ኢሳይያስ 32

32 ¹እነሆ፣ ንጉሥ በጽድቅ ይነግሣል፤ ገዦችም በፍትሕ ይገዛሉ። ²እያንዳንዱ ከነፋስ እንደ መጠጊያ፣ ከዐውሎ ነፋስም እንደ መሸሸጊያ፣ በደረቅ ስፍራ እንደ የውሃ ፈሳሽ፣ በደከመ ምድር እንደ ታላቅ ዐለት ጥላ ይሆናል። ³ያን ጊዜ የሚያዩ ሰዎች ዐይኖች አይጨፈኑም፤ የሚሰሙ ሰዎችም ጆሮዎች ያዳምጣሉ። ⁴የችኩል ልብ ዕውቀትን ያስተውላል፤ የሚንተባተብም ምላስ ተዘጋጅቶ በግልጽ ይናገራል። ⁵ከእንግዲህ ሞኝ ክቡር ተብሎ አይጠራም፤ ተንኮለኛም የተከበረ አይባልም። ⁶ሞኝ ሞኝነትን ይናገራልና፣ ልቡም ክፋትን ያውጠነጥናል፤ ይኸውም ዐመፅን ለማድረግ፣ ስለ አባታችን ሐሰትን ለመናገር፣ የተራበውን ባዶ ለመተው የተጠማውንም መጠጥ ለመከልከል ነው። ⁷የተንኮለኛ የጦር መሣሪያዎች ክፉዎች ናቸው፤ ችግረኛው ነገሩን በትክክል ሲያቀርብም እንኳ ድሆችን በሐሰት ቃላት ለማጥፋት ክፉ ተንኮልን ያውጠነጥናል። ⁸ክቡር ሰው ግን ክቡር ነገሮችን ያቅዳል፤ በክቡር ነገሮችም ይጸናል።

ተዝናኝ ሴት ልጆች ሆይ፣ ተነሡ

⁹እናንተ ተዝናኝ ሴቶች ሆይ፣ ተነሥታችሁ ድምፄን ስሙ፤ እናንተ ግድ የለሽ ሴት ልጆች ሆይ፣ የምለውን አድምጡ።

¹⁰“ከአንድ ዓመት በጥቂት በሚበልጥ ጊዜ ውስጥ ትንቀጠቀጣላችሁ፤ እናንተ ግድ የለሽ ሴቶች ሆይ፤ የወይኑ መከር ይጠፋልና፣ የሚሰበሰብም አይኖርም። ¹¹እናንተ ተዝናኞች ሆይ፣ ተንቀጥቀጡ፤ እናንተ ግድ የለሾች ሆይ፣ ተብረከረኩ! ተራቍታችሁ ማቅን በወገባችሁ ላይ ታጠቁ። ¹²ስለ ተወዳጁ ዕርሻ፣ ስለ ፍሬያማውም ወይን ደረታችሁን ምቱ፤ ¹³እሾህና ኵርንችት ስለሚበቅልበት ስለ ሕዝቤ ምድር፤ አዎን፣ ሐሤት በሞላባት ከተማ ውስጥ ስላሉ የደስታ ቤቶች ሁሉ። ¹⁴ቤተ መንግሥቱ ይተዋልና፣ የተጨናነቀችው ከተማ ባዶ ትሆናለች፤ ኰረብታውና ማማው ለዘላለም ባዶ ስፍራ ይሆናሉ፣ ለሜዳ አህዮች ደስታ፣ ለመንጎች ግጦሽ ይሆናሉ፤ ¹⁵የአባታችን መንፈስ ከላይ በእኛ ላይ እስኪፈስ ድረስ፣ ምድረ በዳውም ፍሬያማ ዕርሻ እስኪሆን፣ ፍሬያማውም ዕርሻ እንደ ደን እስኪቈጠር ድረስ። ¹⁶ያን ጊዜ ፍትሕ በምድረ በዳ ይኖራል፤ ጽድቅም በፍሬያማው ዕርሻ ይኖራል። ¹⁷የጽድቅ ሥራ ሰላም ይሆናል፤ የጽድቅም ውጤት ለዘላለም ጸጥታና ዋስትና ይሆናል። ¹⁸ሕዝቤም በሰላማዊ ቤት፣ በጸጥተኛ ማደሪያ፣ ሳይደፈር በሚያርፍ ስፍራ ይኖራል። ¹⁹በረዶ ደኑን ቢመታም፣ ከተማይቱም ፈጽማ ብትደመሰስ፣ ²⁰በውሃ ሁሉ ዳር የምትዘሩ፣ በሬውንና አህያውን በነጻነት የምትለቅቁ እናንተ ብፁዓን ናችሁ።”