांचे कुरण, ¹⁵ जोपर्यंत आमच्या पित्याचा आत्मा ओतला जात नाही उंचावरून आमच्यावर, आणि रान फलदायी शेत होत नाही, आणि फलदायी शेत वनासारखे मानले जात नाही. ¹⁶ मग रानात न्याय वस्ती करील, आणि फलदायी शेतात नीतिमत्ता राहील. ¹⁷ नीतिमत्तेचे कार्य शांती असेल, आणि नीतिमत्तेचे फळ, सदासर्वकाळ स्वस्थता व सुरक्षितता. ¹⁸ माझे लोक शांतिमय घरात राहतील, सुरक्षित वस्तीस्थानांत, निवांत विश्रांतिस्थानांत. ¹⁹ जरी गारपिटीने वन आडवे होईल आणि नगर पूर्णपणे भुईसपाट होईल, ²⁰ सर्व जलांच्या काठी पेरणी करणारे तुम्ही धन्य आहात, जे बैल व गाढव यांना मोकळे फिरू देता.