Yesaya 32 FHB Father's Heart Bible™

32 ¹Talenu, kinga kakála yala mu masonga, amana bapfumu bakála yala ni masonga. ²Kosu mutu kakála hanga kiswaminu kya pfunzi, kiswaminu kya kimbongila, hanga mamba ma nto mu fulu dyayumuka, hanga kininga kya tadi dya mbuta mu tsi ya kulembwa. ³Amana mesu ma bana bisi mona mazibikaku hika, amana matu ma bana bisi yuka mahinikina. ⁴Mbundu ya nswalu yakibakula luzayi, amana lulaka lwa mihunga lwazónza mu nswalu yi mboti-mboti. ⁵Zoba kabátelaku hika mutu wa kitoku, amana musadi wa mbi kabázimbulaku ni mutu wa lukumu. ⁶Mukuma zoba wisi zonza kilawu, amana mbundu yandi yisi yidika mambi: mu kuhanga mambu makonda kinzambi, mu kuzonza mambu ma luvunu kikuma kya Tata wetu, mu kusisa bana ba nzala konda kima amana mu kukandikisa bana ba kihwinya bya kunwa. ⁷Binwaninu bya musadi wa mbi byenina bya mbi; wisi yidika bimeka bya mbi mu kubivisa batu ba phasi ni mambu ma luvunu, ka na wuna wenina mu phasi kasamba dyambu dyandi mu masonga. ⁸Kaasi mutu wa kitoku wisi banza mambu ma kitoku, amana mu mambu ma kitoku yandi katelama.

Telamenu, Bandumba Bana Badisidi mu Talala

⁹Benu bakhetu bana badisidi mu talala, telamenu amana yukenu ndinga yama; benu bandumba bana badisidi, hinikinenu mana mbati zonza.

¹⁰«Kunima dya mvula yimosi yi ndambu, kalutekita, benu bakhetu bana badisidi, mukuma kuhela kwa vinu kakutóta, amana kukutakana mbongu kwakálaku. ¹¹Tekitenu, benu bana badisidi; syenu bweya, benu bana badisidi! Divwatulenu lwakála khonga amana luzyetesenu miledi mya khondu mu mbunda zenu. ¹²Lubulenu mayeni menu kikuma kya bilanga bya kyesi, kikuma kya vinu dina disi hela bibundu, ¹³kikuma kya tsi ya batu bama, kuna tsaku yi minsende misi mena; kyedika, kikuma kya nzu zoosu za kyesi mu mbanza yina yisi sephila. ¹⁴Mukuma nzu ya kinga kakála yasiswa, mbanza yina yikala yi batu balawu kakála tseki; londi yi kinongi byakála bifulu bya phamba mu matangwa moosu, kyesi kya bane ba mu tseki, phila za bibulu, ¹⁵tii yikuna Kitembu kya Tata wetu kyamwangulu kwena betu tukidila ku zilu, amana tseki yákituka kilanga kisi hela bibundu, amana kilanga kisi hela bibundu kyabátala hanga musitu. ¹⁶Amana masonga makizingila mu tseki, amana masonga makala mu kilanga kisi hela bibundu. ¹⁷Kisalu kya masonga kakála ngemba, amana mbutu ya masonga, talala yi kuzinga konda bweya mu matangwa moosu. ¹⁸Batu bama bakizingila mu nzu ya ngemba, mu bifulu bya kusweka mboti, mu bifulu bya kuvunda konda ningana. ¹⁹Ka na mvula ya matadi yabula musitu ha tsi amana mbanza yabivisulu yosu, ²⁰kyesi kwena benu bana bisi kuna mbutu bela-bela yi mamba moosu, bana bisi yambula ngombi yi ane benda mu kyesi kya bawu.»